EZRA 8 - Pathien Lekhabu Inthieng (BSI)

Ezra ruola fêhai phung sûtna

¹ Hienghai hi an pahnam upahai chu an nih, Artazerzia rorêl laia Babulona inthawka keia ruola hang fe vehai phung sûtna chu hi hi a nih.

² Phinehas naupahaia chun Gersom; Ithamar naupahaia chun Daniel; David naupahaia chun, Hattus;

³ Paros naupahaia, Sekania naupahaia chun, Zekaria; phung sût dâna chun, ama leh pasal za khat le sâwmnga an nih.

⁴ Pahath-moab naupahaia chun, Zerahia naupa Eliehoenai; ama le pasal za hni leh.

⁵ Jahaziel naupa, Sekania naupahaia chun, ama leh pasal za thum.

⁶ Adin naupahaia chun, Jonathan naupa Ebed; ama leh pasal sâwmnga.

⁷ Elam naupahaia chun, Athalia naupa Jesaia: ama leh pasal sâwmsari.

⁸ Sephatia naupahaia chun, Mikael naupa Zebadia; ama leh pasal sâwmriet.

⁹ Joab naupahaia chun, Jehiel naupa Obadia; ama leh pasal za hni sâwmpariet.

¹⁰ Josiphia naupa, Selomith naupahaia chun, ama leh pasal za khat le sâwmruk.

¹¹ Bebai naupahaia chun, Bebai naupa Zekaria; ama leh pasal sâwmhni pariet.

¹² Azgad naupahaia chun, Hakkatan naupa Johanan; ama leh pasal za khat le sâwm.

¹³ Chun, Adonikam naupahaia chun, chu chu a nuhnungtak a nih, hieng hi an hminghai chu a nih, Eliphelet, Jeuel le, Semaia hi; anni leh pasal sâwmruk.

¹⁴ Bigvai naupahaia chun, Uthai le Zakkur; anni leh pasal sâwmsari.

¹⁵ Anni chu Ahavaa luong lût vadunga chun ka kei khâwm tâwl a; chutaka chun ni thum lai chu kan riek a; chun, thiempuhai le mipuihai chu ka thlîr vêl chun Levi thlahai hrim ka hmu ta naw a.

¹⁶ Chuongchun, Eliezer, Ariel, Semaia, Elnathan, Jarib, Elnathan, Nathan, Zekaria, Mesullam hai mi lutakhai chu kân cha a, Joiarib le Elnathan inchûktirtuhai chu kân cha sa bawk a.

¹⁷ Anni chu Kasiphia hmuna lal Iddo kuoma chun ka tir ta a; Pathien ina rawngbâwltu dinghai an mi hung ṭhuoipêk theina dingin, Kasiphia hmuna, Iddo le a unau Nethinim mihai kuoma an thuhril ding chu ka hril a.

¹⁸ Chun, ka chunga kan Pathien kut ṭhatzie ang peiin anni chun mi lungril indiktak Israel naupa Levi naupa Mahli naupahai laia mi, Serebia, a unauhai le a naupasalhai leh sâwmpariet an mi hung ṭhuoipêk a;

¹⁹ chun, Hasabia le Merari naupa- hai Jesaia, a unauhai le an naupasalhai leh sâwmhni;

²⁰ chun, David le lalhaiin Levi mihai rawng bâwl dinga an pêk Temple siehlaw mi za hni le sâwmhni leh; an rêng chun hminga ko seng an nih.

Bu nghei le ṭawngṭaina Ezra rawiin

²¹ Chun, kan thuomhnawhai po po le kan nau-le-têhai le keini ta dinga lampui tluong mi zawngpêk dinga, kan Pathien hmaa chun kan insukhnuoi theina dingin, Ahava vadunga chun bunghei ka rawt ta a.

²² Lal kuoma chun, “Ama zawngtuhai chunga chun Pathien kut chu ṭhatna dingin a um a, ama nghatsantuhai po po chunga ruok chun, thilthawtheina le lunginsenna a um a nih,” kan lo ti ta si leiin, lampuia hmêlmahaia inthawka mi ṭhangpui dinga sakawr chung chuong mi le sipai pâwl lal kuoma hni kân zak si a.

²³ Chuongchun, bu chu kan nghei a, hi hi ding hin kan Pathien chu kan ngên a: chuongchun, keini ngênthlûkin ama chu a um ta a.

Temple bawlna dinga thilpêk

²⁴ Chun, thiempuhai laia a bîk deuhai sâwmpahni, Serebia, Hasabia le an unauhai sâwm ka sie hran a;

²⁵ chuongchun, tangka le rângkachak le bûr le bêlhai, kan Pathien in ta dinga thilpêk, lal le a rorêltuhai le, a mi ṭhahai le chutaka Israel umhai po poin an pêkhai chu anni chu ka bûkpêk ta a.

²⁶ Kei ngei khawma an kuta chun tangkaruo talent za ruk sâwmnga le, bûr le bêlhai talent za khat ka bûkpêk a; rângkachak talent za leh;

²⁷ rângkachak maihûn sâwmhni, darik sâng khat bûk seng, chun, rângkachak anga hlu ve bawk, dâr tle mi bêl pahni leh.

²⁸ Chun, an kuomah ka hril a, “Nangni hi Lalpa kuoma inthieng in na, a bûr le bêlhai khawm inthieng an nih; chun, hieng tangka le rângkachakhai hi in thlatuhai Pathien Lalpa kuoma inhâwktaka pêk an ni vawng a nih.

²⁹ Jerusalemah, Lalpa in pindanhaia, Israel pahnam mi ṭhahai le, Levi mihai le thiempu laltakhai hmaa in bûkpêk hmakhat chun, fîmkhur unla, kawl tlat ro,” tiin.

³⁰ Chuongchun, thiempuhai le Levi mihai chun kan Pathien ina Jerusalema hung lâk dingin rângkachak le tangkaruo chuong ang bûk chu an lâk ta a.

³¹ Chun, Jerusalema fe ding chun Ahava vadunga inthawkin thla khatnaa ni sâwmpahni ni chun kan suok ta a; chuongchun, kan Pathien kut chu kan chunga chun a um a, ama chun hmêlmahai le lampuia mîn chântu kuta inthawk chun a mi sansuok a.

³² Jerusalem chu kan hung tlung a, chutaka chun ni thum lai chu kan hang um phawt a.

³³ A ni li ni chun a nih, chuong rângkachak le tangkaruo le bûr le bêlhai chu kan Pathien ina chun thiempu Uria naupa Meremoth kuta bûkin kan inhlân chu; ama le chun Phinehas naupa Eleazar chu a um nghe nghe a; chun, anni le chun, Levi mihai, Binnui naupa Noadia le Jesua naupa Jozabad chu an um bawk a;

³⁴ a rêngin a zât le a bûkin; a bûk zât chu, chu huna chun ziek a ni nghe nghe bawk a.

³⁵ Chun, sal intâng mihai intângnaa inthawka hung suokhai chun Israel Pathien kuoma chun Israelhai po po puolah; bâwngchal sâwmpahni le, berâmchal sâwmkuo paruk, berâmte sâwmsari pasari le; kêlchal sâwmpahni suol thilinhlâna dingin; pumrawhmang thilinhlânah an inhlân ta a; hieng po po hi Lalpa kuoma pumrawhmang thilinhlân a nih.

³⁶ Chun, lal thupêkhai chu vadung râla lal ram awptuhai le rorêltuhai kuoma chun an pêk suok ta a; chun, Pathien in le mipuihai chu ṭhangpuina an pêk ta a.