EPHESI 6 - Pathien Lekhabu Inthieng (BSI)

Nauhai le nu le pahai

¹ Naupanghai, Lalpaa chun in nu le pahai thu zâwm ro, chu chu thil indik a ni si a.

² “I nu le pa chawimawi rawh,” (Chu chu thupêk tiem nei hmasa tak a nih).

³ “Chuongchun, i ta dingin ṭhâng a ta, hnuoiah dam sâwt i tih.”

⁴ Chun, nangni pahai, in nauhai suklungsen naw unla, Lalpa thununna le kâwknaa chun enkawl lem ro.

⁵ Suokhai, Krista thu zâwm angin, ṭidêk le inthina, lungril sakhat putin, hnuoia in hotuhai thu zâwm ro.

⁶ Mihriem suklâwmtuhai ang ela mit rawng bâwl lovin, Krista suok anga lungrila Pathien ditzâwng thaw lemin,

⁷ mihriem rawng bâwl ang el ni lovin, Lalpa rawngbâwl ang lema inhâwktaka bâwlin;

⁸ suok ni sienla, suok ni naw sienla khawm, mi tinin thil ṭha an thaw senghai chu Lalpa kuoma inthawkin a ngai bawk hmu nâwk an tih ti hre zing ro.

⁹ Chun, nangni hotuhai, chuong ang bawkin, anni le nangni hotu chu vânah a um ti le, ama chun mi ditsak bîk a nei nawh ti hrein, vau lovin an chungah thaw ve ro.

Kristien râlthuom famkim chu

¹⁰ A tâwp taka chun Lalpaa le a hrâtna thahruia chun thilthawtheina neiin um ro.

¹¹ Diebol zâwrnahai chu in do zona dingin Pathien râlthuom famkimin inthuom ro.

¹² Ei ibuonhai hi taksa le thisen an ni si naw a; inlalnahai le thuneinahai le, hi inthim chunga khawvêl rorêltuhai le, vân hmunhaia thlarau suol umhai chu an ni lem.

¹³ Chuleiin, ni ṭha nawa chun in do zona ding le, in thaw zo hnung khawma in ngîr theina dingin Pathien râlthuom famkim chu la ro.

¹⁴ Chuongchun, in kâwng chu thutaka hrênin, felna âwmphaw chu hâkin,

¹⁵ remna Chanchin Ṭha inbuotsaina chu in kea bunin ngîr ro.

¹⁶ Chu naw khawm chu ringna phaw la unla, chu chun mi suol thal chawk thei po po chu sukmit thei in tih.

¹⁷ Chun, sandamna lukhum le Thlarau ngûnhnâm (Pathien Thu chu) la unla, ṭawngṭaina le hnina tinrêngin,

¹⁸ ieng huna khawm Thlaraua ṭawngṭaiin, chu kawnga chun mi inthieng po pohai ta dingin ṭhahnemngai tak le hni tlatin ngaiven ro:

¹⁹ Chanchin Ṭha thurûk huoitaka puong dinga ka bau ka ka a, thu inhriltira ka um theina dingin ka ta ding khawmin mi hnipêk ro:

²⁰ chu kawnga chun ka thu hril ding ang chu huoitaka ka hril theina dingin. Chu Chanchin Ṭha palai khaidiet bun ka nih.

Malsâwmpêkna

²¹ Chun, nangni khawmin iengtin am ka um a, ka chanchin in hriet theina dingin, Tukik, Lalpaa unau dittak le ringumtak hin iengkim inhriettir a ti cheu:

²² hi lei tak hin ama chu in kuomah ka hung tir a nih, kan chanchin in hriet theina ding le ama hin in lungril a sukthlamuong theina dingin.

²³ Pa Pathien le Lalpa Isu Krista kuoma inthawka inremna le ringna ṭhang hmangaina unauhai kuoma khan um raw se.

²⁴ Ei Lalpa Isu Krista chuoilova hmangaituhai po po kuomah lunginsietna um raw se.