FESUOKNA 11 - Pathien Lekhabu Inthieng (BSI)

Nau lutîr thi ding hrillâwkna

¹ Lalpa chun Mosie kuomah, “Pharao le Aigupta chungah hri pakhat la hung intlungtir nâwk ka tih, chu hnunga chun hitaka inthawk hin infetir a ti cheu. Ân fetir pha cheu chun a namin nam suok fai vawng a ti cheu.

² Mipuihai hrieta chun hril la, pasal tin le nuhmei tinin, rângkachak le tangkaruo incheinahai an tuolbâwmhaia inthawkin haw seng raw hai se,” a ti a.

³ Lalpa chun Aiguptahai mithmuah Israel mihai chu ditsakna ân hmutir a, Mosie ngei khawm chu mipui mithmu le Pharao siehlawhai mithmuah Aigupta ram sûnga chun mi lientak a ni bawk a.

⁴ Mosie chun, “Hieng ang hin Lalpain a tih: ‘Zân ril lai vêlah Aigupta mihai lai fe suok ka ta;

⁵ Aigupta rama naulutîr po po, Pharao nau utîr a lalṭhungphaa ṭhunga inthawka, bu râwtnawinaa sinthaw suoknu naulutîr tak chen le, ran ruol tê hmasatakhai le chun thi fai vawng an tih.

⁶ Chun, Aigupta ram sûng po poa chun ṭapna nasatak um a tih: chuong ang hrim hrim chu a la um ngai dêr naw a, um khawm um nâwk ta ngai naw ni.

⁷ Nisienlakhawm, Israelhai ruok chu anni amanih, an ranhai amanih, uiin ân bau ri tak ngiel khawm hriet ni naw nih. Chu pha chun, Lalpain Aigupta mi le Israel mihai chu a thlier ngei a nih ti hre tâng in tih.

⁸ Chun, hieng i siehlawhai po po hi ka kuomah hung an ta, ka hmaa bawkkhupin, Nanga zuitu dinghai po po le chun suok ta rawh,’ mi tîng an tih; chun, chu hnunga chun suok tâng ka tih, tiin,” a ti a. Pharao kuoma inthawk chun lunginsentakin a suok ta a.

⁹ Chun Lalpain Mosie kuomah, “Aigupta rama hin ka thilmakhai sukpung a ni theina dingin, Pharao chun in thu a ngai naw ding a ni hi,” a ti a.

¹⁰ Mosie le Aron chun Pharao hmaa chun thilmakhai po po chu an thaw ta a; nisienlakhawm, Lalpa chun Pharao lungril chu a sukngar leiin, a rama inthawk chun Israel mipuihai chu ân fesuoktir chuong nawh.