AMOS 6 - Pathien Lekhabu Inthieng (BSI)

Israel suksieta a umna

¹ “Zion tlânga inhawitir taluoa umhai le, Samari tlânga himtaka umhai le hnam lientak mi ropuihai, an kuoma Israel sûngkuohai an fenahai chu an chung a rik ie!

² Kalne khuoa chun fe unla, en ro; chun, chutaka inthawkin Hamath khaw ropuia chun fe unla, en ro; chun, Philistin ram Gath khuoa chun fe thla unla, hieng ramhai nêk hin an ṭha lem am? In ram nêkin an ram chu a lien lem am?

³ Nangni sietna ni hlataka sie a, tharuma rorelna inhnaitir hai;

⁴ saiha khuma zâl a, an ṭhungpha sei chunghaia inzi a, berâm ruol laia berâmte le sebâwng umna laia sebâwng tuoihai fa a;

⁵ ṭingṭanga zawmthâwtna hlahai sak a, David anga mâni ta dinga hla thlûk hmangruohai siem a;

⁶ berbu liena uoin dâwn a, hriek ṭhataka innâl hlakhai chu; nisienlakhawm, Josefhai rinumna leiin an lungngai nawh.

⁷ Chuongchun, tuhin sala fe hmasahai leh salah fêng an ta, inzihai hlimna bur bur chu bo tâng a tih.”

⁸ Lalpa, sipaihai Pathien chun, Lalpa Pathien chun ama le ama insâlin ṭawng ân khâm a: “Jakob chapona chu ka tirdak a, a lal inhai ka theida a; chuleiin, khuo le a sûnga um po pohai chu kân mantir ding a nih,” tiin.

⁹ In pakhatah mi sâwm an la um chun thi vawng an tih.

¹⁰ Chun, mithi sungkuo hnai an ruonghai râwtu ding ruonghai inhlawm dinga chu ina hung chun, insungrila mi pakhat kuomah chun, “I kuomah a dang an la um am?” tîng a ta. Ama chun, “an um ta nawh” tîng a ta. Chun ama chun, “To zing rawh, Lalpa hming chu ei sâm ding a ni si naw a,” la tîng a tih.

¹¹ Ngai ta u, Lalpa chun thu a pêk si a; chun, in lien chu chim rem rum a ta, in chîn khawm chu kak hek huk bawk a tih.

¹² Sakawrhai chu lungpui chungah an tlân ding am a nih? Chutaka chun miin sebâwngin hnuoi an inlet ding am a nih? Nangnîn rorêlna chu thina hloa le, felna chu sairam thingah in inchangtir hi;

¹³ nangni iengkhawmlo chunga lâwm a. “Eini hrâtnain a ni nâwm a ni kihai ei lâk?” tituhai.

¹⁴ “En ta u, Aw Israel sûngkuohai, nangni hi do dingin hnam hung inngîrsuotir ka ta, chun, Hamath khaw kawtsuoa inthawkin Araba vadung chenin suknawmnâng an ti cheu,” Lalpa, sipaihai Pathien chun a ti si a.