DANIEL 7 - Pathien Lekhabu Inthieng (BSI)

Danielin sahrâng pali a hmu thu

¹ Babulon lal Belsazzar inlal kum khatnaa chun Daniel chun mang neiin a khum chunga chun a lua thil hmulâwkhai chu a hmu tah a; chun, mang chu a ziek a, chuong thilhai umzie chu a hril bawk a.

² Daniel chun a hril a, “Zâna hin ka thil hmulâwkna chun, ngai ta, vân thli hai pali chu tuipui lien chunga an hrâng hi ka hmu a.

³ tuipuia inthawk chun sahrâng pali, danglam seng hi an hung suok a.

⁴ A hmasatak chu sakeibaknei ang a na, mupui thlahai a nei a; a thlahai chu sukthlawnga uma, hnuoia inthawka dawm kânga uma, mihriem anga ke pahnia inngîrtir a hung na, mihriem lungril a kuoma pêk a ni chen chun ka en zing a.

⁵ Chun, ngai ta, sahrâng dang, a pahnina chu, savawm ang, a khingkhata indawm kâng a na, a baua a hahai kârah chun nâkru pathum a um a; chun a kuoma chun, ‘Tho la, taksa tamtak fa zo vawng rawh,’ an ta.

⁶ Hi hnunga hin, ngai ta, a dang keitê ang, a ruongzânga vate thlahai ang thla pali nei chu ka hmu a; chu sahrâng chun lu pali khawm a nei bawk a, a kuoma chun rorêlna chu pêk a ni ta a.

⁷ Hi hnunga hin zâna thil hmulâwkhai chu ka hmu a, sahrâng palina chu, ngai ta, hrât êm êm el, thilthawtheitak, ṭiumtak el hi a na; thîr ha ropuitakhai chu a nei a; a fâk zo a, a suknâwi a, a mahlahai chu a kehaiin a sirde a, a hmaa sahrânghai po poa inthawk khan danglamtak a na; chun, ki sâwm a nei bawk a.

⁸ Kihai chu ka ngaituo a; chun, ngai ta, anni lai chun ki dang, ki chitê hi a hung suok a, chu hmaa chun ki hmasa pathumhai kha an zung chena phawi dawkin an um tah a; chun, ngai ta, chu kia chun mihriem mithai ang mithai le, bau chapotaka ṭawngsuok chu a um bawk a.

⁹ Ka en zing a. Lalṭhungphahai dâwin a um a, Tienlai mi pakhat hi a hung ṭhung tah a, A silfên chu vûr angin a vâr a, A lua sam chu sahmul inthiengtak ang a nih. A lalṭhungpha chu meichawk ṭiumtak a na, A kekuolhai chu meichawklai a nih.

¹⁰ Chun, tuihnâr ṭiumtak a hung suok a, A hma bula inthawk chun a hung suok a, Sâng sânga sângin a rawng an bâwl a, Sang sâwm sâwma vawi sâng sâwm a hmaa chun an ngîr a; Rorêlna chu ṭan a ni tah a, Lekhabuhai chu hawngin a um ta a.

¹¹ “Chu kiin thu ropuitakhai a hrilna râwlri lei chun chu lai chun ka en zing a; sahrâng chu thatin a um a, a taksa chu suksietin a um a, meia raw dinga pêka a um chen chun ka en zing a.

¹² Chun, sahrâng danghai ruok kha chu, an ram chu lâkpêk an ni tah a; nisienlakhawm, an hringnahai ruok chu hunbi khat le hun khat chenin suksei a nih.

¹³ Zâna thil hmulâwkhai ka hmu a, chun, ngai ta, Mi pakhat mihriem naupa ni âwm tak vân sûmhai le um a hung a, Tienlai mi kuoma ngei chun a hung a, Ama hmaa chun an hung ṭhuoi a.

¹⁴ Chun, ama chu mi po po le hnam po po le ṭawng tinrêngin, A rawng an bâwl theina dingin a kuoma chun Rorêlna dâm, ropuina dâm, lalram dâm an pêk a, A lalram chu chatuon lalram bo ta ngailo ding le, A ram suksieta um ta ngailo ding chu a nih.

¹⁵ “Kei Daniel ruok chu, ka taksa sûnga chun ka lungril chu suknatin a um a, ka lua thil hmulâwkhai chun an mi suklungzîng hle a.

¹⁶ Ka kâwla ngîrhai laia pakhat kuom chu ka hung hnai a, hi po po chungthua thudik chu kân dawn ta a. Chuongchun, ama chun a mi hril a, thil umziehai chu a mîn hriettir ta a.

¹⁷ ‘Hieng sahrâng pali hi, lal pali hnuoi chunga la hung suok dinghai chu an nih.

¹⁸ Nisienlakhawm, Achunghnungtak mi inthienghai chun ram chu chang an ta, chatuon, chatuon chenin ram chu nei an tih,’ tiin.

¹⁹ “Chun, sahrâng palina, a danghai nêka danglam bîk, ṭiumtak, a hahai thîr nia, a tinhai chu dârsen nia, fa zo vawng a, suknâwi a, a mahla chu a kehaia sirdetu chungthua thudik chu hriet ka nuom tah a,

²⁰ chun, a lua ki sâwmhai le, ki dang hung suoka, a hmaa pathumhai chu thlawnga uma, chu ki mithai nei le, bau chapotaka ṭawngsuokna le, a hmêlputzie a ruolhai nêka ropui lem chungthu chu hriet ka nuom a.

²¹ Ka en zing a, chu ki chun mi inthienghai le chun indona a siem a, anni chu a hne ta a.

²² Tienlai mi chu a hung a, Achunghnungtak mi inthienghai chu rorêlna chu a pêk a, mi inthienghaiin ram chu an chang hun a tlung hmakhat chun.

²³ Chun, ama chun a hril a, ‘Sahrâng palina chu hnuoi chunga ram palina, ram dang po poa inthawka danglam tak ding, hnuoi po po chu lem zo a, sirde a, a suknâwia suknâwitu ding chu a nih.

²⁴ Chun, ki sâwm chungthua chu: hi rama inthawk hin lal sâwm hung suok an ta, anni hnungah pakhat dang suok pei a ta; a hmaahai nêk chun danglam a ta, lal pathum chu suktlâwm a tih.

²⁵ Achunghnungtak chu kalin thu hril a ta, Achunghnungtak mi inthienghai chu hung suksieng a tih: chun, hunhai le dân chu sukdanglam dingin ngaituong a ta, hun khat le hunhai le hun chenve sûng chu a kuta pêk nîng an tih.

²⁶ Nisienlakhawm, rorêlna chu um a ta, a tâwp chena suksiet a, sukbohmang dingin a ram chu lâkpêk an tih.

²⁷ Chun, vânhnuoia ram le lalram le ram ropuinahai chu Achunghnungtak mi inthienghai hnam kuoma chun pêk nîng a ta, ama ram chu chatuon ram a na, ram po pohai chun a rawng bâwl an ta, ama thu awi an tih,’ tiin.

²⁸ “Hi hi thu tâwpna chu a ni a; kei Daniel ta ding chun ka ngaituonahai chun a mi sukbuoi hle a, ka hmêlputziehai chu a hung danglam a; nisienlakhawm, chu thil chu ka lungrilah ka vawng zing a,”tiin.