DÂN PAHNINA 3 - Pathien Lekhabu Inthieng (BSI)

Israelin Basan lal Og a tukdei

¹ “Chuongchun, ei insawn a, Basan lampuiah ei fe a, Basan lal Og le a mihai po po chu Edreia mi thaw dingin an hung inthawk a.

² Chun, Lalpain ka kuomah, ‘Ama chu ṭi naw rawh, ama le a mihai po po le a ram chu i kutah ka pêk diem tah a nih; Hesbona um Amor mihai lal Sihon chunga i thaw ang khan a chungah i thaw ding a nih,’ a ti a.

³ Chuongchun, Lalpa ei Pathien chun Basan lal Og khawm a mihai po po leh ei kutah a pêk a; chuongchun, pakhat bêk khawm hlapêk lovin ei that a.

⁴ Chu ṭum chun a khuo po po, khuo sâwmruk, Basana Og ram Argob ram po po chu ei lâk vawng a; ei lâkpêk naw khuo pakhat bêk khawm a um nawh.

⁵ Hieng khuo po po hi kul insângtak tak, kawtkhâr le kalna nei vawng an nih, kul nei lo khuo tamtak tiem lo khawma.

⁶ Hesbon lal Sihon chunga ei thaw ang khan ei sukbohmang vawng a, khuo po po chu ei sukbohmang vawng a, pasal, nuhmei le an naupanghai chenin ei sukbohmang vawng a.

⁷ Amiruokchu, ran po po le, khuoa râllâka ei lâk thilhai chu ei chanpuol dingin ei lâk a.

⁸ Chu ṭum chun Jordan râla um Amor mihai lal pahni kuta inthawk chun Arnon ruoma inthawka Hermon tlâng chenin ei lâk a;

⁹ (chu Hermon chu Zidon mihai chun Sirion an ti a, Amor mihai chun Senir an ti thung a.)

¹⁰ Phai ram khuo po po le Gilead ram po po le Basan ram po po leh, Basan rama Og ram khuo, Saleka le Edrei chenin ei lâk a.

¹¹ (Basan lal Og chau a nih, Repha mihai laia la um sun chu; a khum chu thîr a na, Ammon thlahai khuo Rabaa chun a la um zing a ni naw am a nih? Mihriem tawnga inkhiin a dungtieng tawng kuo, a khangtieng tawng li a nih.)

Reuben hnam le Gad hnam le Manasse hnam zâtvein Jordan suotieng an del

¹² “Chu ṭum chun, chu ram chu ei hluo a; Arnon ruom kâwla Aroera inthawkin Gilead tlâng ram chenve chenin, chutaka khaw umhai leh, Reuben mihai le Gad mihai ka pêk a;

¹³ Gilead ram la um po le Og ram Basan po po chu Manasse hnam zâtvehai ka pêk a; Argob ram po po le Basan ram po po chu. (Hi hi Repha mihai ram an ti bawk hlak a.

¹⁴ Manasse naupa Jair chun Argob ram po po Gesur mihai le Maakat mihai ram chenin a lâk a; chuongchun, Basan chu, ama hming chawiin Havot-Jair a ta, tu chen hin an la ti zing.)

¹⁵ Chun, Gilead ram chu Makir ka pêk a.

¹⁶ Chun, Reuben mihai le Gad mihai chu Gileada inthawka Arnon ruom, ruom laitak chenin an ram chin dingin ka pêk a, Ammon thlahai ramri, Jabbok vadung chenin;

¹⁷ chun, Araba le Jordan khawm ramri dingin Kinneretha inthawkin Pisga saktieng pangpêr hnuoia Tuipui Thi, Araba Tuipui chenin.

¹⁸ “Chun, chuong lai chun ‘Lalpa in Pathienin in chanpuol dingin hi ram hi a pêk cheu a nih, Israel thla, in unauhai hmaah in mi huoisenhai po po chu inrâlthuomin hang fe ve raw hai seh.

¹⁹ Amiruokchu, in nuhmeihai, in nauhai le in ranhai (ran in hau ti ka hriet a) chu khuo ka pêk cheu a khan um raw hai seh;

²⁰ nangni anga in unauhai chu Lalpain râlmuonga a siem hma le Lalpa in Pathienin Jordan râla ram a pêk chu an hluo ve hmakhat chun; chuongchun, in puol seng dinga ka pêk seng cheua hin in hung nâwk seng ding annâwm,’ tiin thu ka pêk cheu a.

²¹ Chun, chuong lai bawk chun Josua chu, ‘Lalpa in Pathienin chuong lal pahnihai chunga thil a thawhai po po chu i mitin a hmu vawng a, chuong ang tak bawk chun i lûtna ding ram po pohai chungah Lalpa chun thâwng a tih.

²² Anni chu ṭi naw unla; a thawpuitu cheu chu Lalpa in Pathien a ni si a,’ tiin thu ka pêk a.

Mosie Kanaan a lût phal a ni nawh

²³ “Chu lai huna chun Lalpa chu nasatakin ka ngên a,

²⁴ ‘Aw Lalpa PATHIEN, i siehlaw kuoma hin i ropuizie le i kut hrâttak chu în langtir phawt chu a ni ta a; vâna manih, hnuoia hin amanih, i thilthaw ang le i thilthaw ropuitak ang hi thaw thei pathien tu am an um a?

²⁵ Mîn kaitir la, Jordan râla ram ṭhatak, chu tlâng mâwitak le Leba- non chu mîn hmutir raw khai,’ tiin.

²⁶ Nisienlakhawm, nangni leiin Lalpa chu ka chungah a lunginsen hle a; ka thu chu a pawm naw a, chuongchun, Lalpa chun, ‘Hun ta raw se, hi thua hin mi be nâwk ta naw rawh.

²⁷ Pisga tlâng sîpah hang chuong la, thlangtienga dâm, hmârtienga dâm, simtienga dâm i mit hang inlên la, hang thlîr rawh; Jordan hi i kân naw ding a ni si a.

²⁸ Amiruokchu, Josua hi thu pe la, infui ṭha la, sukhrât rawh, hieng mipuihai hi a ṭhuoikai ding a na, i hang hmu ding ram chu ân hluotir ding a nih,’ a mi ti a.

²⁹ Chuongchun, Beth-peor ruoma khan ei um tah a ni kha.