EZEKIEL 4 - Pathien Lekhabu Inthieng (BSI)

Jerusalem hlukhum dân ding inentirlâwkna

¹ “Nang khawma, mihriem naupa, ṭêklei phêk la la, a chunga chun khawpui, Jerusalem khawpui lim chu inngîr la;

² chu chu rûn la, kulhaiin bâwl khum la, a vêla chun hnuoi dêng pâwng la, puon inhai kei khum bawk la, chun, a vêl el chun kâphmunhai siem bawk rawh.

³ Chun, thîr phêk la la, nang le khawpui inkâra chun bang dingin intung la, chun, i hmai chu chu tieng chu hei innghat la, inhuol angin siem la, chun, nangin inhuol rawh. Hi hi Israel sûngkaw inchikna chu nîng a tih.

⁴ “Chu nawa chun, i vawitieng delin zâl la, i chunga chun Israel sûngkaw suolna chu innghat rawh; chu chu chunga i zâl ni zât ang pei chun, an suolna chu phur i tih.

⁵ An suol kum zât chu i ta ding chun i ni dingin, ni za thum le sâwmkuo ni dingin ka ruot ta si a, chuongchun, Israel sûngkaw suolna chu i phur ding a nih.

⁶ Chun, hi hi i thaw vawng pha chun, i changtieng pang delin zâl nâwk i ta; Juda sûngkaw suolna chu phur thung tâng i tih; ni sâwmli sûng, ni tin chu kum khata dingin, i ta dingin hieng ang hin ka ruot ta si a.

⁷ Jerusalem rûna um tieng chu i hmai innghat i ta, i bânhai hlîmin, chun, a chungthua chun hrillâwk i tih.

⁸ Chun, ngai ta, khuopnahai i chungah sieng ka ta, i rûnna nihai chu i sukkim hmakhat chun sîr khat sîr khatah în her nawna dingin.

⁹ Bu le, buṭei le bê le, si le, butun le, havai la la, bêl pakhatah sie la; chutaka inthawk chun bei siem rawh; a sîra i zâl ni zât ang peiin; chu chu ni za thum le sâwmkuo sûng fâng i tih.

¹⁰ Chun, i bu i fâk ding chu a bûka bûk nîng a ta, ni tina shekel sâwmhni; hunbi nei takin i fâk chau ding a nih.

¹¹ chun, tui khawm inkhi bawkin dâwn i ta, hin hmun ruka ṭhea hmun khat pei, a hunbi nei takin dâwn i tih.

¹² Chun, an mithmua chun mihriem êk leh meiah em i ta, buṭei bei angin fâng i tih,” tiin.

¹³ Chun, Lalpa chun, “Chuong ang bawk chun Israel thlahai chun anni ka hnawt hmangna ding hnamhai kuoma chun an bei chu inthieng lovin fâng an tih,” a ta.

¹⁴ Chun, kei chun, “A, Lalpa Pathien! ngai ta, kei chu ka lungril khawm sukpawrche a la ni naw a, ka tleirâwla inthawk tah tu chen hin amaa thi amanih, ramsahaiin an kei nâwi amanih ka fâk ngai naw a, ka baua hin sa tirdakum hrim hrim a lût ngai nawh,” ka ti a.

¹⁵ Chun, ka kuoma chun, “En ta, hi mihriem êk aiah bâwng êk ka pêk che a, chuongchun, i bei chu i buotsai ding a nih,” a ta.

¹⁶ Chu nawa chun, ka kuoma chun, “Mihriem naupa, ngai ta, beia Jerusalem châwmna chu suktâwp ka ta, bei chu inkhia inkhiin fâng an ta, fîmkhurtak elin; chun, tui khawm maktitakin, inkhia inkhiin dâwn bawk an tih;

¹⁷ bei le tui chu an tlâksama, anni le anni chu mak an inti senga, an suolnaa chu lâk hmang an ni theina dingin.