AMOS 7 - Pathien Lekhabu Inthieng (BSI)

Inlârnaa suksietna chi thum hmu chu: Khâuṭhikṭhi, Mei le Enremna

¹ Hieng ang hin Lalpa Pathien chun a mîn entir a; en ta u, mâwng nuhnung lem a mâwng ṭantirnaa chun khâuṭhikṭhi a siem a; ngai ta u, lal bu hlu hnunga mâwng nuhnung lem a nih.

² Chun, chu rama hlohna chu an fâk zo hnungin, “Aw Lalpa PATHIEN, ngaidam rawh, ka ngên che hi; Jakob chu iengtin am ngîr thei a ta, ama a chîn si a?” ka ti a.

³ Hi thuah hin Lalpa chu ân lêt a, Lalpa chun, “Ni nâwk ta naw nih,” a ta.

⁴ Hieng ang hin Lalpa Pathien chun a mîn entir a; chun, en ta u, Lalpa Pathien chun meia do dingin a ko a; mei chun tui inthûk lien chu a kâng vawng a; ram khawm chu a kâng zo mêk bawk a.

⁵ chun, keiin, “Aw Lalpa PATHIEN, ma rawh, ka ngên che hi, Jakob chu iengtin am ngîr thei a ta, ama a chîn si a?” ka ta.

⁶ Hi thuah hin Lalpa chu ân lêt a, Lalpa Pathien chun, “Hi khawm hi ni ta naw nih,” a ta.

⁷ Hieng ang hin a mîn entir a, chun, en ta u, Lalpa chu enremnaa siem bang kâwlah a ngîr a, a kuta chun enremna chu a chawi a.

⁸ Chun, Lalpa chun ka kuomah, “Amos, ieng am i hmu a?” a ta. Kei chun, “Enremna,” ka ta. Lalpa chun, “Ngai ta, ka mi Israelhai lai enremna sieng ka ta, anni chu hlâ nâwk ta naw ning a;

⁹ chun, Isak bâwlhmunhai chu rausan hung nîng an ta, Israel hmun inthienghai chu suksiet nîng a tih, chun, Jeroboam sûnghai chu kâwlhnâmin do ka tih,” a ta.

Amos le Amazia

¹⁰ Chun, Bethel khaw thiempu Amazia chun Israel lal Jeroboam kuomah, “Amos chun Israel sûnghai lai chun a phierrûk che a, ram chun a thuhril po po chu a tuor thei nawh.

¹¹ Amos chun hieng ang hin a ti si a, ‘Jeroboam chu kâwlhnâmin thîng a ta, matheilovin a rama inthawkin Israel chu salah ṭhuoi suok a ta,’ tiin thu a thawn a,” tiin.

¹² Chun, Amazia chun Amos kuomah, “Aw nang zâwlnei, fe la, Juda ramah tlân hmang la, chutaka chun bu fa la, thu hril rawh;

¹³ nisienlakhawm, Bethel khuoah thu hril nâwk ta naw rawh: lal hmun inthieng le lal in a ni leiin,” a ti bawk a.

¹⁴ Chun, Amos chun Amazia kuomah, “Zâwlnei ka ni naw a, zâwlnei naupa khawm ka ni bawk nawh; ran ruol vêngtu le theichang kûng enkawltu ka ni lem a nih;

¹⁵ Lalpa chun berâm ruol vêngnaa inthawk chun a mi lâk a, Lalpa chun ka kuomah, ‘Fe la, ka mi Israelhai kuomah thu hril rawh,’ a mi ti a.

¹⁶ Chuongchun, tuhin Lalpa thu chu hre rawh, ‘Nangin Israel kalin thu hril naw la, Isak sûngkuohai kalin i thu puong naw rawh,’ i ti a;

¹⁷ chuleiin, Lalpa chun hieng ang hin a ti a nih, ‘I nuhmei chu khawpuiah nawchizawr nîng a ta, i naupasalhai, i naunuhmeihai chu kâwlhnâmin tlûng an ta; i ram chu inkhina hruiin sem an ta; chun, nangma ngei khawm ram thieng naw sûnga chun thîng i ta, matheilovin, Israel chu a rama inthawkin salah ṭhuoi hmang an tih,’ tiin,” a dawn a.