DÂN PAHNINA 5 - Pathien Lekhabu Inthieng (BSI)

Thupêk sâwm

¹ Chun, Mosiein Israelhai po po chu a ko khâwm a, an kuomah, “Aw Israel mihai, in inchûka in pawm dinga dânhai, thuruothai, in na hrieta vawisûna ka hril hi lo ngai ro.

² Lalpa ei Pathienin Horeba chun ei kuomah thu a thlung a.

³ Lalpa chun hi thu hi ei pi le puhai kuoma khan a thlung naw a, eini tu chena dama la um po pohai kuoma ngei hin a nih, a thlung lem chu.

⁴ Lalpa chun tlângah meia inthawkin inhmatuoin a biek cheu a,

⁵ (chuonglai chun Lalpa thu khîkhmu ding cheuin Lalpa le in inkârah kei ka ngîr a; mei lei chun in ṭi si a, tlânga khawm chun in hang fe naw a.)

⁶ “Kei hi Lalpa i Pathien, Aigupta rama inthawka ṭhuoi suoktu che ka nih,.

⁷ “Keima naw chu Pathien dang hrim hrim i nei ding a ni nawh.

⁸ “Milim siem fâwm, chungtieng vâna mi amanih, hnuoitieng leihnuoia mi amanih, hnuoi hnuoitienga tuia mi amanih, a ieng angpui khawm i ta dingin i siem ding a ni nawh.

⁹ Chuong chu chibai i bûk ding a ni naw a, an rawng i bâwl ding a ni bawk nawh. Kei Lalpa i Pathien hi Pathien thîkthusie, pahai khawhlona leia nauhai hrem hlak, a mi theidatuhai chu suon thumna le suon lina chena hrem hlak,

¹⁰ mi hmangaia ka thupêkhai pawmtu sâng tamtakhai chunga ruok chu lunginsietna inlangtir hlak ka ni hi.

¹¹ “Lalpa i Pathien hming chu i sâm mei mei ding a ni nawh. Lalpa chun thiemlo inchangtir lovin ân suo âwm si naw a.

¹² “Lalpa i Pathienin thu a pêk ang chein châwlni chu inthieng zing dingin inser rawh.

¹³ Ni ruk sûng chun sin thâwng i ta, i sin po po chu i thaw ding a nih.

¹⁴ A ni sari ni ruok chu Lalpa i Pathien ta dinga châwlni a nih; chu ni chun sin hrim hrim i thaw ding a ni nawh, nangma khawma, i naupa khawma, i naunu khawma, i suokpa khawma, i suoknu khawma, i bâwngchal khawm, i sabengtung khawm, i ran a ieng khawma; i ina ram dang mihai khawmin; nangma ang bawka i suokpahai, i suoknuhai khawm an châwl theina dingin.

¹⁵ Nang khawm Aigupta rama khan suok i ni ta a, Lalpa i Pathienin chutaka inthawk chu kut hrâttak le bân phara a ṭhuoi suok che i nih ti hre zing rawh; chu lei chun a nih, Lalpa i Pathienin châwlni inser dinga thu a pêk che chu.

¹⁶ “Lalpa i Pathienin thu a pêk che angin i nu le i pa chawimawi rawh; chuongchun, Lalpain ram a pêk che a hin tluongtlung i ta, i dam sâwt ding a nih.

¹⁷ “Tuol i that ding a ni nawh.

¹⁸ “I uire ding a ni nawh.

¹⁹ “În rûk ding a ni nawh.

²⁰ “I vênghai chungah hrietpuina inkhêl i hril ding a ni nawh.

²¹ “I vênghai nuhmei chu în hnar ding a ni naw a, i vênghai in amanih, a lo amanih, a suokpa amanih, a suoknu amanih, a bâwngchal amanih, a sabengtung amanih, i vênghai thil a ieng iengkhawm în hnar ding a ni nawh,” tiin.

²² “Hieng thuhai hi, tlânga mei dâm, inthim dâm, inthim sâmup dâma inthawkin Lalpain rawl inringtakin in rênga pungkhâwmhai kuomah a hril a, a belsa nâwk chuong ta naw a. Chuong chu lungphêk pahniah a ziek a, a mi pêk a.

Mipuihai Ṭina

²³ “Chun, tlâng chu a kâng laia, inthima inthawka râwl chu in hang hriet chun, in mi hung hnai a, in hnam lusahai po po le in upahai le chun;

²⁴ ‘Ngai ta, Lalpa ei Pathien chun kan kuomah a ropuizie le a lienzie ân langtir a, meia inthawka a râwl chu kan hriet a; Pathienin mi a biek khawma thina a ni chuong nawzie chu vawisûn hin kan lo hriet ta a.

²⁵ Chuleiin, ieng dingin am thîng kan ta? Hi mei nasatak hin a mi kâng hmang el naw ding am a nih? Lalpa ei Pathien râwl chu kan hriet nâwk chun thi el kan tih.

²⁶ Meia inthawka Pathien hring râwl kan hriet anga hre vea dam si, taksa puthai po po lai tu am an um a?

²⁷ Nangin va hnai la, Lalpa ei Pathienin a hril ding po po chu nangin kan kuomah hril i ta; chuongchun, lo ngai kan ta kan zâwm ding annâwm,’ in ti a.

²⁸ Chun, in mi biek laia in thu hril chu Lalpain a lo hriet a, ‘Hieng mipuihai hin i kuoma thu an hril chu ka lo hriet a; an thu hril po po chu an hril dik ngawt el.

²⁹ Chuong ang lungril chu put hlak hai sien chu aw, mi ṭîng an ta, ka thupêkhai chu zâwm rawp an ta, anni le an nauhai khawm kumkhawtluongin an tluongtlung hle ding bah!

³⁰ Fe la, an kuomah, In puon inahai va fe phawt ro, ti rawh.

³¹ Nang ruok chu ka kâwlah ngîr la, hluo dinga ram ka pêka an pawm dinga i închûktir ding thupêk po po dâm, thuruothai dâm, rorêlhai dâm chu hril ka ti che,’ a ti a.

³² Chuleiin, Lalpa in Pathienin thu a pêk cheu anga thaw dingin fîmkhur ro; changtieng amanih, vawitieng amanih in pêt ding a ni nawh.

³³ In va hluo ding rama in um a, in ta dinga ṭhatna ding le in chêng sâwt theina dingin Lalpa in Pathienin thu a pêk cheu lampui chu in hraw tluonsuok ding a nih.