AMOS 2 - Pathien Lekhabu Inthieng (BSI)

Moab

¹ Lalpain hieng ang hin a tih, “Moab bawsietna pathum leiin, anih, pali leiin, a hremna sukbo naw ning; Edom lal ruhai chu chinai ang hiela a raw leiin,

² chuleiin, Moab chungah mei tir ka ta, Kerioth lal inhai chu kâng vawng a ta; chun, Moab chu buoina le khêk ri le tawtawrâwt riin thîng a ta,

³ chu laia rorêltu chu sukbo ka ta, a mi lienhai po po chu, ama leh that ka tih,” Lalpa chun a tih.

Juda

⁴ Lalpain hieng ang hin a tih, “Juda bawsietna pathum leiin, anih, pali leiin, a hremna sukbo naw ning; Lalpa dân chu an pawm naw a, a thupêkhai chu an vawng naw a;

⁵ an pahai chîng hlak khêlhrilhai khan anni chu a ṭhuoi hmang leiin; chuleiin, Juda chunga chun mei tir ka ta, Jerusalem khaw lal inhai chu kâng vawng a tih,” tiin.

Israel chunga rorêlna

⁶ Lalpain hieng ang hin a tih, “Israel bawsietna pathum leiin, anih, pali leiin, a hremna sukbo naw ning; tangka mana mi fel an zawr lei le kekawk bun khat mana mi tlasam an zawr leiin;

⁷ rimsi lu chunga pilvut phul châk ngawi ngawi le, zainêmhai lampui sukkâwipêk hlakhai chu: chun, mi pakhat chu a pa leh nunghâk pakhat kuoma ka hming sukse dingin an fe hmunkhat hlak a!

⁸ maichâm tin bula puon siekham chunga chun an zâl hlak a, an Pathien ina chun mi an inchawitir manhai chun uoin an dâwn hlak a.

Samari siet ding thu

⁹ “Nisienlakhawm, anni hmaah Amor mihai sidar thing anga insâng le thingsaisuo anga hrât khawm kha ka sukbohmang ta a; a chungtienga a ra le, a hnuoitienga a zung khawm ka sukbo a.

¹⁰ Amor mihai ram chu nei dingin Aigupta rama inthawkin ka ṭhuoi suok cheu a, thlalêra khan kum sâwmli sûngin ka ṭhuoi cheu a.

¹¹ Chun, zâwlnei ni dingin in naupasalhai laia mi le Nazirit dâm ni dingin in tlangvâlhai laia mi ka siem a, Aw Israel nauhai, chuong ang chu a ni nâwm a nih?” Lalpain a tih.

¹² “Nisienlakhawm, Nazirit mihai kuomah uoin dâwn ding in pêk a, zâwlneihai kuomah, ‘Thu hril naw ro’, tiin thu in pêk a.

¹³ Ngai ta u, buphala sip, tawlailîr ichîl angin in hmuna khan chîl ka ti cheu.

¹⁴ Chun, mi tlân hrâthai hrâtna chu bo a ta, mi hrâtin a tha chu sukhrât thei bawk naw ni; mi hrâttak khawm inhum thei naw ni a,

¹⁵ thalngul hmangtu khawm chu ngîr thei bawk naw ni; ngalhrât mi khawm inhum thei bawk naw ni; sakawr chung chuong mi khawm inhum thei bawk naw nih;

¹⁶ chu nia chun mi thilthawtheitak laia mi huoisen khawm chu saruokin tlân hmang a tih,”Lalpain a tih.