DANIEL 1 - Pathien Lekhabu Inthieng (BSI)

Daniel le a ruolhai inchûkna

¹ Juda lal Jehoiakim rorêl kum thumnaa Babulon ram lal Nebukadnezzar chu Jerusalemah a hung a, a rûn ta a.

² Chun, Juda lal Jehoiakim chu Pathien ina bûr le bêl ṭhenkhat leh Lalpa chun ama kuta chun a pêk tah a; Sinar rama a pathien ina chun a lâk a, chuong bûr le bêlhai chu a pathien sum ina chun a hung lâk ta a.

³ Chun, lal chun a mitillâkhai chunga hotu Aspenaz kuoma chun Israel nauhai mi ṭhenkhat lal chi ngei le miṭha chi ngei hung ṭhuoi dingin a hril a;

⁴ anni chu tleirâwl demkailo, ditumtak lem, varna po poa thiem, hrietna kawnga bengvâr, hrietna inthûktak hre mi, lal ina ngîr dinga theina nei mi an ni ding a na; chun, Kaldai ṭawng le thiemna ân chûktir bawk ding a nih.

⁵ Lal chun kum thum sûng a châwm a, a tâwpa chun lal hmaa an ngîr theina dingin lal bu fâk le a uoin dâwn ngei chu ni tina an chanpuol dingin anni chu a ruotpêk a.

⁶ Hieng hai laia Juda nauhai chu Daniel, Hanania, Misael le Azaria an nih.

⁷ Chun, mitillâk hotu chun anni chu hming tharhai a pêk a; Daniel chu Beltesazzar ân bûk a, Hanania chu Sadrak, Misael chu Mesak, Azaria chu Abednego.

⁸ Nisienlakhawm, Daniel chun a lungrilin lal bu fâk le a uoin dâwnhai chun ama chu insukpawrche lo a tum tlat a: chuongchun, mitillâkhai hotu kuoma chun ama chu ân sukpawrche naw theina ding kawng chu a hni a.

⁹ Chun, Pathien chun Daniel chu mitillâkhai hotu mithmua lunginsietna le ditsakna hlaw thei dingin a siem a.

¹⁰ Chun, mitillâkhai hotu chun Daniel kuoma chun, “Lal, in dâwn ding le in bu fâk ding ruotpêktu cheu ka lalpa chu ka ṭi a nih, i kum inangpui tleirâwl danghai nêka se lemin i hmêl chu a hmu si naw ding am a nih? Chuong a ni chun, lal kuomah ka lu hi ṭitumtakah i sie a ni ding a nih,” a ta.

¹¹ Daniel chun mitillâkhai hotuin anni Daniel, Hanania, Misael le Azaria vêngtu dinga a ruot, Hammelzar kuoma chun,

¹² “Ka ngên che hi, i siehlawhai hi ni sâwm sûng ensin raw khai; fâk dingin thlai chau le dâwn dingin tui chau mîn pêktir la.

¹³ Chun, tleirâwl dang lal bu fâk fahai hmêlput dân le, keini hmêlput dânhai chu enkhi ni raw se; chun, chutaka i hmu ang ang chun, i siehlawhai hi i law law law el rawh,” a ta.

¹⁴ Chuongchun, hi chungchâng thuah anni thu chu a ngai a, ni sâwm sûng chu a ensin ta a.

¹⁵ Ni sâwm hnunga chun tleirâwl dang lal bu fâk fatuhai po po nêk chun an hmêlput dânhai chu a hung inlang ṭha lem ta a.

¹⁶ Chuongchun, anni vêngtu chun an bu fâk ding le uoin an dâwn ding chu a sie hmang a, thlai chau a pêk lem ta a.

¹⁷ Chun, hieng tleirâwlhai pali hi Pathien chun varna le thiemna po poa bengvarna le hrietna a pêk a; chun, Daniel chun thilhmulâwkhai le manghai chung po poa chun hrietthiemna a nei a.

¹⁸ Chun, lalin anni hung ṭhuoilûtna dinga a ruot nihai tâwpa chun mitillâkhai hotu chun anni chu Nebukadnezzar hmaa chun a hung ṭhuoi ta a.

¹⁹ Lal chun anni chu a lo biek tâwl a, an rênga lai chun Daniel hai, Hanania hai, Misael hai le Azaria hai ang tukhawm an um naw a, chuleiin, anni chu lal hmaa chun an ngîr ta a.

²⁰ Chun, varna le hrietthiemna kawng tinrêngah, lalin a indawn ta hrim hrima chun, a ram sûnga aisânthiemhai le mitvaidawi thiemhai po po nêka le sâwma var lemin anni chu a hriet a.

²¹ Chun, Daniel lem chu Kura inlal kum khatna chenin a um zing ta a.