DANIEL 12 - Pathien Lekhabu Inthieng (BSI)

Tâwpna hun chu

¹ “Chu pha chun lal naupa ropuitak Mikael, i mihai ta dinga ngîr chu ngîrsuok a ta; chun, buoina hun chu a hung um ding a nih, hnam um tira inthawka chu chu hun chena khawm la um ngai hrim hrim lo chu; chu pha chun, i mihai, lekhabua zieka hmu taphawthai chu sanhim nîng an tih.

² Chun, mi tamtak hnuoi pilvuta lo in tahai chu tho an ta, aṭhen chu chatuona hringna changin, aṭhen ruok chu chatuona thiemnaw le inzakna changin.

³ Chun, mi varhai chu vâna var ang khin var tâng an ta; chun, mihai felna tienga lo ṭhuoi lûttuhai chu chatuonin arasihai angin var tâng an tih.

⁴ Nisienlakhawm, nang aw Daniel, hun tâwp chena dingin thuhai chu khâr la, lekhabu chu châr tlat rawh: mi tamtak chu hnungtieng hmatieng tlân an ta, hrietna chu a pung ding a ni si a,” tiin.

⁵ Chun, kei Daniel chun ka en a; chun, ngai ta, mi dang pahni, pakhat chu vadung pang khingtieng sîrah, a dang chu vadung pang khingtieng sîrah, an lo ngîr a.

⁶ Chun, pakhat chun vadung tuihai chunga um, puon zai inhmia inthuompa kuoma chun, “Hieng thilmakhai tâwpna chu iengtik am nîng a ta?” a ta.

⁷ Chun, puon zai inhmia inthuom, vadung tuihai chunga ngîr chun a kut changtieng le vawitieng chu vân tieng a phar a, chatuona Hring kuoma chun inkhâmin, “Hun khat le, hunhai le, hun chenve sûng nîng a tih; chun, mi inthienghai thilthawtheina chu a nâwia suknâwi vawng chu an zo pha chun hieng thil po po hi thaw zo ni tâng a tih,” a ti ka hriet a.

⁸ A ri chu ka hriet a, a ngaina ruok chu ka hriet naw a; chun, kei chun, “Aw ka Lalpa, hieng thilhai tâwpna chu ieng am nîng a ta?” ka ta.

⁹ Ama chun, “Daniel, fe el rawh, hun tâwp chena dingin hieng thuhai hi khârkhum tlat le chârde tlat an ni si a.

¹⁰ Mi tamtak chu anni le anni insukthieng an ta, insukvâr an ta, insukthieng an tih; nisienlakhawm, mi khawhlohai chun khawhlotakin thâwng an ta; mi khawhlohai tukhawmin hrethiem naw ni hai; amiruokchu, a varhai chun hrethiem an tih.

¹¹ Chun, pumrawhmang thilinhlân rawp hi lâk hmang le, sukrêmna tirdakum intluntu uma inthawkin ni sâng khat za hni sâwmkuo um a tih.

¹² Inring zinga, ni sâng khat za thum sâwmthum pangaa lût chu a hamṭha.

¹³ Nisienlakhawm, nang chu fe pei la, a tâwp a tlung hma chun, ni tâwpahai chun châwl i ta, i chantâwka chun i ngîr ding a ni si a,” a ta.