EPHESI 1 - Pathien Lekhabu Inthieng (BSI)

Chibai bûkna

¹ Paula, Pathien ditzâwnga Krista Isu tirko chun: Mi inthieng Ephesia um, Krista Isua mi ringumhai kuoma chun:

² Pathien ei Pa le Lalpa Isu Krista kuoma inthawka lunginsietna le inremna in kuomah um raw se.

Kristaa thlarau malsâwmnahai

³ Ei Lalpa Isu Krista Pathien le Pa chu inpâkin um raw se. Ama chun vân hmunhaia thlarau tieng malsâwmpêkna tinrêngin Kristaa chun mal a mi sâwm a.

⁴ Hmangainaa inthieng le, sawisêlboa ama hmaa ei um theina dingin leilung insieng hmain Kristaa chun a mi thlang a.

⁵ Ama lungdit, a lâwmzâwng angin Isu Krista zârah ama ta dinga naua siem dingin a mi lo ruot lâwk ta a,

⁶ a lunginsietna ropuizie chu Dittaka a thlâwna a mi pêk chu inpâk dingin.

⁷ A thisen leiin amaa chun ei intlanna ei nei a nih a lunginsietna hauzie ang peia ei bawsietnahai ngaidamna chu.

⁸ Chu lunginsietna chu amain vartak le remhretakin a mi vur a nih:

⁹ a ditzâwng thurûk, a lungnizâwngtaka amaa thaw a itum chu eini kuomah mîn hriettirin,

¹⁰ hunbi kim hunah: iengkim vâna thil umhai le hnuoia thil umhai khawm Kristaah, amaa ngei chun fâwkkhâwm dingin a nih.

¹¹ Ama ditzâwnga remruot ang peia iengkim thawtu tum anga ruot lâwk ni tain, amaa bawk chun a ro dinga siem kan nih,

¹² keini Krista lo beisei hmasatuhai hi a ropui inpâkna kan lo nina dingin.

¹³ Amaa chun nangni khawm thutak thu, in sandamna Chanchin Ṭha chu, in ngaia ring khawm in ring hnungin, amaa chun a ta in nih ti Thlarau Inthieng tiem chun inchika in um kha.

¹⁴ Chu chu Pathien ropuizie inpâkna dinga, ama ta ngeihai intlan suok phaa ei rohluona dinga zakhamna a nih.

Varna le hrietna dinga ṭawngṭaina

¹⁵ Chuleiin, kei khawma Lalpa Isu ringna nangnia um le, mi inthienghai po po chunga in inlangtir hlak hmangaina chu, ka lo hrietin,

¹⁶ ka ṭawngṭainaahai chun in hming lamin nangni leia lâwmthu hril ka ma nawh;

¹⁷ ei Lalpa Isu Krista Pathien, ropuina Pa chun, ama hrietna kawngah, varna le hriet chiengna thlarau a pêk theina ding cheuin.

¹⁸ Chuongchun, in lungril mithai sukvara umin hieng hi hung hre thei in tih:

¹⁹ ama kona beiseina dâm, mi inthienghaia chun a ro hluo ding ropui hauzie dâm, a thahrui hrâtna thaw zie ang peia, keini a ringtuhai tienga a thilthawtheina inkhi ruollova lien Krista chunga a thaw

^20-21 mithi laia inthawka a keitho lai le, inlalna dâm, thuneina dâm, thilthawtheina dâm, rorêlna po po dâm, hi khawvêla chau ni lova, khawvêl la hung tlung dinga khawma, hming sak tinrênghai chung daia vân hmunhaia a changtienga ân ṭhungtir laia kha.

²² Chun, thil tinrêng a ke hnuoiah a sie a, ama chu iengkim po po chunga lu dingin kohranhai kuoma chun a pêk a,

²³ kohran chu a taksa a nih, iengkim tinrênga suksiptu famkimna chu.