DANIEL 5 - Pathien Lekhabu Inthieng (BSI)

Banga kutziek chu

¹ Lal Belsazzar chun a lalhai sâng khat ta dingin ruoi ropuitak a ṭhe a, sâng khat hmaa chun uoin a dâwn ta a.

² Belsazzar chun uoin chu a hang dâwn chun, lal le a lalhai le a nuhmeihai le, a thaikêmhai chun an dâwnna dingin, a pa Nebukadnezzarin Jerusalem Templea inthawka a lâk, rângkachak le tangkaruo bûr le bêlhai chu hung la dingin thu a pêk ta a.

³ Chun, Jerusalema Pathien in Templea rângkachak bûr le bêl an lâk tahai chu an hung lâk ta a; lal le a lalhai le, a nuhmeihai le a thaikêmhai chun chuonga chun uoin an dâwn ta a.

⁴ Uoin chu an hang dâwn a, rângkachak dâm, tangka dâm, dârsen dâm, thîr dâm, thing dâm, lung dâm pathienhai chu an inpâk ta a.

⁵ chun, chu dâr ma chun mihriem kut kutpârhai a hung suok a, lal in bang nâl vâr chunga chun sathâu khâwnvar sana chun a ziek ta a; chun, lal chun chu kut bawng, chu hung ziektu chu a hmu a.

⁶ Chun, lal hmêlput dân chu a hung danglam a, a ngaituonahai chun ama a sukbuoi ta a; a kâwngru insuktuoknahai chu a hung inthâwt a, a khûp le khûp chu an invuoktuo ta a.

⁷ Chun, aisânthiemhai, Kaldai mihai le vânghriltuhai chu hung ṭhuoi dingin lal chu inringtakin a khêk ta a. Lal chun Babulona mi varhai kuoma chun, “Tukhawm hi lekhaziek hi tiem a, a umzie mîn entir thei taphawt chu puon senduk insiltirin a rînga chun rângkachak khaidiet inhlitir nîng a ta, hi ram rorêltu pathumna chu ni bawk a tih,” a ta.

⁸ Chun, lal mi varhai po po chu an hung lût a; nisienlakhawm, lekhaziek chu an tiem thei naw a, a umzie khawm chu lal chu an inhriettir thei naw a.

⁹ Chuongchun, lal Belsazzar chu nasatakin a lunginzîng tah a, a hmêl chu a hung danglam a, a lalhai khawm chu an lunginzîng nasa hle a.

¹⁰ Chuongchun, lal le a lalhai thuhai lei chun ruoiṭhena ina chun lalnu chu a hung lût a, lalnu chun a hril a, “Aw lalpa, kumkhuoin dam rawh, i ngaituonahai chun sukbuoi naw sienla che, i hmêlput dân khawm danglam bawk naw raw se.

¹¹ I rama hin mi pakhat amaa pathien inthienghai thlarau umna chu a um a; i pa damlai khawm êngna dâm, hrietthiemna dâm, pathienhai varna anga varna dâm amaa chun hmu suokin a um tah a: aw lalpa, i pa Nebukadnezzar, i pa chun ama chu mitvaidawithiemhai, aisânthiemhai, Kaldai mihai le vânghriltuhai hotuah a siem a,

¹² lalin Beltesazzar ân bûk Daniela chun, thu ringhla umhai sukfelin, thu khirtakhai a umzie inentirin le manghai hrilfiein, amaa chun hrietna dâm, thiemna dâm le lungril ṭha bîk chu hmu suokin a um a. Tuhin Daniel chu inkotir la, a umzie chu inentir el a tih,” a ta.

¹³ Chun, lal hmaa chun Daniel chu an hung ṭhuoi lût a, lal chun Daniel kuomah, “Ka pa lalin Juda rama inthawka a hung ṭhuoi, Juda mi sal intânghai laia mi, Daniel chu i ni maw?

¹⁴ I chanchin ka lo hriet a, pathienhai thlarau chu nangmaah a um a, nangmaa chun êngna le thiemna le varna ṭha bîk chu hmuin a um ti ka lo hriet bawk a.

¹⁵ Tuhin, hi lekhaziek hi an tiema a umzie an mîn hriettir theina dingin mi varhai le aisânthiemhai chu ka hmaah ṭhuoi lûtin an um a; nisienlakhawm, thil umzie chu an inentir thei naw a.

¹⁶ Amiruokchu, a umziehai chu i hril theiin, thu ringhlaumhai khawm chu i sukfel thei tiin i chanchin hi ka lo hriet a; tuhin, lekhaziek hi i tiem thei a, a umzie chu i mîn hriettir thei chun puon senduk insiltir nîng i ta, i rîngah rângkachak khaidiet inhlitir ni bawk i ta, hi rama hin rorêltu pathumna chu nîng i tih,” a ta.

¹⁷ Daniel chun a dawn a, lal hmaa chun, “I thilpêkhai chu nangma ta ni lem sienla, i lâwmmanhai chu mi dang kuomah pe lem rawh, amiruokchu, lekhaziek chu lal kuoma chun tiem ka ta, a umzie chu inhriettir ka tih.

¹⁸ Aw nang lalpa, Achunghnungtak Pathien chun i pa Nebukadnezzar chu ram dâm, ropuina dâm, nasatna dâm, inlalna dâm a pêk a;

¹⁹ ropuina a pêk lei chun a hmaa chun mi po pohai, hnam po pohai le ṭawng tinhai chu an inthinin an ṭi a; a nuom nuom a that a, a nuom nuom chu an hringna a hla bawk a; a nuom nuom chu a kei sâng a, a nuom nuom chu a kei hnuoi bawk a.

²⁰ Nisienlakhawm, a lungril chu a hung insâng a, a lungril a hung ngar phingle chun chapotakin a thaw ta a, ân lalna lalṭhungphaa inthawk chun sie hnuoiin a um ta a, amaa inthawk chun a ropuina chu an lâk hmang a,

²¹ chun, mihriem nauhai laia inthawk chun hnawt hmangin a um a; a lungril chu ramsahai lungril anga siem a hung na; a umna hmun chu ram sabengtunghai lai a ni ta a; chun, bâwngchal angin hlobet chu a ring a, a taksa chu vâna inthawka daidawin a sukhu ta bawk a: mihriemhai ram chunga hin Pathien Chunghnungtakin ro a rêl a, a nuom nuom chu a chunga chun a sie hlak ti a hriet hmakhat chun.

²² Aw Belsazzar, nang a naupa hin hi thil po po hi i hriet sa khawma i lungril i sukhnuoi naw a;

²³ Vâna Lalpa chu kalin nang le nang în chawisâng ta lem a; a ina bûrlebêlhai chu i hmaa chun an hung lâk a, nang le i lalhai le i nuhmeihai le i thaikêmhai chun chuonga chun uoin in dâwn ta a; chun, tangka le rângkachak dâm, dârsen le thîr dâm, thing le lung dâma a siem pathienhai, hmu thei lo le, hre thei lo le, hrietna neilohai chu in inpâk a; Pathien a kuta i hringna umna le ama i lampui po po neitu chu i chawimawi naw a,

²⁴ ama hmaa inthawk chun hi kut bawng hi hungtir a ni ta a, hi lekhaziek hi a hung ziek ta a nih.

²⁵ Chun, hi hi lekhaziek hung inziek chu a nih: MENE, MENE, TEKEL UPHARSIN.

²⁶ Chu thil umzie chu hi hi a nih: MENE chu ‘Pathien chun i ram chu a tiem zo ta a, a tâwp chu ân tlun tah a nih,’ tina a na.

²⁷ TEKEL chu ‘Bûknahaia chun bûkin i um a, tling lova hmu i nih,’ tina a nih.

²⁸ PERES chu ‘I ram chu ṭhe a ni ta a, Media le Persia mihai kuoma chun pêk a ni tah,’ tina a nih,” tiin.

²⁹ Chun, Belsazzar chun thu a pêk a, Daniel chu puon senduk an insiltir a, a rînga chun rângkachak khaidiet an inhlitir a; chun, ama chungthua chun ram sûnga rorêltu pathumna chu a ni ding a nih ti thupuong a siem ta a.

³⁰ Chu zân chun Kaldai lal Belsazzar chu thatin a um ta a.

³¹ Chun, Media mi Daria chun ram chu a nei ta a, ama chu kum sâwmruk pahnia upa a nih.