FESUOKNA 16 - Pathien Lekhabu Inthieng (BSI)

Pathienin Manna a pêk

¹ Elima inthawk chun an inzin suok a, Israel mipui pungkhawmhai po po chu, Aigupta ram an suoksanna thla hnina ni sâwmpanga ni tak chun, Sinai le Elim inkâra Sin thlalêr chu an hung tlung a.

² Israel mipui po po chu thlalêra chun Mosie le Aron chunga chun an chier ta a.

³ Israel mihai chun an kuomah, “Aigupta rama sa bêlhai leh kan ṭhung a, bei kan dittâwka fa zing khan Lalpa kuta chun thi el inlang ni ding bah: hieng mipui po po hi phîngṭâma thi ding elin thlalêrah in mi ṭhuoi lût a ni ta hi,” an ti a.

⁴ Chun, Lalpa chun Mosie kuomah, “Ngai rawh, vâna inthawkin in ta dingin bei ka hung insûrtir ding a nih: mipui va fe suok an ta, ka dân an zâwm le an zâwm naw anni ka fie theina dingin ni tin ni khat tlatâwk la khâwm raw hai se.

⁵ Ni ruk nia chun ni tina an lâk khâwm zât lethni la khâwm an ta, chu chu buotsai an tih,” a ti a.

⁶ Mosie le Aron chun Israel mihai po po kuoma chun, “Zântieng pha, Lalpa chu a nih Aigupta rama inthawka ṭhuoi suoktu cheu chu ti hrieng in ta,

⁷ zîngtieng leh Lalpa ropuina chu hmûng in tih; Lalpa chun a chunga in chiernahai chu a hriet si a. Keini chu ieng am kan nia in mi chier khum hi?” an ti a.

⁸ Mosie bawk chun, “Zântieng chun sa le zîngtieng chun bei dittâwk fâk ding a pêk pha cheu chun Lalpa a nih ti hrieng in tih, a chunga in chiernahai chu Lalpa chun a hriet si a: keini chu ieng am kan ni a? In chierna chu keini chungah ni lovin Lalpa chungah a ni lem in sawnnaw,” a ti a.

⁹ Chun, Mosiein Aron kuomah, “Israel mipui pungkhawm po po kuomah chun, ‘Lalpa hmaa chun hung hnai ro, in chiernahai po po chu a hriet si a,’ ti rawh,” a ti a.

¹⁰ Chun, Israel mipui pungkhâwm po po kuoma Aronin a hril phingleh, thlalêr tieng chu an en a, sûm laia Pathien ropuina hung inlang chu an hmu a.

¹¹ Lalpa chun Mosie kuomah a hril a,

¹² “Israel mihai chiernahai chu ka hriet a, an kuomah, ‘Zântieng chun sa fâng in ta, zîngtieng chun beia sukkhawp nîng in tih, chun Lalpa in Pathien chu ka nih ti hrieng in tih ‘ ti rawh,” tiin.

¹³ Zântieng chun hieng hi a ni a, vamîmhai an hung suok a, riebûk chu a tuomin an hung tuom ta a: zîngkâr ruok chun riebûk vêla chun daidaw a kûr ṭuk el a.

¹⁴ Daidaw chuonga kûr ṭuk chu a hul hnung chun, ngai ta, thil inhlûm chite te, hnuoi chunga vûr tlang te vâr sar ang hi thlalêr chung po poa chun a um ta a.

¹⁵ Israel mihaiin chu chu an hmu chun ieng am a nih an hriet si naw a, “Ieng am a na?” an inti tâwl a. Mosie chun an kuomah, “Lalpain fâk dinga bei a pêk cheu chu a ni hi.

¹⁶ Hi hi Lalpain, ‘Mi tin fâk tâwk ang peiin rût ro; mi lu kipin omer khat pei, mi tinin a puon ina mihai ta dingin, in mihai zât ang peiin rût in tih,’ tia thu a pêk kha a ni hi,” a ta.

¹⁷ Israel mihai chun chuong ang tak chun an thaw a, ṭhenkhatin tam deu, ṭhenkhatin tlâwm deu an rût ta a.

¹⁸ Chun, omer khat peia an inkhi chun a rût tamtu khawm chun a chuong iengkhawm a nei naw a, a rût tlâwmtu khawm chu a tlasam chuong naw bawk a; mi tin fâk tâwk ang peiin an rût ta a.

¹⁹ Chun, Mosiein an kuomah, “Zîngkâr chen tukhawmin hla naw raw se,” a ti a.

²⁰ Nisienlakhawm, Mosie thu chu an ngai naw a, ṭhenkhatin zîngkâr chenin an hla a, a lo innge a, a thu ta a; Mosie chu an chungah a lunginsen ta hle a.

²¹ Tûk tin elin an rût a, mi tin chun a fâk tâwk ang peiin. Sûna nisa a hung lum pha ruok chun ân tui hmang hlak a.

²² Ni ruk ni ruok chun fâk tâwk lêt hni, mi tin ta dinga omer hni peiin an rût a; chun, mipui hotuhai chu an hung a, Mosie kuomah an hril a.

²³ Ama chun an kuomah, “Hi hi a nih Lalpain a hril kha: Zînga chu Lalpa ta dinga Châwl ni inthieng, châwl ṭawk ṭawk ding ni chu a nih; in suong ding chu suong unla, in zêu ding chu zêu unla, chun, a mahla po po chu zîngkâr chen in ta dinga sie dingin hla el ro,” a ti a.

²⁴ Mosiein a ti ang chun zîngkâr chena dingin an sie ta a; chuongchun, a lo thu naw a, a nge hrim khawm a um bawk nawh.

²⁵ Mosie chun,“Kha kha vawisûn fa ro, vawisûn hi chu Lalpa kuoma Châwl ni inthieng a ni si a: vawisûn chu in rûtna hlak hmuna hrim hrim hmu naw ti niu.

²⁶ Ni ruk sûng chu la khâwm in ta, ni sari ni ruok chu Châwl ni a ni a, chu ni chun pakhat khawm um naw nih,” a ti a.

²⁷ Ni sari ni chun mipui laia ṭhenkhat chu va rût dingin an fe suoka chu pakhat khawm an hmu nawh.

²⁸ Chun, Lalpain Mosie kuomah, “Ka thupêkhai le ka dânhai chu zâwm nuom lovin ieng chen am in um ding a na?

²⁹ Ngai ta u, Lalpa chun Châwl ni a pêk cheu leiin ni ruk ni chun ni hni tlâk tâwk bei a pêk si cheu a, mi tin chu in hmun sengah um ṭawk ṭawk ro, ni sari ni chun a hmuna inthawk tukhawm fe suok naw raw se,” a ti a.

³⁰ Chuongchun, mipui chu ni sari ni chun an châwl ta a.

³¹ Chun, Israel sûnghai chun, chu hminga chun Manna an inbûk a; koriendar chi anga vâr, ân hnikzie chu bei inphân khuoizu le siem ang hi a nih.

³² Mosie chun, hi thil hi a nih Lalpain, “In thlahai ta dingin omer sip khat kawl zing ro, Aigupta rama inthawka ka ṭhuoi suok lai cheua ka châwmna cheu bei chu an hmu theina dingin, tia thu a lo pêk chu,” a ti a.

³³ Mosie chun Aron kuomah, “Bêl la la, omer sip khat manna chutaka chun sie rawh, chun, i thlahai ta dinga kawl dingin Lalpa hmaa chun sie ṭha rawh,” a ti a.

³⁴ Lalpain Mosie thu a pêk ang tak chun Aron chun kawl zing dingin, thuthlungna bâwm hmaa chun a sie ta a.

³⁵ Israel mihai chun mi umna ram an hung tlung hma po kum sawmli sûng chu manna chu an fâk ta a. Kanaan ram ramrihai an hung tlung chen chun an fâk a.

³⁶ (Omer khat chu Epha hmun sâwma ṭhea hmun khat a nih.)