DANIEL 4 - Pathien Lekhabu Inthieng (BSI)

Nebukadnezzar invêtna

¹ Lal Nebukadnezzar chun, Mi po po, hnam po po, ṭawng tinhai le hnuoi chunga chêng taphawthai kuoma chun, in kuomah inremna hi sukpungin um raw se.

² Pathien Chunghnungtakin ka kuomah inchiknahai le thilmakhai a thaw chu inentir hi ṭhain ka hriet a.

³ Ân chiknahai chu a va ropui ngei de! A thilmakhai chun thil a va thaw thei ngei de! A ram chu chatuon ram a na, A rorêlna khawm chu ṭhanga inthawk ṭhang nâwksâwng chen a nih.

⁴ Kei Nebukadnezzar hi ka ina chun inhawitakin ka um a, ka lal ina chun chênghnâwngtakin ka um a.

⁵ Mang mi sukṭi êm êm el chu ka hmu a, ka khum chunga ka ngaituonahai le, ka lua ka thil hmulâwknahai chun a mi suklungzîng êm êm a.

⁶ Chuleichun, mang umzie chu an mi hrilfie theina dingin Babulon rama mi var po pohai hung ṭhuoi khâwm dingin thupêk ka siem ta a.

⁷ Chun, mitvaidawithiemhai, aisânthiemhai, Kaldai mihai le vânghriltuhai chu an hung lût a: chun, an hmaa chun mang chu ka hril a; nisienlakhawm, a umzie chu an mîn hriettir thei naw a.

⁸ Amiruokchu, a tâwp taka chun ka hmaa chun Daniel chu a hung lût a, a hming chu ka pathien hming ang peiin Beltesazzar a nih; amaa chun pathien inthienghai thlarau chu a um a; chuongchun, a hmaa chun mang chu ka hril ta a;

⁹ “Aw Beltesazzar, mitvaidawithiemhai hotu, pathien inthienghai thlarau chu nangmaa chun a um a, thurûk chun nang a sukbuoi ngai naw che ti ka hriet leiin, ka manga thil hmulâwkhai ka hmu ta le, a umzie chu mi hril rawh.

¹⁰ Ka khum chunga ka lua thil hmulâwkhai ka hmu chu hieng ang hi a nih; hnuoi lailung lai hin thing ka hmu a, ka en zing a, ân sângzie chu a nasa hle a.

¹¹ Thing chu a hung inṭhang a, a hung lien a, ân sângzie chun vân a hung phâk a, ân hmu theina chun khawvêl po po tâwp chen a huop bawk a.

¹² A hnahai chu a mawiin a rahai chu a tam êm êm a, chutaka chun mi po po tlai khawp fâk ding a um a; ramsahai chun a hnuoia chun a hlim an bêl a, chunglêng vatehai khawm chu a kâuhaia chun an chêng bawk a, thilhring tinrênghai chun a ra an tlân a.

¹³ Ka khum chunga thil hmulâwkhai ka hmua chun, ngai ta, vâna inthawkin vêngtu le mi inthieng pakhat a hung thla a.

¹⁴ Ama chu inringtakin a khêk a, ‘Thing kha phûr thlu unla, a kâuhai kha tan thla ro, a hnahai kha sâwi ṭil unla, a ra kha the dar bawk ro; a kâuhaia vatehai le, a hnuoia ramsahai kha fe hmang raw hai seh.

¹⁵ Amiruokchu, a zunghai kûng- hmui kha chu rama hlobet innêm lai, thîr le dârsen hnânga khuopin hnuoia khan mâksan ro; chun, vâna inthawka daidaw chun sukhuin um sienla, a fâk chu ramsahai angin hnuoia hlobet ni sienla;

¹⁶ a lungril khawm chu mihriem lungrila inthawka sukdanglam ni sienla, a kuoma chun ramsahai lungril chu pêk ni raw se; chun, hun sarihai chu ama chungah bo raw se.

¹⁷ Hi thu sukthlûk hi vêngtuhai thupêk le, mi inthienghai thua phût: hringna nei taphawt chun Achunghnungtak chun mihriemhai rama chun ro a rêl a, a nuomna kuoma chun a pêk a, mi inhnuoitakhai khawm a chunga chun a sie thei ti an hrietna dingin a nih,’ tiin.

¹⁸ Hi mang hi kei Nebukadnezzar hin ka hmu ta a, Aw Beltesazzar, a umzie chu hrilfie rawh, ka ram sûnga mi varhai chun a umzie chu an mîn hriettir thei si naw a: nisienlakhawm, nang chun i thei a nih; pathien inthienghai thlarau chu nangmaa chun a um si a,” ka ti a.

¹⁹ Chun, Daniel a hming dang Beltesazzar chu chawmkhat tak chu mak ti takin a um a, a ngaituonahai chun ama a sukbuoi vieu a. Lal chun a dawn a; “Beltesazzar, mang chun amanih, a umzie chun amanih sukbuoi naw raw se che.” a ta. Beltesazzar chun a dawn a. “Ka lalpa, mang chu nangma theidatuhai che ta ding a na, a umzie chu i hmêlmahai ta ding a nih.

²⁰ Chu thing i hmu, hung inṭhang a, hung lien a, ân sângzie chun vân hung tawng a, ân hmu theina chen chu hnuoi po po huop a,

²¹ a hnahai chu mawi êm êm a, a râhai chu tam êm êm a, thil chi tin ta dinga fâk ding hung ni a, chu hnuoia chun ramhnuoia sahai chu an chêng a, a kauhaia chunglêng vatehaiin umna an siemna thing chu,

²² Aw lalpa, nang hi i nih: i hung inṭhangin i hung hrât a, i ropuina chu a hung lien a, vân a hung tawng a, i ram hlak chu hnuoi tâwp chen a ni bawk si a.

²³ Chun, lalin vâna inthawka vêngtu le mi inthieng hung thlaa, Thing kha phûr thlu unla sukbohmang ro, amiruokchu, a zunghai kûnghmui ruok chu hnuoia hlobet innêm lai thîr le dârsen hnânga khuopin mâksan ro, vâna inthawka daidâw chun hu hlak sienla, a fâk ding khawm chu ramhnuoia ramsahai fâk ang chu ni raw se; ama chunga hun sarihai a fe liem hmakhat chun, ti thu an hung hril ruok hi chu,

²⁴ a umzie chu hieng ang hi a nih: Aw lalpa, hi hi Achunghnungtak thupêk chu a nih, ka pu lal chunga hung tlung hi;

²⁵ chuongchun, mihriem laia inthawka hnawt hmang nîng i ta, i chêngna chu rama ramsahai lai nîng a tih; chun, bâwngchalhai anga hlobet infâktir nîng i ta, vâna inthawka dâidâw chun sukhu ni bawk i tih; chun, hun sarihai chu i chunga chun fe liem a tih; mihriemhai ram chunga hin Achunghnungtak chun ro a rêl a, a nuom nuom kuomah a pêk hlak ti i hriet hmakhat chu.

²⁶ Chun, thing zunghai kûnghmui hla dinga thu an pêk chungthua hin chu; i ram hi chu nangma ta ni zing a ta; chu hnunga chun vânhai chun ro an rêl ngei a nih ti hre tâng i tih.

²⁷ Chuleiin, aw lalpa, ka thurâwn hi i kuoma chun pawmtlâka ngai ni raw se; i suolnahai chu felnain thleng la, i khawhlonahai chu mi rimsihai chunga lunginsietna inentir bawk rawh; i tluongtlungna hi sukseia a um theina dingin,” a ta.

²⁸ Hieng thil po po hi lal Nebukadnezzar chunga chun a hung tlung ta a.

²⁹ Thla sâwm pahnihai tâwpa chun Babulon ram lal ina chun a fe a.

³⁰ Lal chun a hril a, “Hi hi Babulon ram ropuitak, ka thilthawtheina hrât nasatak chun, lal chêngna ding le, ka în lalna ropuina dinga ka siem chu a ni naw am a nih?” a ta.

³¹ Lalin chuonga thu a hril lai zing chun, vâna inthawkin râwl a hung thla a, “Aw lal Nebukadnezzar, nangma kuoma inthawkin ram chu ṭhe hmang a ni tah ti hi i kuomah hril a nih.

³² Chun, mihriemhai laia inthawka hnawt hmang nîng i ta, i chêngna ding chu rama ramsahai lai nîng a tih; bâwngchal anga hlobet infâktir nîng i ta; chun, hun sarihai chu i chungah fe liem a tih; mihriemhai ram chunga hin Achunghnungtak chun ro a rêl a, a nuom nuom kuomah a pêk hlak ti i hriet hmakhat chun,” a hung ti a.

³³ Chu dâr ngeia chun chuong thil chu Nebukadnezzar chunga chun intlungtir a ni ta a, mihriem laia inthawka hnawt hmangin a um a, bâwngchal angin hlobet a pet a, a taksa chu vâna inthawka dâidâw chun a sukhu a, a samhai chu mupui hmul ang el a hung ni a, a tinhai chu vatehai tin ang a hung ni chen chun.

³⁴ Chuong nihai tâwpa chun, kei Nebukadnezzar hin ka mithai chu vântieng ka tang a, ka hrietna chu ka kuomah a hung kîr nâwk a, Achunghnungtak chu mal ka sâwm a, chatuona hring zing chu ka chawimawiin kân pâk a: A rorêlna chu chatuon rorêl a na, A lalram chu ṭhanga inthawk ṭhang sâwng tamtak chen a ni si a;

³⁵ Hnuoi chung hluotuhai po po chu iengkhawm ni lo anga ngai an na, Hnuoi chung hluotuhai le vâna sipai pâwl ruolhai chunga chun A nuom ang angin a thaw a, Tukhawmin a kut chu an chel thei naw a. “Nangin ieng am i thaw an leh?” an ti thei bawk nawh.

³⁶ Chu chu huna chun ka hrietthiemna chu ka kuomah a hung kîr nâwk a; ka ram ropuina le ka înlalna le êngna chu ka kuomah an hung kîr nâwk si a; chun, ka upahai le ka lalhai chun an mi zawng a; ka rama chun tungdingin ka um a, ropuina nasatak el chu ka kuomah belsain a um ta a.

³⁷ Tuhin, kei Nebukadnezzar hin vâna Pathien chu ka chawimawiin, ka chawisângin kân pâk a; a sinthawhai po po chu indikna a na, a lampuihai chu felna a nih; chun, chapoa fehai chu a sukhnuoi thei a nih.