EZRA 4 - Pathien Lekhabu Inthieng (BSI)

Hmêlmahaiin sin an sukchât

¹ Juda le Benjamin hai hmêlmahai chun sal intâng suokhai chun Israel Pathien, Lalpa ta dingin biekin an bâwl ti an lo hriet ta a;

² Zerubbabel le pahnama upahai kuoma chun anni chu an hung a, an kuomah, “Nangni hi bâwlpui vêng kan ti cheu, in thaw ang bawkin in Pathien hi a ni sia kan zawng chu; chuongchun, Assuria lal Esar-haddon, hitienga keini mi hung ṭhuoitu huna inthawk ta kha ama kuoma chun kan inthâwi hlak tah a nih,” an ti a.

³ Nisienlakhawm, Zerubbabel le Jesua le Israel pahnam upa danghai chun an kuomah, “Kan Pathien ta dinga in bâwl dingin keini le hin iengkhawm thaw ding in nei nawh; Persia lal Kurain keini thu a mi pêk angin, Israelhai Pathien, Lalpa ta dinga in chu keini khât ngeiin bâwl lem kan tih,” an ti a.

⁴ Chuongchun, chu rama mihai chun Juda mihai kut chu an sukhrâtnaw ta a, in bâwl thua chun an sukbuoi a,

⁵ an thiltum chu khap dingin an chunga rorêltuhai, Persia lal Kura dam sûng le, Persia lal Daria rorêl chen khan an ruoi ta a.

Jerusalem indin le kal thu

⁶ Chuongchun, Ahasuera rorêl lai, a rorêl ṭan hlimin Jerusalem le Juda rama umhai chunga hêkna an ziek ta a.

⁷ Chun, Artazerzia hun laiin, Bislam hai, Mithredath hai, Tabeel hai le a ruol danghaiin Persia lal Artazerzia kuoma chun lekha an ziek a, chu lekha chu Suria lekhaa ziek, Suria ṭawnga ziek a na.

⁸ Rorêltu Rehum le lekhaziektu Simsai chun Jerusalem chungthuah hieng ang hin lal Artazerzia kuoma chun an ziek a;

⁹ chuongchun, rorêltu Rehum le lekhaziektu Simsai le an ruol danghai rorêltuhai, ram awptuhai, ram hotuhai, Persia mihai, Erek mihai, Babulon mihai, Elam mi Susana umhai le,

¹⁰ hnam dang danghai, milien le ropui Osnapparin a hnawt dawk a, Samari ram khawpuihaia ân umtirhai le vadung râltienga an umtirhai le chun chu lekha chu an ziek a na.

¹¹ Hieng hi an lekha ziek dân chu a nih; Laltak Artazerzia kuomah: “Vadungpui râla i siehlawhai leh, chuong ang peiin,

¹² i kuoma inthawka Juda hunghai kha Jerusalemah kan kuomah an hung a nih ti hi lal chun lo hre raw se; khawpui sie le hel chu an bâwl a, a kulhai chu an zo ta a, a lungphûmhai chu an siem ṭha mêk a nih.

¹³ Hi khuo hi hienga an bâwl a, a kulhai an zo chun, leiman dâm, sie amanih, ram man amanih pe naw ni hai a, a tâwpa chun lalhai chu sukse ngei an tih ti hi lal chun lo hre bawk raw se.

¹⁴ Tuhin lal in ropui chi chu liek kan na, lal hang sukmuolpho chu kan ta dingin a âwm naw a nih, chuleiin, kan hung thawnin lal chu kan hrilfie a nih;

¹⁵ i pi le puhai thu ziekna lekhabua chun zawng ni sien la, chuongchun, chu thu ziekna lekhabua chun hmûng i ta, hi khuo hi khaw hel a na, ram le lalhai ta ding khawma pawitâwk a na, inhma khawma buoina an lo siem ta a; chuong lei chun hi khuo hi suksiet a nih ti hrieng i tih.

¹⁶ Hi khuo hi bâwl a hung na, a kulhai chu zo a hung ni ngei ngei chun vadung râla hin chu hieng ang hin chan hrim nei naw ti nih ti lal chu kan hung hrilfie a nih,” tiin.

¹⁷ Chuongchun, lal chun rorêltu Rehum le, lekhaziektu Simsai le Samaria um an ruol danghai kuoma le, vadung râla khawsa hlakhai kuoma chun dawnna chu ân phur ta a, “Inremna um raw se, chuong ang peiin.

¹⁸ Kan kuoma lekhathawn in hung inphur kha ka hma ngeiah chiengtaka tiem a ni ta a.

¹⁹ Chun, thu ka pêk a, zawngna chu siem a ni ta bawk a, chuongchun, inhmain hi khuo hin lalhai chungah helna lo siem tain, buoina le helna chu chutaka chun a lo um ta a nih ti hmu suok a ni ta a.

²⁰ Vadung râl ram po po chunga rorêltu, Jerusalem vêla khan lal thilthawtheitak takhai an um a; an kuoma chun leiman dâm, ram man dâm, sie dâm pêk a ni hlak a.

²¹ Tuhin, hieng mihai hi suktâwp dingin thupêk siem unla, hi khuo hi bâwl pei ni ta naw raw se; keima ngeiin thupêk ka siem hmakhat chun.

²² Chun, hi thua hin vuoicha lo dingin fîmkhur rawh; lalhai sukpawi ding elin iengdingin am sietna chu a hung suok ding a na?” tiin.

²³ Chun, lal Artazerzia lekha chu Rehum le, lekhaziektu Simsai le, an ruolhai hmaa tiem a ni phing chun, inhmâwtakin Judahai kuomah Jerusalema chun an fe a, thilthawtheina le thawluinain anni chu an suktâwp ta a.

²⁴ Chuongchun, Jerusalema um, Pathien in sinthaw chu a lo tâwp ta a; Persia lal Daria rorêl kum hnina chen chun châwlsan a ni ta a.