FESUOKNA 1 - Pathien Lekhabu Inthieng (BSI)

Aiguptaa Israelhai rimsikna

¹ Hieng hi Jakob ruola Aiguptaa hung thla Israel naupasalhai hming chu an nih, mi tin a sûnghai pei leh:

² Reuben, Simeon, Levi le Juda,

³ Issakar, Zebulun le Benjamin,

⁴ Dan le Naphtali, Gad le Aser hi.

⁵ Jakob ṭhalbea inthawka suokhai po chu mi sâwmsari an nih; Josef ruok chu Aiguptaah a lo um ta hrim a.

⁶ Chun, Josef le a unauhai po le, chu ṭhang khat sûnga mi po chu an thi ta a.

⁷ Nisienlakhawm, Israel mipuihai chu an hung sûngruol a, tamtaka hung inbelsain an hung pung a, nasataka thilthawtheiin an hung um a; ram chu anni hluo sipin a um ta a.

⁸ Tuhin Aiguptaa chun Josef hre ngailo lal thar a hung inlal ta a.

⁹ A mihai kuoma chun, “En ta u, Israel mipuihai hi eini nêkin an tam hlein thil an thaw thei lem bêk a;

¹⁰ hung ro, anni hi vartakin sawisâng ei tiu; chuong naw chun hung pung an ta; indona iengang khawm hung suok sien, anni hin ei hmêlmahai chu ṭhangpuiin mi do an ta, hi rama inthawk hi tlân suok rawi an tih,” a ti a.

¹¹ Chuleiin, phurrik takhaia anni sukrinum dingin, an chungah sinthawhotuhai an siempêk ta ngei a. Chun, Pithom le Rameses, siekhâwmna khawpuihai chu, Pharao ta dingin an bâwl ta a.

¹² Nisienlakhawm anni chu an sukrimsi po leh an pung zuol deu deuin, an indar lien deu deu lem ta a. Chun, Aigupta mihai chun Israel mihai chu an ṭithâwng hle el ta a.

¹³ Chuongchun, Israel mihai chu inrimtakin sin an inthawtir a;

¹⁴ an sinthaw po po, lo sin kawng tinrênga le lung rawtnawinaa le ṭêklei siemnaa sin intaktakhai chu rimsitaka inthawtirin an nunhai an sukrinumpêk ta a.

¹⁵ Chun, Aigupta lal chun Hebrai naudawmtuhai kuoma chun thu a hril ta a; chuhai pakhat hming chu Siphra, a dang hming chu Pua a nih;

¹⁶ ama chun, “Hebrai nuhmeihai kuoma naudawmtu sin in va thaw a, nau piengna hmun ngeia in va hmu pha; naupasal an ni chun that unla, naunuhmei a ni ruok chun a hringin hla ro,” a ti a.

¹⁷ Nisienlakhawm, naudawmtuhai chun Pathien an ṭi a, Aigupta lalin anni thu a pêk angin an thaw naw a, nautê pasalhai chu an sanhim lem ta a.

¹⁸ Chun, Aigupta lal chun naudawmtuhai chu a ko a, an kuomah, “Iengdinga hi thil hi in thaw a, naupasalhai chu a hringa hla am in na?”a ti a.

¹⁹ Naudawmtuhai chun Pharao kuomah, “Hebrai nuhmeihai chu Aigupta nuhmeihai ang an ni naw a, anni chu an hrisêl a, naudawmtuhai an kuom an tlung hma hin nau chu an lo nei ta hlak a nih,” an ti a.

²⁰ Pathienin naudawmtuhai chu ṭhatakin a ngaisak a; Hebrai mihai chu an hung pung a, thilthawtheitak an hung ni ta a.

²¹ Naudawmtuhai chun Pathien an ṭi leiin Pathienin sûngkuoahai a siem ta a.

²² Chun, Pharao chun, “Naupasal hung pieng taphawt chu vadungah pei unla, naunuhmei taphawt chu a hringin hla ro,” tiin a mihai chu thu a pêk tlat a.