DÂN PAHNINA 4 - Pathien Lekhabu Inthieng (BSI)

Mosiein thuâwi dingin Israel ân fui

¹ “Khai le, Israel mihai, Lalpa in pi le puhai Pathienin ram a pêk cheu chu dama in hluo theina dinga in pawm dinga ka închûktir hlak cheu dânhai le rorêlhai chu lo ngai ta u.

² Lalpa in Pathien thupêk ka pêk cheu hi in pawm theina dingin, thu ka pêk cheu hi in belsa ding a ni naw a, in suktlâwm ding a ni bawk nawh.

³ Baal-peor leia Lalpa thilthaw chu in mitin a hmu a; Baal-peor betuhai po po chu Lalpa in Pathienin nangni laia inthawkin a sukbohmang a.

⁴ Lalpa in Pathien cheltu taphawthai ruok chu tu chen hin damin in la um seng a.

⁵ Ngai ta u, in va hluo ding rama khawm in zâwm pei dingin Lalpa ka Pathienin thu a mi pêk ang takin dânhai le rorêlhai chu kân chûktir cheu a.

⁶ Chuongchun, pawm unla zâwm ro; chu tak chu, hieng dân po po hi hre a, ‘Hi hnam ropuitak hi mi vartak le thil hre mi tak an ni phawt el,’ titu hnamhai mithmua chun in varna le thil hre mi in nina nîng a tih.

⁷ Ei ko taphawta Lalpa ei Pathienin a mi hnai anga anni hnai hlak pathien nei hnam ropui tu am an um ve a?

⁸ Hieng ang lâwma fel, dânhai le rorêlhai, tuta in hmaa ka zam po po ang dân nei hi hnam ropui dang tu am an um ve a?

⁹ Chuleiin, fîmkhur unla, nguntakin inenkawl phawt el ro, chuong naw chun, in mita in thil hmuhai chu theinghil in ta, in dam sûngin in lungrila inthawk chun bo hlau rawi a tih; in nauhai le in tuhai chen khawm inchûktir hlak ro.

Horeb tlânga Israel thil tuokhai suikîrna

¹⁰ “Horeb tlânga Lalpa in Pathien hmaa ngîr a, Lalpain ka kuomah, ‘Mipuihai chu mi ko khâwm pêk rawh, hnuoia an um sûng poa mi ṭi dân an inchûk theina dingin an nauhai inchûktir dingin ka thuhai lo inhriettir ka tih,’ a mi ti ni khawm kha theinghil rawi in tih.

¹¹ Chuongchun, in hung hnai a, tlâng bula chun in hung ngîr a, vânlaizâwl tawngin tlâng chu inthim dâm, sûm dâm, inthim sâmup dâm inumtirin a kâng ta a.

¹² Chun, Lalpa chun meia inthawk chun a hung biek cheu a, a thu hril chu in hriet a; nisienlakhawm, hmêlhmang iengkhawm in hmu naw a, râwl chau in hriet a nih.

¹³ A thuthlung zâwm dinga thu a pêk cheu, thupêk sâwm chu in kuomah a puong a, lungphêk pahniah a ziek a.

¹⁴ Chun, chuong lai chun hluo dinga in va kaina rama in zâwm dingin dânhai le rorêlhai inchûktir dingin Lalpain thu a mi pêk a.

Milim biek thua inṭhina

¹⁵ “Chuleiin, fîmkhur hle ro; Horeb tlânga meia inthawka Lalpain a hung biek ni cheu khan hmêlhmang iengkhawm in hmu si naw a;

¹⁶ milim dâm insiem fâwmin, insukse hlau rawi in tih, a chal ang amanih, a pui ang amanih,

¹⁷ hnuoia ran ang amanih, boruoka vuong hlak vate thla nei ang amanih,

¹⁸ hnuoia invâka invâk mi ang amanih, hnuoi hnuoia tuia nga laia mi ang amani hai chu.

¹⁹ Annawleh, vân tieng in hang ngha a, nisa dâm, thla dâm, arasi dâm, vân mi hai po po dâm in hang hmu a, Lalpa in Pathienin vânkhuphnuoia mi po po ta dinga a siempêkhai chun hîp a ti cheu a, bieng in ta, an rawng dâm bâwl khat rawi in tih.

²⁰ Lalpa chun a mihai, a ro ni dinga thîr rawtuinaa inthawk, Aigupta rama inthawk chun a ṭhuoi suok lem cheu a ni kha, tuta in ni ang hin.

²¹ Chuong chau khawm chu ni lovin, nangni leiin Lalpa chu ka chungah a lunginsen a, Jordan vadung chu ka kân naw a, in hluo dinga ram ṭhatak Lalpa in Pathienin a pêk cheua chun ka lût nawna dingin ân khâm bawk a.

²² Kei chu hi rama hin thi ding ka na, Jordan vadung chu ka kai naw ding a nih; nangni ruok chu kai in ta, chu ram ṭhatak chu hluong in tih.

²³ Fimkhur hle ro, chuong naw chun, Lalpa in Pathien thuthlung in kuoma a thlung chu theinghil rawi in ta, Lalpa in Pathienin ieng angpui khawma siem a phal naw milimhai dâm insiem fâwm pal rawi in tih.

²⁴ Lalpa in Pathien chu kâng bohmang mei, thîkthusetak Pathien a ni si a.

²⁵ “Tu le tehai in hung nei a, chu rama sâwt rei in um hnunga, in insukkhawhlo a, ieng amanih angpui dâma milim siem fâwmhai in indin a, a lung suksen dinga Lalpa in Pathien mithmua thil ṭha naw in thaw vai chun;

²⁶ Jordan kâna in va hluo ding rama inthawk chun bohmang vak el in tih, ti in chungchâng thua a mi hrietpuitu dingin tuhin hnuoi le vân ka fiel a nih, chêng sâwt naw ti niu a, bohmang vawng el in tih.

²⁷ Lalpa chun hnam tin lai chun sukdar a ti cheu a, Lalpain ân fe hmangtirna cheu hnamhai lai chun tlâwmte chauin um in tih.

²⁸ Chutaka chun pathien, thing le lunga mihriem isiem, hmu thei lo, fa thei lo, rim khawm hre thei hlei lohai chu bieng in ta.

²⁹ Nisienla khawm, chutaka khawm chun Lalpa in Pathien chu in zawng a, in lungril po po le in lungvar po poa in zawng chun hmu nâwk in tih.

³⁰ Rinuma in uma, in chunga chuong thilhai po po chu a hung tlung pha chun a tâwp a tâwpa chun Lalpa in Pathien tieng chu ngha kîr nâwk in ta, a thu chu pawm tâng in tih.

³¹ Lalpa in Pathien chu zângai theitak Pathien a ni si a; thlâthlam naw ni cheu a, sukbohmang naw bawk a ti cheu a, in pi le puhai kuoma inkhâma a thutiem chu theinghil naw bawk a tih.

³² “In pieng hma, kha hma tieng kha hang ngaituo unla, leihnuoia Pathienin mihriem a siema inthawk vânkhuphnuoia hieng anga thil ropui hi a um hlakin, hriet khawm a ni hrim hlak am chu?

³³ Nangnîn meia inthawka Pathien râwl in hriet a, in la dam zing ang hin, mihaiin pathien râwl an hriet hlak am a ni?

³⁴ Hnam dang laia inthawka fiena dâm, inchikna dâm, thilmak dâm, indona dâm, kut hrâttak dâm, bân phar dâm, thil râpthlâkhaia Lalpa in Pathienin in mithmua Aigupta rama a thaw hlak ang po poa hnam ṭhuoi suok ngam pathien an um hlak am chu?

³⁵ Lalpa chu Pathien a nih ti in hriet theina dingin in kuoma suklang a na; ama naw chu a dang hrim an um nawh.

³⁶ Ân chûktir theina ding cheuin vâna inthawkin a râwl a hung inhriettir cheu a, hnuoi chunga hin a meipui chu ân hmutir cheu a, meia inthawkin a thu chu in lo hriet a.

³⁷ In pi le puhai chu a hmangai leiin an hnungah an thlahai chu a thlang cheu a, ama ṭhangin a thilthawtheina ropuitakin Aigupta rama inthawk chun a ṭhuoi suok cheu a;

³⁸ hnam dang nangni nêka ropui le thilthawthei lem hnawt suokpêk cheua an ram chu hluo dinga ân lûttir theina ding cheuin; tuta in ni ang tak hin.

³⁹ Chuleiin, tuhin in lungrilah vawng unla, chungtieng vâna le hnuoitieng leihnuoia hin Lalpa chu Pathien a nih ti hre ro; a dang hrim an um nawh.

⁴⁰ Kumkhuoa dinga Lalpa in Pathienin a pêk cheu rama chun nangni le in thlahai ta dinga ṭha le in chêng sâwt theina dinga thuruothai le thupêkhai, tuta ka pêk cheu hi in zâwm ding a nih,” ti hi.

Jordan suotienga insanhimna khawpuihai

⁴¹ Chun, Mosie chun suotieng pangah khuo pathum Jordan râlah a ruot a,

⁴² tuolthattu a tuolbâwmhai, kha hma khawma theida chuong lo that paltu tlânna dingin; chuong khuo, a ienga khawm a tlân chun him a tih.

⁴³ Chuonghai chu Reubenhai puola thlalêra tlâng zâwla Bezer dâm, Gad mihai puola Gileada Ramoth dâm, Manasse mihai puola Basana Golan dâm an nih.

Dân hrilnawnna thuhma

⁴⁴ Hi hi Mosiein Israel thlahai dân a pêk chu a nih;

⁴⁵ Aigupta rama inthawka an hung suok laia Mosieinn Israel thlahai kuoma inhriettirna dâm, dân dâm, rorêl dâm a hril chu a nih;

⁴⁶ Jordan râla Mosie le Israel thlahaiin Aigupta rama inthawka an hung suok laia an that, Hesbona um Ammon mihai lal Sihon rama Beth-peor zâwn ruoma khan:

⁴⁷ A ram le Basan lal Og ram, nisa suokna tienga Amor mihai lal pahni ram chu an hluo a,

⁴⁸ Arnon ruom sîra Ariera inthawka Sion tlâng (Hermon an ti bawk) chen le

⁴⁹ Jordan râl saktieng pang Araba po po, Pisga pangpêr hnuoia Araba tuipui chenin.