EPHESI 4 - Pathien Lekhabu Inthieng (BSI)

Taksa inpumkhatna

¹ Chuongchun, kei Lalpaa mi intâng hin ka ngên cheu, a kona cheu chu phua um dingin,

² inngaitlâwmna le thuhnuoirawlna po po neia, hmangainaa indâwtuo puma dâwtheina neia,

³ inremna khuopnaa chun Thlarau inpumkhatna chu vawng dinga thaw dingin.

⁴ A ko san cheu beiseina hmunkhata ko in ni ang bawk khan, taksa pakhat le Thlarau pakhat chau a um a.

⁵ Lalpa pakhat, ringna hmunkhat, baptisma hmunkhat,

⁶ iengkim Pathien le Pa pakhat chau chu iengkim chungah a um a, iengkim fangsuokin a um a, iengkim sûngah a um bawk a nih.

⁷ Nisienlakhawm, a thlâwna Krista thilpêk inkhina ang peiin lunginsietna chu ei kuom sengah pêk a nih.

⁸ Chuleichun, “Chung tienga a hang fe lai khan, Sal intânghai chu a ṭhuoi a; Mihriemhai kuoma khawm, Thilpêkhai a pêk a,” a ti chu.

⁹ (Chuongchun, “A hang fe,” ti hi, hnuoi hmun inhnuoitakahai a hung ṭum zet naw chun iengtin am ning a ta?

¹⁰ A hung ṭum kha, iengkim a suksip theina dinga, vân po po chung daia hang fe bawk kha a nih).

¹¹ Chuongchun, ṭhenkhathai chu tirko ni ding dâmin, ṭhenkhathai chu zâwlnei ni ding dâmin, ṭhenkhathai chu Chanchin Ṭha hriltu ni ding dâmin, ṭhenkhathai chu kohran châwmtu le inchûktirtuhai ni ding dâmin a pêk a:

¹² Krista taksa siem ṭha dinga, rawngbâwlna sin thawa, mi inthienghai sukfamkim dinga,

¹³ ringna le Pathien Naupa hrietna kawnga chun thukhat vuoa puitlinga, Krista famkimna lienzie tluka ei rênga ei hung um theina dingin.

¹⁴ Chuongchun, indiknawna zâwrna angin, var vervêka mihriem hlêm fâwmin, inchûktirna thli tinrênga khing tieng khing tienga vawr le lên lên naupang ni ta nâwm ei ni a,

¹⁵ hmangaia thu diktak hrilin, iengkimah amaah inṭhang lien thei lem ei tih; ama chu Lu a na, Krista chu.

¹⁶ Ama zârah taksa pumpui chun inzawmna tinrêng thaw leia inremtaka insuktuo le inzawm khâwmin, pêng tin sin thaw zie ang sengin, hmangainaa insiem ṭha dingin taksa chu a hung sukpung hlak a nih.

Hringna hlui le Kristaa hringna thar

¹⁷ Chuongchun, hi hi ka hrilin Lalpaa chun kân hriettir cheu a nih: Jentailhai chu lungril hmanglo puta an um angin um ta naw unla,

¹⁸ hrietnawna anniah a um, chu hrietnawna lei chun Pathien hringnaa inthawka ṭhea hung umin, an hrietnaa chun an hung inthim a nih; an lungril a ngawng leiin,

¹⁹ Chuonghai chun iengkhawm an inhriet thei ta naw leiin thil inthiengnaw tinrêng duâmtaka thaw dingin hurnaah an inpumpêk ta a.

²⁰ Nangni ruok chun chuong angin Krista chu in inchûk naw a;

²¹ a rawl chu in ngai ta a, ama inchûktirhai in ni angin Isua thutak um chu inchûktirin in um ta a.

²² Chuleiin, in tienlai umdân kawnga mihriem hlui, hlêmna châknaa se deu deu kha hlîp thla unla;

²³ in lungril thlaraua chun a tharin hung um unla,

²⁴ mihriem thar, felna le inthiengna indiktaka Pathien angpuia siem chun inthuom ro.

Hringna thar nun dân ding

²⁵ Chuongchun, khêl hril bânin mani vênghai kuomah thu indiktak hril seng ro; inpêngtuo seng ei ni si a.

²⁶ Lunginsen unla khawm a suol ruok chu suol naw ro; in lungsen chu nisain tlâkpui naw raw se:

²⁷ Diebol chu hmun inkien bawk naw ro.

²⁸ Inruhmang chun inru ta naw sien la, a tlasam kuoma pêk ding a nei theina dingin a kuta thil ṭha thawin inrim lem raw se.

²⁹ Thu ṭhanaw hrim in bauah suok naw sien la, a ṭul zie ang peia siem ṭha dingin thu ṭha suok lem raw se, a ngaituhai dingin lunginsietna a hung ni theina dingin.

³⁰ Chun, Pathien Thlarau Inthieng chu suklungngai naw ro, intlanna nia dingin amaa chun inchika in um kha.

³¹ Khâkna dâm, lunginsenna dâm, inngâwkna dâm, hrângna dâm, hrilsietna dâm po po bânsanin um raw se, suolna po po leh.

³² Chun, inlunginsiet tuoa, lainatna neiin um unla, Pathienin Kristaa a ngaidam ang bawk cheuin inngaidam tuo ro.