DÂN PAHNINA 7 - Pathien Lekhabu Inthieng (BSI)

Lalpa mi inthieng nina

¹ “Lalpa in Pathienin in va hluo ding rama a ṭhuoi lût cheu a, in hmaa hnam tamtak, Hit mihai, Girgas mihai, Amor mihai, Kanaan mihai, Periz mihai, Hiv mihai, Jebus mihai dâm, nangni nêka ropui le thilthawthei hnam sarihai a hnawt suok pha,

² in sukbohmang vawng ding a nih; anni le chun thu in thlung ding a ni naw a, in lunginsiet ding khawm a ni nawh.

³ Anni leh in innei pawl ding a ni nawh; in naunuhmeihai chu an naupasalhai in inneitir ding a ni naw a, an naunuhmeihai khawm in naupasalhai ta dingin in nei ding a ni bawk nawh.

⁴ In nauhai tuta mi zuituhai hi, pathien danghai rawngbâwl dingin ṭhuoikawiin um an ta; chun, Lalpa lunginsenna chu in chungah sukchawkin um a ta, sukbohmang vak el a ti cheu.

⁵ An chungah hieng ang hin in thaw lem ding a nih, an maichâmhai sukchim in ta, an lungphunhai suknâwi in ta, an Aserahai phûr in ta, an milim siemfâwmhai in raw vawng ding a nih.

⁶ Lalpa in Pathien ta dingin hnam inthieng in ni si a, leilunga hnam po poa inthawk ama chanpuol bîk ni dinga Lalpa in Pathienin a thlang cheu a nih.

⁷ “Hnam dang nêka in tam leiin Lalpain in chungah a hmangaina ân fûktir a, a thlang cheu a ni naw a; hnam po poa hnam tlâwm tak in nih in sawnnaw.

⁸ Lalpain a hmangai cheu a, in pi le puhai kuoma ṭawng a lo inkhâm chu hlen a nuom leiin a nih, Lalpa kut hrâttakin suoka in umna Aigupta ram lal Pharao kuta inthawka ân tlan suok cheu chu.

⁹ Chuleiin, Lalpa in Pathien chu Pathien a nih ti hre ro; Pathien ringum, ama hmangaia a thu zâwmtu chunga suon sâng chena thuthlung le lunginsietna innghat zing a,

¹⁰ ama theidatuhai sukbohmang dinga anni chung ngeia thung hlak a nih; ama theidatuhai chu riel sâwt naw ni a; anni chunga ngei thung a tih.

¹¹ Chuleiin, thupêk dâm, thuruot dâm, rorêl dâm, zâwm dinga vawisûna thu ka pêk cheu hi in zâwm ding a nih.

¹² “Hieng rorêlhai hi in ngai a, in zâwm a, in thaw leiin Lalpa in Pathienin in pi le puhai kuoma ṭawng inkhâma a thuthlung le a lunginsietna chu in chungah vawng zing a ta;

¹³ hmangai a ti cheu a, malsâwm a ti cheu a, sukpung a ti cheu a, pêk dinga in pi le puhai kuoma ân khâmna rama chun in rîla ra le in hnuoi ra khawm malsâwm bawk a tih, in bu dâm, in uoin dâm, in hriek dâm, in bâwngtehai le in berâmtehai khawm.

¹⁴ Hnam po po laia chun malsâwm ni bîk in ta, nangni lai a nuhmei a pasalin a ching hrim hrim um naw ni hai, in ran laia khawm.

¹⁵ Chun, Lalpa chun hri po po sukkiengpêk vawng a ti cheu a, in hriet ta hnung Aigupta ram hrihai chu in chungah inlêngtir naw ni a, a theidatuhai po po chungah inlêngtir lem a tih.

¹⁶ Lalpa in Pathienin a pêk ding cheu hnamhai po po chu in sukbohmang vawng ding a nih, in lunginsiet ding a ni naw a, an pathienhai rawng khawm in bâwl ding a ni nawh; in ta dingin châng a ni el ding a ni si a.

¹⁷ “In lungrilah ‘Hieng hnamhai hi ei ni nêkin an tam si a, iengtin am hnawt suok thei ei ta?’ in ti a ni chun anni chu ṭi naw ro.

¹⁸ Lalpa in Pathienin Pharao le Aigupta mi po po chunga thil a thawhai kha hre zing ro,

¹⁹ fiena nasatakin in mit ngeia in hmuhai, inchikna dâm, thilmak dâm, kut hrâttak dâm, bân phar dâma Lalpa in Pathienin a ṭhuoi suokna cheu kha; khâng ang khan Lalpa in Pathienin in mi ṭihai chunga chun thaw pei a tih.

²⁰ Lalpa in Pathien chun anni lai chun khuoingal tir nâwk nghâl a ta; a la dam, nangnia inthawka inbihmanghai chu an bohmang vawng chenin.

²¹ Anni chu in ṭi ding a ni nawh; Lalpa in Pathien nangni lai a um chu, Pathien ropuitak le ṭiumtak a ni si a.

²² Lalpa in Pathien chun chuong hnamhai chu damte tein hnawt suokpêk hret hret a ti cheu a; a sukbohmang vawng el nghâl ding a ni nawh, chuong naw chun ramsahai in pawi tâwk khawpin hung pung rawi an tih.

²³ An bohmang hma khat chu Lalpa in Pathienin anni pêng a ti cheu a, buoi namên lovin anni sukbuoi a tih.

²⁴ An lalhai chu in kutah pêng a ta, an hming chu vânkhuphnuoia inthawk hin in thaihmang dai ding a nih; in sukbohmang dêr chenin in hmaa ngîr thei tukhawm um hrim hrim naw ni hai.

²⁵ An Pathien lim siem fâwmhai chu in raw ding a nih, chutaka tangkaruo amanih, rângkachak amanih chu in inhnar ding a ni naw a; in ta dingin in lâk ding a ni bawk nawh, chuong naw chun inâwk el rawi in tih; Lalpa in Pathien ngaiin thil tirdakum an ni si a.

²⁶ In in sûngah thil tirdakum la lûtin chu thil ang chun ṭawngsephurah in insiem ding a ni nawh; tirdakum namên lova tirdakin in theida hle ding a nih, ṭawngsephur thil a ni si a.