ESTHER 4 - Pathien Lekhabu Inthieng (BSI)

Mordekai le Juda mipui lungngaina

¹ Mordekaiin chuong thil thawa umhai po po a hriet chun, Mordekai chun a puonhai a keithlêr a, vut laia saiip puon silin, khawpui kawtthlêra chun a fe suok a, râwl inringtaka khêkin, lungsetakin a ṭap a;

² lal kul kawtkhâr hmaa ngei khawm chun a hung a, saiip puon silin tukhawm lal kul kawtkhâr chu an lût thei ngai naw hrim a na.

³ Chun, rambung tin elah, lal thupêk le a thu sukthlûk a tlungna taphawta chun, Judahai laia chun lungngaina nasatak el le bungheina dâm le, ṭapna le inrûmna dâm chu a um ta a; tamtak lem chu saiip puon silin pilvut chungah an zâl a.

Esther a lungngai ve, Mordekai leh thu an inthawn tuo

⁴ Esther nunghâkhai le a vêngtuhai chu a kuomah an hung a, ama chu an hril a; chuongchun, lalnu khawm chu nasatak elin a lungngai ta a; a saiip puon chu lâk hmangpêk a, Mordekai chu insiltir dingin silfênhai a thawn a; nisienlakhawm, ama ruok chun a lo lâk naw a.

⁵ Chun, Esther chun, lal vêngtu pakhat, amanu vêngtu dinga lalin a iruot Hathak chu a ko a, hi thil hi ieng am a na, ieng lei am a ni leh ti hre dingin Mordekai kuoma chun fe dingin a tir ta a.

⁶ Chuongchun, Hathak chu lal kawtkhâr puoa khawpui khawlaidunga chun Mordekai kuomah a va fe ta a.

⁷ Mordekai chun a chunga thil hung tlung po po le anni sukbohmangna dinga, Judahai ta dinga lal sum inhaia Hamanin sum pêk a tiem zât char chu a hril a.

⁸ Anni sukbohmang dinga Susaa inthawka thupêk pêk suoka um chu Esther kuoma inentira, ama kuoma chun hrilfie dingin a pêk bawk a; chun, a chihai ta dinga lal kuoma chun fe a, a kuoma chun ngênna siem a, a hmaa chun hni dingin phût a ni bawk a.

⁹ Hathak chu a hung a, Mordekai thuhai po po chu Esther chu a hril ta a.

¹⁰ Esther chun Hathak kuoma chun thu a hril a, Mordekai kuoma chun thucha ân phur a;

¹¹ “Tukhawm, nuhmei ni sien, pasal ni sien khawm, ko ni si lova, lal tuollai sûnghnung lema hung lût ta ding chun, ama chu hring a tih, tia lalin a rângkachak hmawl chu a lo lâk kâng si naw chun dân pakhat chau, ama chu that ngei nîng a tih, ti dân hi a um a nih ti lal siehlawhai po po le, lal rambunga mihai po po chun an hriet chieng hle a; nisienlakhawm, kei chu hieng ni sâwmthum sûng hin lal kuoma lût dinga koin ka um dêr naw a,” tiin.

¹² Chun, Esther thuhai chu Mordekai chu an hril a.

¹³ Mordekai khawm chun a dawnna chu Esther kuoma chun ân phurkîrtir nâwk a, “Juda mihai po po pumpel naw chu, lal ina nang khan pumpel bîk dingin inngaituo naw rawh.

¹⁴ Hi hi huna i to ṭawk ṭawk a, Judahai ta dinga himna le sansuokna hmun danga inthawkin a hung suok khawmin, nang le i pa sûngkuo chu bohmang tho ei tih; hieng ang lai huna ding hin a ni el thei i sawnnaw, lal nina i chang hi,” tiin.

Estherin Juda mipuihai ta dinga ngênna siem ân tiem

¹⁵ Chun, Esther chun Mordekai kuomah a dawnna chu ân phurkîr nâwk a.

¹⁶ “Fe la, Susaa Juda mi umhai po po chu kei khâwm rawh; chun, ka ta dingin bu nghei unla; sûn le zânah, ni thum sûng chu fain dâwn hlek naw ro, ka nunghâkhai le kei khawma chuong ang bawk chun nghei kan ta; chuongchun, dân lo ang ni sien khawm lal kuoma chun lût el ka ta; ka bohmang leh ka bohmang ni el raw se,” tiin.

¹⁷ Chuongchun, Mordekai chu a fe a, Estherin thu a pêk ang pei chun a thaw ta a.