FESUOKNA 21 - Pathien Lekhabu Inthieng (BSI)

Suok kawl dân ding

¹ “Hienghai hi an kuoma i pêk ding dânhai chu an nih:

² Hebrai siehlaw în châwk chun, kum ruk sûng i rawngbâwl a ta; a kum sarinaa chun iengkhawm ngai lovin, a thlâwnin suok el a tih.

³ Ama khâta hung lût a ni chun, ama khâtin suok nâwk el a ta; nuhmei nei tah a ni chun a nuhmei khawm ama leh suok vêng a tih.

⁴ A hotupa chun nuhmei a pêk a, a nuhmei chun naupasalhai le naunuhmeihai a neipêk chun,nuhmei le a nauhai chu a hotupa ta nîng an ta; ama khâtin suok el a tih.

⁵ Nisienlakhawm, siehlaw chun, Ka hotupa, ka nuhmei le ka nauhai ka hmangai a, zalêna um dingin suok da el ka tih, a ti chun:

⁶ a hotupa chun Pathien kuomah hung ṭhuoi a ta, kawtkhâr bienga manih, kawtkhâra manih hung ṭhuoi a ta; a hotupa chun a nakâwr chu thîr zumin ver tlang a ta, kumkhuoin ama rawng chu bâwl tâng a tih.

⁷ “Miin a naunuhmei siehlawnu ni dinga a zawr chun, siehlawpahai suok angin chu minu chu suok thei naw nih.

⁸ A hotupa a suklungawi naw a, ama chun nei dinga a huol naw chun, intlanin inumtir a tih: amânu chu indiklotaka a lo thaw tâk leiin, ram dang mi kuoma zawr sâwng dingin thuneina nei thei naw nih.

⁹ A naupa nuhmei dinga a huol a ni chun, ama chu naunuhmeihai ang bawkin a thaw ding a nih.

¹⁰ Nuhmei dang ân neitir chun, a bu, a silfên le inneinaa a chan chu a suktlâwmpêk chuong ding a ni nawh.

¹¹ Hi thil pathum hi chu minu chunga a thaw naw chun, bat nei lovin, tangka pe bawk lovin fe suok el a tih.

Kut thlâk thua dân siemhai

¹² “Miin mi dang a vuok a, a thi chun, ama khawm chu sukhlum ngei ding a nih.

¹³ Nisienlakhawm, tum hrimnaa inchân lei ni lova, Pathienin ama chu a kuta a pêk hrim a ni chun, tlân hmangna ding hmun ruotpêk ka ti che.

¹⁴ Miin a vênghai tum hrimnaa hlêma sukhlum tuma a thaw ruok chun, ama chu sukhlum dingin ka maichâma inthawkin ṭhuoi hmang i tih.

¹⁵ “Tukhawm a nu manih, a pa manih vawtu chu sukhlum ngei ding a nih.

¹⁶ “Tukhawm mihriem inru chu, a zawr khawmin, amain a umpui a ni khawmin, ama chu sukhlum ngei ding a nih.

¹⁷ “Tukhawm a pa manih, a nu manih ṭawngsieinphurtu chu sukhlum ngei ding a nih.

¹⁸ Mi insuol hai sienla, mi pakhatin mi dang lunga dêngin amanih, a kuttumin amanih chum sienla, ama chu thi lovin, tho kâng pei lovin zâl el sienla;

¹⁹ a hung tho nâwk a, hmawl ṭhuna a lâwn thei chun, a vawtu chu insuo phawt ding a nih; a hun sukhmang ai chu thung a ta, a dam var chenin enkawl a tih.

²⁰ “Miin a siehlawpa amanih, a siehlawnu amanih hmawlin vaw sien, thi dêr sienla, ama chu hrem ngei ding a nih.

²¹ Nisienlakhawm, ni khat amanih, ni hni amanih a la dam chun, ama chu hrem ding a ni nawh; siehlaw chu a tangka a ni leiin.

²² “Mi an insuol a, nuhmei nau vawn a sukna a, a nau chu a tla chun, sietnain hung zui kher naw sien khawm, chu nuhmeinu pasalin a chunga a phût zât ang ang chu inchawitir ngei ding a nih: chun, rorêltuhaiin ṭha an ti ang chu a pêk ding a nih.

²³ Sietnain a hung zui hlau ruok chun hringna aiah hringna,

²⁴ mit aiah mit, ha aiah ha, kut aiah kut, ke aiah ke,

²⁵ raw aiah raw, sukhliem aiah sukhliem, vuok aiah vuok pe ve thung i tih.

²⁶ “Miin a siehlawpa mit amanih, a siehlawnu mit amanih a vuok a, a suksiet chun, a mit lei chun ama chu iengkhawm ngai lovin insuoktir el a tih.

²⁷ A siehlawpa ha amanih, a siehlawnu ha amanih a vuok thlawng chun, a ha lei chun iengkhawm ngai lovin insuoktir el a tih.

Thil neitu mawphurna

²⁸ “Bâwngchalin pasal amanih, nuhmei a sik a, a thi chun, chu bâwngchal chu lunga dêng hlum ngei ding a na, a sa chu fâk a ni ding a ni nawh; bâwngchal neitu ruok chu fihlîm a tih.

²⁹ Nisienlakhawm, bâwngchal chu a hma khawmin mi sik hmangtak lo ni tahin, a neitu khawm chu inhriettir lo ni ta bawk sienla, ama chun a inah a thlung naw a, pasal amanih, nuhmei a sikhlum a ni chun, a neitu chu sukhlum nîng a ta, bâwgchal khawm chu dêng hlum ni bawk a tih.

³⁰ Ama chu intlanna phût a ni chun, a hringna ta dinga intlanna a kuoma phût ang taphawt chu pêng a tih.

³¹ Pasalte amanih, nuhmeite amanih, a sikhlum a ni khawmin hi dân bawk hi a chungah hmang nîng a tih.

³² Bâwngchalin siehlawpa amanih, siehlawnu a sik chun, a neitu chun an hotupa kuoma chun shekel tangka sâwmthum pêng a ta, chun, bâwngchal chu dêng hlum nîng a tih.

³³ “Miin khur hawngin amanih, miin khur choin nel nâwk naw sienla, chutaka chun sabengtung amanih, bâwngchal tla ta sienla,

³⁴ a khur neitu chun thung a ta; a ran neitu kuoma chun tangka pêng a ta, ran thi chu ama ta ni tâng a tih.

³⁵ “Mi pakhat bâwngchalin mi dang bâwngchal suknain lo thi ta sienla, bâwngchal la dam chu zawr an ta, a man chu insem an tih; chun, a thi khawm chu insem bawk an tih.

³⁶ Bâwngchal chu a hma khawma mi sik hmang a ni ti hriet sa a ni ruok chun, a neituin a inah a thlung naw a ni chun, bâwngchal aia chun bâwngchal ma a pêk ngei ding a nih; chun, ran thi chu ama ta ni tâng a tih.