DANIEL 10 - Pathien Lekhabu Inthieng (BSI)

Tigris vadung panga Danielin inlârna a hmu thilhmulâwk

¹ Persia lal Kura inlal kum thumnaa chun a hming Beltesazzar inbûk, Daniel kuomah thil suklangin a um a, chu thil chu thil indik, indona ropuitak a na, chu thil chu a hriet a, thilhmulâwk chu hrietthiemna a nei bawk a.

² Chuong nihai lai chun kei Daniel hi hapta thum zet chu lungngaiin ka um a.

³ Bei inhnikin ka fâk naw a, sa le uoin hrim hrim khawm ka bauah a lût naw a, hriek hrim hrim khawm kân nâl ngai naw a, hapta thum pumhlûm a tling hmakhat chun.

⁴ Chun, thla hmasatak ni sâwmhni pali ni chun, Hiddekel vadung ropuitak panga ka um lai chun,

⁵ ka mithai vân tieng ka hang inlên a, ka en a, mi pakhat puon zai inhmia inthuom, a kâwnga Uphaz rângkachak inthienga inkhit hi ka hmu a;

⁶ a taksa khawm chu berul lung ang a na, a hmêl inlang dân chu kâwlinlep ang a na, a mithai chu khâwnvar chawklai ang an na, a kuthai le a kehai chu dârsen tlemi ang an na, a thu hril rihai chu mi tamtak râwlri ang a nih.

⁷ Chun, kei Daniel chau chun chu thilhmulâwk chu ka hmu a; ka kâwla mi um vehai chun thilhmulâwk chu an hmu ve naw a; amiruokchu, inthinna nasatak an chungah a tla a, anni chu inbi dingin an tlân ta a.

⁸ Chuongchun, ka khât chaua mâksanin ka um a, hi thilhmulâwk ropuitak hi ka hmu ta a; chun, keimaa chun hrâtna hrim hrim a um ta naw a: ka hmêl mawina chu sietnaa ân chang ta leiin, hrâtna hrim ka nei ta naw a.

⁹ A thuhril ri chu ka la hriet ta rawp a: chun, a thuhril ri chu ka hriet phingleh, hnuoitienga ka hmai innghatin ka bawkkhup a, inhniktakin ka in ta a.

¹⁰ Chun, ngai ta, kutin a mi hung them a, chuongchun, dingṭhaṭhuonin ka bawkinvâk a.

¹¹ Chun, ka kuoma chun, “Aw nang nasataka ditsaka umpa Daniel, i kuoma ka thuhrilhai chu a ngaina hre la, ngîr inzang rawh; tuhin i kuoma hung tir ka ni si a,” a ta. Hi thu hi ka kuoma a hung hril phing chun inthin pumin ka ngîr ta a.

¹² Chun, ama chun ka kuomah, “Daniel ṭi naw rawh, i Pathien hmaa nang le nang în sukhnuoi a, a ngaina hre dinga i lungril i siem nia inthawk khan i thuhai chu hriet a lo ni ta a, i thuhai lei chun hi ka hung a nih.

¹³ Nisienlakhawm, Persia ram lal chun ni sâwmhni pakhat sûng chu a mi lo dangkîr a; amiruokchu, ngai ta, Mikael hotu laia lutak pakhat chu kei mi ṭhangpui dingin a hung a; chuongchun, Persia ram lalhai le chun chutaka chun ka um zing ta a.

¹⁴ Ni nuhnungahai chun i mihai chu iengin am a hung tlâkbuok ding a na ti inhriettir ding chein tuhin ka hung a nih; thilhmulâwk kha ni tamtakhaia ding a la ni chau si a,” a ta.

¹⁵ Chun, hieng thuhai ang peia ka kuoma thu a hung hril chun, ka hmai chu hnuoi tieng ka kûn a, ṭawngtheilovin ka um ta a.

¹⁶ Chun, ngai ta, mi pakhat, mihriem naupahai angtak el hin ka hmûrhai chu a hung them a; chun, ka bau chu ka ka a, ka hmaa ngîr kuoma chun thu ka hril ta a, “Aw ka lalpa, thilhmulâwk lei chun ka lungngainahai chu ka chungah a tla ta a, chuongchun, hrâtna hrim ka nei ta dêr nawh.

¹⁷ Hi ka lalpa siehlaw hin hi ka lalpa kuoma hin iengtin am thu hril thei ka ta? Kei hlak chu kârlovin hrâtna hrim nei lovin ka um el si a, keimaa chun inthuokna hrim hrim khawm a um ta bawk si naw a,” ka ti a.

¹⁸ Chun, mihriem hmêl angtak put pakhat hin a mi hung them nâwk a; a mi sukhrât ta a.

¹⁹ Ama chun, “Aw nasataka ditsaka umpa, ṭi naw rawh, i kuomah thlamuongna um raw se; insukhrât rawh, anih, insukhrât rawh,” a ta. Chun, ka kuoma thu a hung hril phing chun sukhrâtin ka um ta a, “Ka lalpa hin thu hril raw se, i mi sukhrât ta si a,” ka ta.

²⁰ Chun, ama chun, “I kuomah iengdinga hung am ka na ti i hriet am? Tuhin Persia lal chu do dingin kîr nâwk ka ta; chun, ka fe suok pha chun, ngai ta, Grik ram lal chu hung a tih.

²¹ Nisienlakhawm, thudik zieknaa ziek chu hril ka ti che: hi thil chungchâng thua hin, i lalpa Mikael ti chau naw chu tukhawm a mi ṭan zo hrim hrim an um nawh.