DÂN PAHNINA 10 - Pathien Lekhabu Inthieng (BSI)

Lungphêk siem nâwk thu

¹ “Chuong lai chun Lalpain ka kuomah, ‘Lungphêk pahni a hmaa mi ang kha sut nâwk la, tlângah ka kuomah hung la, thingin bâwm siem rawh.

² Chun, kha hmaa lungphêk i sukkawi tahaia thu chuong kha lungphêkahai chun ziek ka ta; bâwma chun sieng i tih,’ a ta.

³ Chuongchun, Sittim thingin bâwm chu ka siem a, a hmaa mi ang lungphêk pahni chu ka sut bawk a, lungphêk pahni chu chawiin tlânga chun ka hang fe a.

⁴ Chun, lungphêkhaia chun a hmasaa ziek ang, in pungkhâwm nia tlânga meia inthawka Lalpain in kuoma a hril thupêk chu a ziek a, Lalpa chun a mi pêk a.

⁵ Chun, tlânga inthawk chun ka hung thla a, lungphêk chu ka bâwm siema chun ka sie a; Lalpain thu a mi pêk angin chutaka chun a um ta zing a.

⁶ (Chun, Israel mihai chu Beeroth Bene-Jaakana inthawkin Mosera-ah an fe a; chutaka chun Aron chu a thi a, an phûm a, chun, a naupa Eleazarin a aiawin thiempu sin a thaw a.

⁷ Chutaka inthawk chun Gudgodaah an fe a, chun, Gudgodaa inthawk chun vadunghai ram Jotbathaah an fe a.

⁸ Chuong lai chun tu chena Lalpa thuthlung bâwm zâwn a, Lalpa hmaa a rawng bâwl a, a hminga malsâwmpêktu ni dingin Levi chi chu a suktum a.

⁹ Chuleiin, Levi chun a unauhai lai chun chanvo khawm, rochan khawm a nei naw a; Lalpa in Pathienin a kuoma a hril angin Lalpa chu a rochan a nih).

¹⁰ Chun, a hma ang bawk khan tlânga chun ni sâwmli le zân sâwmli ka um a; chun, chu ṭum khawm chun Lalpain ka thu chu a ngai a, Lalpa chun a sukbohmang nuom ta naw cheu a ni kha.

¹¹ Chun, Lalpain ka kuomah, ‘Tho la, mipuihai hma ṭhuoi rawh; anni pêk dinga an pi le puhai kuoma inkhâma ka tiem ram chu an hluo ding a nih,’ a ti a.

Pathienin a ngiet chu

¹² “Khai le, Israel mihai, nangnia inthawka Lalpa in Pathienin a phût chu ieng dang khawm a ni naw a, in ṭhatna dinga Lalpa in Pathien in ṭi a, a lampui po po chu hraw a, ama hmangai a, in lungril po po le in lungvar po poa Lalpa in Pathien rawng bâwl a,

¹³ Lalpa thupêkhai, a thuruothai, zâwm dinga tuta thu ka pêk cheu pawm hi a nih.

¹⁴ Ngai ta u, vân dâm, vânhai vân le, hnuoi le a sûnga um po po hi Lalpa in Pathien ta vawng a nih.

¹⁵ Nisienlakhawm, in pi le puhai hmangai chu a lâwm zâwng a na, hnam dang po po nêkin nangni, an hnunga an thlahai hi a lo thlang ta cheu a nih, tuta in ni ang hin.

¹⁶ Chuleiin, in lungril ser chu tan unla, kâwmaw ta naw ro.

¹⁷ Lalpa in Pathien chu pathien-hai Pathien, hotuhai Hotu, Pathien ropuitak, hrâttak, ṭiumtak el, tukhawm ditsak bîk nei lo, thamna khawm la ngai lo a ni si a.

¹⁸ Pa nei nawhai le hmeithaihai chu feltakin ro a rêlpêk hlak a; ram dang mihai chu, fâk ding le silfênhai pein a hmangai hlak.

¹⁹ Chuleiin, ram dang mihai chu hmangai ve ro; nangni khawm Aigupta rama khan ram dang mi in ni kha.

²⁰ Lalpa in Pathien chu ṭîng in ta, ama rawng chu bâwl in ta, ama chu chel tlat in ta, a hming sâlin in inkhâm ding a nih.

²¹ Ama chu in inpâk ding chu a na, hieng in mita in hmu tah thil ropuitak le râpthlâktakhai thawpêk hlak cheu in Pathien a nih.

²² In pi le puhai chu Aiguptaah sâwmsari an fe thla a; tuhin chu tam tienga chun vâna arasi zâtin Lalpa in Pathienin a sukpung ta cheu a nih.