DANIEL 3 - Pathien Lekhabu Inthieng (BSI)

Mei sûmpuia inthawka sanhimna

¹ Lal Nebukadnezzar chun rângkachak milim a siem a, ân sângzie chu tawng sâwmruk a na, a khangtieng chu tawng ruk a nih; Babulon biel sûnga Dura phaizâwla chun ân ngîrtir ta a.

² Chun, lal Nebukadnezzarin milim ân ngîrtir chu inhlân dinga hung dingin, lal Nebukadnezzar chun biel awptuhai, ram awptuhai, sipaihotuhai, lalhai, tangka sum enkawltuhai, rorêltuhai, dân hre mihai le ram bunga rorêltuhai po po chu a ko khâwm vawng a.

³ Chun, biel awptuhai, ram awptuhai, sipaihotuhai, lalhai, tangka sum enkawltuhai, rorêltuhai le dân hre mihai le ram bunga rorêltuhai po po chu lal Nebukadnezzarin milim ân ngîrtir inhlânnaa chun an hung khâwm vawng a; chuongchun, Nebukadnezzarin milim ân ngîrtir hmaa chun an ngîr tâwl a.

⁴ Chun, tlângsam chu inringtakin a hung khêk a, “Aw mipui po pohai, hnam po pohai le, ṭawng po pohai, in kuomah hieng anga thupêk hi a nih:

⁵ tawtawrâwt dâm, theihle dâm, ṭingṭang dâm, rawsem dâm, perkhuong dâm, baza dâm le rimawi chi tinrêng inri in hriet pha leh, lal Nebukadnezzarin rângkachak milim ân ngîrtir hmaa hin bawkkhup in ta, chibai in bûk ding a nih;

⁶ tukhawm bawkkhup lo a, chibai bûk lo chu, chu dârkâr sûng ngei chun meithuk chawklai râpthlâktaka peilût nîng a tih,” a ti a.

⁷ Chuleiin, chu lai chun, mipuihai chun tawtawrâwt dâm, theihle dâm, ṭingṭang dâm, rawsem dâm, perkhuong le rimawi tinrênghai ri chu an hriet chun, mipui po po le, hnam po pohai le, ṭawng po pohai chu lal Nebukadnezzarin rângkachak milim ân ngîrtir hmaa chun an bawkkhup a, chibai an bûk ta a.

⁸ Chuongchun, chu lai chun, Kaldai mi ṭhenkhat an hung hnai a, Juda mi- hai chungah hêkna an hung siem ta a.

⁹ Anni chun lal Nebukadnezzar kuoma chun, “Aw lalpa, kumkhuoin dam rawh.

¹⁰ Aw lalpa, nang chun thupêk i siem a: tawtawrâwt dâm, theihle dâm, ṭingṭang dâm, rawsem dâm, perkhuong dâm le rimawi tinrêng an hriet pha chun mi tin chu bawkkhup an ta, rângkachak milim chu chibai an bûk ding a na;

¹¹ chun, tukhawm bawkkhupa chibai bûk naw taphawt chu meithuk chawklai râpthlâktaka chun pei lût nîng an tih, tiin.

¹² Juda mi ṭhenkhat hieng Sadrak, Mesak le Abednego hai Babulon biel sûng chungchânga hotua i ruothai kha, khânghai rawi khan, aw lalpa, an pawisa naw che a nih, i pathienhai rawng chu an bâwl naw a, rângkachak milim în ngîrtir khawm kha chibai an bûk bawk nawh,” an ta.

¹³ Chun, Nebukadnezzar chun a lungsenna le a ṭitumna chun Sadrak, Mesak le Abednego hai chu hung ṭhuoi dingin thu a pêk a. Chun, chuong mihai chu lal hmaa chun an hung ṭhuoi ta a.

¹⁴ Nebukadnezzar chun a dawn a, an kuomah, “Aw Sadrak, Mesak, Abednego, ka pathien rawng chu in bâwl naw a, rângkachak milim kân ngîrtir khawm hi chibai in bûk nawh ti hi ân dik am a nih?

¹⁵ tuhin tawtawrâwt dâm, theihle dâm, ṭingṭang dâm, rawsem dâm, perkhuong dâm, baza le rimawi tinrêng ri chu in hriet pha pha, in bawkkhupa milim ka siem chu chibai in bûk ding chun a ṭha; amiruokchu, chibai in bûk naw chun, chu dârkâr sûng ngeia chun meithuk chawklai râpthlâktaka chun peiin um in tih; ka kuta inthawka sansuok ding cheu pathien chu tu am a ni leh?” a ta.

¹⁶ Sadrak, Mesak le, Abednego chun an dawn a, lal kuoma chun, “Aw Nebukadnezzar, hi thil chungchâng thua hin kan dawn che a ṭûl nawh.

¹⁷ Chuong chu a ni ding chun, kan Pathien a rawng kan ibâwl chun meithuk chawklai râpthlâka inthawk chun a mi sanhim thei a; aw lalpa, i kuta inthawk khawmin a mi sanhim thei a nih.

¹⁸ Chuong chu ni naw ding khawm ni sien, i pathienhai chu an rawng bâwl naw ning ung a, rângkachak milim în ngîrtir khawm chu chibai bûk bawk nawng kan tih,” an ta.

¹⁹ Chun, Nebukadnezzar chu lunginsennain a sip a, a hmêl umzie chu Sadrak, Mesak le Abednego chunga chun a hung danglam ta a; chuleiin, a hril a, meithuk chu a lum hlak ang let saria suklum dingin thu a pêk ta a.

²⁰ Chun, a sipai pâwl laia mihrâttakhai chu Sadrak, Mesak le Abednego chu khuop a, meithuk chawklai râpthlâktaka chun pei lût dingin thu a pêk a.

²¹ Chun, chuong mihai chu an kekawrhai, an lukâwmhai, an kawrfuolhai le an silfên danghaia chun khuopa umin meithuk chawklai râpthlâktakah chun peiin an um ta a.

²² Chuongchun, lal thupêk chu a nasa êm a, meithuk chu a lum nasa êm lei chun, meichawk chun Sadrak, Mesak le Abednego pei lûttuhai chu a sukhlum ta a.

²³ Chun, chuong mi pathum, Sadrak, Mesak le Abednego chu khuop hlawm saa umin meithuk chawklai râpthlâktakah chun an tla lût ta a.

²⁴ Chun, lal Nebukadnezzar chun mak a ti ta hle a, inhmawtakin a tho a, a rorêltuhai chu a biek a, an kuomah, “Mi pathum kha khuop sain mei lai ei pei lût a ni naw am a ni kha?” a ta. Anni chun an dawn a, lal kuoma chun, “Aw lalpa, pei e,” an ta.

²⁵ Ama chun a dawn a, “En ta u, mei laia khun mi pali sût sain inlawnin ka hmu a, na hrim an ti nawh; a palina hmêl putzie chu pathienhai naupa ang a nih,” a ta.

²⁶ Chun, Nebukadnezzar chu meithuk chawklai râpthlâktak bula chun a hung hnai a, “Sadrak, Mesak, Abednego, nangni Pathien Chunghnungtak siehlawhai, hung suok unla, hi tieng hin hung ro,” tiin a biek a. Chun, Sadrak, Mesak le, Abednego chu mei laia inthawk chun an hung suok ta a.

²⁷ Chun, biel awptuhai, ram awptuhai, sipai hotuhai le lal rorêltuhai hung inkhâwmhai chun chuong mihai chu an taksahai chunga chun meiin thilthawtheina a nei naw a, an lua sam khawm chu a kângkin naw a, an zakuohai khawm chu a danglam chuong naw a, anni chu mei rim khawm an innam nawh ti chu an hmu a.

²⁸ Chun, Nebukadnezzar chun a hril a, “Sadrak, Mesak le Abednego hai Pathien, a vântirko hung tir a, a siehlaw ama ringtuhai hung sanhimtu chu inpâkin um raw se; lal thuhai chu a hung sukdanglam a, an Pathien chau naw chu pathien dang hrim hrim chu a rawng an bâwla chibai an bûk nawna dingin an taksahai chu a humpêk ta a.

²⁹ Chuleichun, thupêk ka siem, mi tin, hnam tin, le ṭawng tin, hieng Sadrak, Mesak le Abednego hai Pathien chunga thil hril suol taphawt chu, sât nawi vawng nîng an ta, an inhai khawm chu êk siekhâwmnaa siem nîng a tih; hieng ang kawnga mi sanhim thei pathien dang hrim an um naw leiin,” a ta.

³⁰ Chun, Babulon biel sûnga chun lal chun Sadrak, Mesak le Abednego hai chu a ân kâisângtir ta a.