AMOS 5 - Pathien Lekhabu Inthieng (BSI)

Sim dinga kona

¹ Aw, Israel chihai, hi thu nangni sûnna dinga ka hril hi hre ro:

² “Nunghâk, Israel chu a tlu ta a, ngîr nâwk ta naw nih: a ram chunga chun pei thlâk a ni tah a nih, ama chu inngîrtir dingin tukhawm an um nawh.”

³ Lalpa Pathien chun hieng ang hin a ti si a: “Israel chihai kuoma chun, khawpui, sâng suokna khan, za mâksan a ta, khawpui, za suokna khan sâwm mâksan a tih”.

⁴ Lalpa chun Israel chihai kuoma chun hieng ang hin a ti si a: “Mi zawng unla, hring in tih;

⁵ nisienlakhawm, Bethel khuo chu zawng naw unla, Gilgala chun lût naw bawk unla. Beer-seba khuoah kai bawk naw ro; Gilgal khuo chu matheilovin sala manin a um ding a ni si a; Bethel khuo chu teplo hung nîng a tih.”

⁶ Lalpa chu zawng unla hring in tih, chuong naw chun, Josef inah mei angin hung suok a ta, kâng vawng a ta, Bethel khuoah a chun sukrêmtu ding tukhawm um naw ni hai;

⁷ rorêlna sairam thinga inchangtir a, felna chu hnuoia pei thlahai;

⁸ Siruk le Sizucho siemtu le thina deihlim zîngkâra inchangtirtu le, sûn chu zân inthima siemtu, tuisuoriet tuihai ko a, hnuoi chunga inluongtirtu chu, ama chu zawng unla, a hming chu Lalpa a nih,

⁹ kul chunga bohmangna hung tlung khawpa, mi hrâthai chunga bohmangna intluntu chu.

¹⁰ Kawtkhâra kâwktu chu an theida a, thu fel hriltu chu an tirdak a.

¹¹ Chuleiin, mi rimsihai sirdein bu in lâkpêk a, lung intieng inhai in bâwl a, nisienlakhawm, a sûngah chêng naw ti niu; grêp huon inhawihai in siem a, nisienlakhawm, a uoin dâwn naw ti niu.

¹² In bawsietnahai tamzie le, in suolnahai a nasatzie ka hriet si a; mi felhai suknawmna a, thamna la a, kawtkhâra tlasamhai an chantâwk nghatsantuhai.

¹³ Chuongchun, mi var chu chuong ang huna chun to zing a ta, hun ṭha naw a ni leiin.

¹⁴ In hring theina dingin ṭhat nawna zawng lovin, ṭhatna zawng unla; chun, in hril angin, Lalpa sipaihai Pathien chu in kuomah um a tih.

¹⁵ Suolna chu theida unla, ṭhatna ngaina unla, kawtkhâra rorêlna chu inngîr nghet ro; Josefhai laia hlabîkhai chunga chun Lalpa, sipaihai Pathien chun lunginsietna a nei el rawi mawh.

¹⁶ Chuleiin, Lalpa, sipaihai Pathien, Lalpa chun hieng ang hin a tih, “Khawlaidung lien po poah ṭap rak rakna um a ta, kawtthlêr po poah. ‘A va pawi de aw!’ tîng an tih; lusûn dingin loneituhai ko an ta, ṭap rak rak dingin ṭap thiemhai ko an tih.

¹⁷ Chun, grêp huon po poa chun ṭap rak rakna um a ta, nangni lai ka fethleng ding a ni si a,” Lalpain a tih.

¹⁸ Lalpa ni dittuhai, in chung a rik ie! Iengdinga Lalpa ni chu in dit am a na? Var ni lovin inthim a ni lem.

¹⁹ Sakeibaknei mâksan a, savawm intuokpui mi ang le, ina lût a, bang chunga kut innghat a, rûlin a chuk ang chu a nih.

²⁰ Lalpa ni chu var ni lovin inthim a ni naw ding am a nih? Thim sâtak, var hrim hrim khawm nei dêr lo.

²¹ In ruoiṭhehai ka theidain ka hmusit a, in inkhâwmpui ursûnahai chun lâwm bawk naw ning.

²² Anih, in pumrawhmang thilinhlân le in bu thilinhlânhai chu mîn hlân unla khawm, pawm naw ning a, in inremna ran thâu thilinhlânhai khawm ngaisak bawk naw ning.

²³ I ṭingṭang ri mawi chu ngai naw ningah, chuleiin, ka kuoma inthawkin i hla nasêtum chu la hmang rawh.

²⁴ Nisienlakhawm, rorêlnahai chu tuihai angin le felna chu vadungpui angin luong raw se.

²⁵ “Aw Israel sûngkuohai, kum sâwmli sûngin thlalêra khan inthâwinahai le thil inhlânhai ka kuomah in hung lâk am a nih?

²⁶ Anih, in laltak Sikkuth in Molok puon inhai le, in Kiun milimhai, in arasi pathien, mâni ta dinga in siem chu in phur a.

²⁷ Chuleiin, Damaska khaw khêltieng salah infetir ka ti cheu,” Lalpa, a hming sipaihai Pathien chun a tih.