AMOS 8 - Pathien Lekhabu Inthieng (BSI)

Inlârna palina: Nisapuithei bâwm

¹ Hieng ang hin Lalpa Pathien chun a mîn entir a, chun, en ta u, nisapuithei bâwm a lo nih.

² Chun, ama chun, “Amos, ieng am i hmu a?” a ta. Keiin, “Nisapuithei bâwm,” ka ti a. Chun, Lalpa chun ka kuomah, “Ka mi Israelhai chungah tâwpna a hung tlung tah; anni chu khêl nâwk ta naw ning,” a ta.

³ Lalpa Pathien chun, “Chu nia chun biekin hlahai chu khêk rak rak ni tâng a ta, mithi ruong tam a ta, hmun tinah to zingin peihâwn an tih,” a ta.

Israel sietna hung tlung mêk chu

⁴ Chun, hi hi ngai ta u, nangni tlasamhai fa zo nuom a, ram mi rimsi sukbo nuomhai,

⁵ “Bu ei zawr theina dingin thla thar chu iengtik âm bo a ta, beiphit bu ei insuo theina dingin châwlni chu iengtik âm a bo ding a na? Epha sukchîna, shekel suklien a, indik nawtaka hlêmna bûkna hmang a,

⁶ tangkaruoa mi rimsi inchaw a, mi tlasamhai chu kekawk bun khata inchaw a, busi ei zawr theina dingin,” tiin.

⁷ Lalpa chun Jakob ropuina sâlin ṭawng ân khâm a, “Matheilovin, an sinthaw hrim hrim theinghil dêr naw ning ah,” tiin.

⁸ Hi hi lei hin ram chu ân thinin, a sûnga um taphawthai chu an lungngai naw ding am a nih? Anih, Vadung ang chun hung lien vawng a ta, Aigupta ram Vadung angin hung buoiin hung kang a tih.

⁹ Chun, Lalpa Pathien chun a hril a, Chu nia chun, sûn changlai nisa intlâktir ka ta, nisa sat lai chun hnuoi chu sukthim ka tih.

¹⁰ In ruoiṭhehai chu lungngainaa le in hlahai po po chu ṭapnaah inchangtir ka tih; kâwng po po chu saiip puon indierkeitir ka ta, lu tin sîpa chun kâwkna hung intlungtir ka tih; chun, naupa khât nei sun ta dinga lungngaina ang le, a tâwpna chu khâkna ni angin siem ka tih.

¹¹ Lalpa Pathien chun, “Ngai ta u, nihai chu a hung tlung mêk a nih, chuong nihaia chun rama chun ṭâm tir ka ta, bua ṭâmna ni lovin, tuia ṭâmna ni lovin, Lalpa thu hrietnaa ṭâmna lem chu.

¹² Lalpa thu hre châka zawngin, tuipuia inthawka tuipui dangah, Hmartienga inthawkin saktieng tlânvêl an ta, nisienlakhawm, hmu naw ni hai.

¹³ Chu nia chun nunghâk ṭha le tlangvâlhai chu dangchârin thidang an ta,

¹⁴ Samari khaw suolna sâla ṭawng inkhâm a, ‘Aw Dan, i Pathien a hring angin,’ le, ‘Beer-seba fena lampui a hring zing angin,’ tihai kha, chuong mihai khawm chu tlûng an tih, tho nâwk dêr naw ni hai,” tiin.