DÂN PAHNINA 2 - Pathien Lekhabu Inthieng (BSI)

Thlalêra um lai hunhai

¹ “Chun, ei insawn a, Lalpain ka kuoma a hril angin Tuipui Sen tieng Thlalêrah ei lût a; Seir tlâng chu sâwt rei ei vêl a.

² Chun, Lalpa chun a mi biek a, ka kuomah,

³ ‘Hi tlâng hi in vêl sâwt tâwk ta a, hmartieng panin insawn ta ro.

⁴ Mipuihai chu Seir tlânga um Esau thla in unauhai ramah in fe thleng ding a nih. Anni chun lo ṭîng an ti cheu; chuleiin, fimkhur hle ro.

⁵ Anni chu thaw naw ro. An ram chu a khâwlai khawm kephaa sir khawp chau khawm ka pêk naw ding cheu a nih; Seir tlâng chu ama chanpuol dingin Esau ka pêk tah a nih.

⁶ An buhai chu in fâk dingin sumin inchâwng in ta; an tuihai chu in dâwn dingin sumin in inchâwk bawk ding a nih.

⁷ Lalpa in Pathien chun in thaw taphawthaia chun mal a sâwm hlak cheu a, hi thlalêr lientak hi in fe thleng dân dâm chu a hriet si a; hieng kum sâwmli sûng po hin Lalpa chu in kuomah a um a, iengkhawm in tlasam naw kha, tiin thu pe rawh,’ tiin.

⁸ Chuongchun, Elath le Eziongebera inthawkin Araba lampuia fein, Seir tlânga um Esau thla ei unauhai ram ei fe thleng a. Chun, ei insawn a, Moab thlalêr tieng ei fe a.

⁹ Chun, Lalpain ka kuoma, ‘Moab mihai chu sukbuoi naw unla, râl thawin thaw naw ro; an ram chu in puola dingin ka pêk naw ding cheu a nih, Lota thlahai puolah Ar chu ka pêk tah a nih.

¹⁰ (Kha hma khan chu Anak mihai anga mi lien le tam le mi insângtak tak Em mihai an um hlak a;

¹¹ chuonghai khawm chu Anak mihai ang bawka Repha mihai ti an na; nisienlakhawm, Moab mihai chun Em mihai an ti hlak a nih.

¹² Kha hma khan chu Seir tlânga hin Hor mihai khawm an um bawk hlak a; nisienlakhawm, Esau thlahai hin an hluopêk a, an that a, an hmuna chun an um ta a; Israelhaiin Lalpain an puola ram a pêk chunga an thaw ang khan).

¹³ Chuongchun, Tho unla, Zered vadung chu kân ro khai,’ a ta. Chuong- chun, Zered vadung chu ei kân ta a.

¹⁴ Kades-barneaa inthawka ei suok le Zered vadung ei kân a, Lalpain an kuoma ân khâm anga mipuihai laia chu suona râlkâp mi po po an bohmang vawng inkâr chu kum sâwmthum pariet a nih.

¹⁵ Mipuihai laia inthawka an bohmang dêr hmakhat chun anni chu sukbohmang dingin Lalpa kutin a tai zing bawk a.

¹⁶ “Chuong anga mipuihai laia inthawka râlkâp mi po po an bohmang vawng a, an hung thi zo hnung chun,

¹⁷ Lalpain a mi biek a,

¹⁸ ‘Vawisûn hin Moab ram Ar chu i fe thleng ding a na;

¹⁹ chun, Ammon thlahai ep i va tlung hnai pha khawm sukbuoi naw la, thaw bawk naw rawh; Ammon mihai ram chu i puolah ka pêk naw ding che a nih; Lota thlahai puolah ka pêk tah a nih.

²⁰ (Chu khawm chu Repha mihai rama ngai a ni bawk; chutaka chun kha hma khan Repha mihai chu an um hlak a; nisienlakhawm, Ammon mihai chun Zamzum mihai an ti hlak a nih.

²¹ Anak mihai anga mi lien le tam le mi insângtak tak an nih; nisienlakhawm, Lalpain a sukbohmangpêk a, an hluo ve ta thung a, an hmuna chun an um ta a;

²² Seir tlânga um Esau thlahai chu Hor mihai a sukbohmang laia a thaw ang khan; chuongchun, an hluo ve ta thung a, an hmuna chun tu chen hin an um ta a;

²³ chun, Gaza chena khaw chînhaia um Av mihai chu Kaphtora inthawka hung suok Kaphtor mihai vêk chun an sukbohmang a, an hmuna chun an um ta a.)

²⁴ Tho unla, fe suok unla, Arnon ruom kân ro; ngai ta u, Amor mi Hesbon lal Sihon le a ram chu ka pêk ta cheu a nih; hluo phawt unla, râl thawin va thaw ro.

²⁵ Vawisûn hin vânkhuphnuoia hnam tin chunga chun nangma ṭina le ṭitumna in um ṭantir ka ta, i chanchin lo hrieng an ta, inthin an ta, nangma leiin lungngaitakin um an tih,’ tiin.

Israelin Sihon a tukdei

²⁶ “Chun, Kedemoth thlalêra inthawkin Hesbon lal Sihon kuomah inremna thu chawiin mihai ka tir a,

²⁷ ‘I rama hin mîn fe thlengtir raw khai; lamliena pei fêng ka ta, changtieng amanih, vawitieng amani khawm pêt naw ningah.

²⁸ Ka fâk dingin bu sumin mîn chawktir i ta; ka dâwn dingin tui khawm sumin mîn chawktir i ta; mîn fe thlengtir ringawt el rawh;

²⁹ Jordan ka kân a, Lalpa kan Pathienin a mi pêk ram lût hmakhata Seir tlânga um Esau thlahai le Ar-a um Moab mihai mi thaw ang khan,’ tiin.

³⁰ Nisienlakhawm, Hesbon lal Sihon chun a rama chun a mîn fe thlengtir phal naw a; Lalpa in Pathien chun vawisûna anga in kuta a pêk theina ding cheuin a lungril a sukngarpêk a, a suklulul a nih.

³¹ Chun, Lalpain ka kuomah, ‘Ngai ta, Sihon le a ram chu ka pêk ta ding che a nih, a ram chu nei dingin hluo phawt el rawh,’ a mi ti a.

³² Chuongchun, Sihon le a mihai po po chu Jahaz-ah a mi thaw dingin an hung inthawk a.

³³ Chun, Lalpa ei Pathien chun a mi pêk a; chuongchun, ama le a naupasalhai le a mihai po po chu ei that a.

³⁴ Chu ṭum chun a khuohai po po chu ei lâk a, chuong khuoa pasal po po, nuhmei le an nauhai leh ei sukbohmang vawng a, hla hrim hrim ei nei nawh.

³⁵ Ei lâk khuoa râllâka ei lâk thil le ranhai chau ei chan dingin ei lâk a nih.

³⁶ Arnon ruom sîra Aroera inthawk le ruoma khaw uma inthawka Gilead chenin ei ta dingin insâng taluo khuo hrim a um dêr naw a, Lalpa ei Pathien mi pêk vawng a nih.

³⁷ Ammon thlahai ram chau in hnai naw a nih, Jabbok vadung râl khingtieng pang po po le tlâng rama khuohai le Lalpa ei Pathienin a mi khapna taphawthai leh.