DÂN PAHNINA 9 - Pathien Lekhabu Inthieng (BSI)

¹ “Aw Israel mihai, ngai ta u, in nêka ropui le thilthawthei lem hnam, khawpui vân tawnga kul nei le ropuitakhai chu va hluo dingin tuhin Jordan chu in kai ding a ni ta a,

² mi lientak tak le insângtak tak in hriet ta sahai Anak thlahai, ‘Anak thlahai chu tuin am ngam ei ta?’ in ti hlakhai ram chu.

³ Chuleiin, Lalpa in Pathien chu mi kângbohmang mei anga in hmaa fe hlak chu a nih ti tuhin hre ro; ama chun anni chu sukbohmang a ta, suktlâwmpêk a ti cheu; chuongchun, Lalpain in kuoma a hril ta ang khan, anni chu hnawt suok in ta, sukbohmang vak el in tih.

⁴ Lalpa in Pathienin a hnawt suokpêk hnung cheu chun, ‘Ei felna leiin hi ram hi hluo dingin Lalpain a mi ṭhuoi lût a nih,’ in lungrilin ti dêr naw ro; hieng hnamhai hi an suol leiin a nih Lalpain a hnawt suokpêk ding cheu chu.

⁵ In fel leiin amanih, in lungril indik leiin amanih an ram chu in hluo ding a ni naw a, hieng hnamhai suol lei le Lalpa in pu Abraham hai, Isak hai, Jakob hai kuoma ân khâmna thu suknghet dingin Lalpa in Pathienin anni chu a hnawt suokpêk ding cheu a ni lem.

⁶ Chuleiin, hi ram ṭhatak hi in fel leia hluo dingin Lalpain a pêk cheu a ni nawh ti hre ro; hnam kâwmawtak in ni si a.

Horeb tlânga Israel helna

⁷ “Thlalêra Lalpa lung in suksen hlakziehai dâm kha hre zing unla, theinghil naw ro. Aigupta rama inthawka in suok nia inthawka hi hmun in hung tlung chen hin Lalpa chunga helhmang in nih.

⁸ Horeba khawm khan Lalpa lung in suksen a, sukbohmang hiel el ding cheuin Lalpa lung a sen a.

⁹ Lungphêk, in kuoma Lalpain thu a thlungna lungphêk la dinga tlânga ka hang fe lai khan ni sâwmli le zân sâwmli tlânga chun ka hang um a; bei khawm ka fâk naw a, tui khawm ka dâwn bawk nawh.

¹⁰ Lalpa chun lungphêk pahni, Pathien kutpâra ziek chu a mi pêk a; chutaka chun in pungkhâwm nia tlâng chunga meia inthawka Lalpain in kuoma thu a hrilhai po po kha a chuong vawng a.

¹¹ Ni sâwmli le zân sâwmli hnunga chun lungphêk pahni, thuthlungna lungphêk chu a mi pêk a.

¹² Lalpa chun ka kuomah, ‘Tho la, hi taka inthawk hin fe thla vat rawh, Aigupta rama i ṭhuoi suok i mihai chu an insuksiet zo ta khu; hraw dinga thu ka pêk kawnga inthawk chun an pêt ta pang el a, milim sung fâwm an ta dingin an siem el ta khu,’ a ti a.

¹³ “Chun, Lalpa chun, ‘Hieng mihai hi ka en rên rên a, hnam kâwmawtak an nih;

¹⁴ anni sukbohmang ding le vânkhuphnuoia inthawka an hming thaihmang dingin ka law law hang lâwng ka ta; chun, nangmaa inthawkin anni nêka hnam thilthawthei le ropui lem siem ka tih’, tiin a mi biek bawk a.

¹⁵ Chuongchun, tlânga inthawk chu ka hung thla a, tlâng chu a kâng ta a; thuthlungna lungphêk pahni chu ka kut khinghniin ka chawi a.

¹⁶ Chun, ka hei en a, Lalpa in Pathien chunga chun in lo suol ta a, bâwngte lim sungfâwm in ta dinga siemin, in siem a, Lalpain thu a pêk cheu lampuia inthawk chun in pêt hmang nghâl el tah ti ka hmu a.

¹⁷ Chun, lungphêk pahni chu ka dawm a, ka kut khinghnia inthawk chun ka pei a, in mithmua chun ka sukkawi a.

¹⁸ Chun, kha hmaa ka thaw ang khan ni sâwmli le zân sâwmli Lalpa hmaah ka bawkkhup a; Lalpa mithmua in suolna po po le a lung insuksenna dinga Lalpa mithmuah thil suol in thaw leiin bei khawm ka fâk naw a, tui khawm ka dâwn bawk nawh.

¹⁹ Nangni sukbohmang dinga Lalpa lunginsenna le a lungâwinawna nasatak chu ka ṭi si a. Nisienlakhawm, chu ṭum khawm chun Lalpain ka thu chu a mi ngaipêk a.

²⁰ Chun, Lalpa chu, Aron chunga chun a lunginsen hle a, sukbohmang a nuom hiel a; nisienlakhawm, chu huna chun Aron ta ding khawmin ka ṭawngṭai nghâl a.

²¹ In suolna leia in siem bâwngte lim chu ka lâk a, ka raw a, ka suknâwi a, pilvut angin ka râwtnawi dar a; a phit chu tlânga inthawka vadung hung luonga chun ka phul a.

²² “Taberaa dâm, Massaa dâm, Kibroth-hattaavaa dâm khawm Lalpa chu in suklungsen a.

²³ Chun, Lalpain, ‘Ram ka pêk cheu chu hang hluo ro’, tia Kadesbarneaa inthawka a tir lai cheu khan Lalpa in Pathien thupêk chu in helsan a, ama chu in ring naw a, a râwl khawm in ngai bawk naw a.

²⁴ Ka hriet tîr cheua inthawk tah Lalpa chunga hel hmang mi in ni hrim a.

²⁵ Chuongchun, Lalpain ‘Sukbohmang ka tih’ a ti cheu lei khan Lalpa hmaah ka bawkkhup a, ni sâwmli le zân sâwmli ka bawkkhup kha.

²⁶ Chun, Lalpa kuoma chun ka ṭawngṭai a, ‘Aw Lalpa PATHIEN, i ropuinaa în tlan, kut hrâttaka Aiguptaa inthawka în tlansuok, i mihai le i rochanhai chu sukbohmang naw rawh.

²⁷ I siehlaw Abraham hai, Isak hai, Jakob hai chu hre zing la, hieng mihai hi an kâwmaw zie dâm, an rîtlozie dâm, an suolziehai dâm ngaimaw naw rawh;

²⁸ chuong naw chun, i mi ṭhuoi suokna rama mihai chun, Lalpain a ram tiema chun a ṭhuoi thei naw leiin, thlalêra that dingin a ṭhuoi suok a nih, ti rawi an tih.

²⁹ I thilthawtheina ropuitak le i bân phara i ṭhuoi suok, i mihai le i rochanhai an ni tlat si a,’ ka ti a.