2 TIMOTHE 3 - Pathien Lekhabu Inthieng (BSI)

Hun nuhnung tienga mihriem nunchan ding

¹ Chun, hi hi hre rawh, ni nuhnungahai chun hun khirtakhai hung um a tih.

² Mi mâni inhmangaitu dâm, tangka ngainatu dâm, intivei dâm, chapo dâm, Pathien hrilsetu dâm, nu le pa thuawi naw dâm, lâwm nachâng hre naw dâm, inthieng naw dâm,

³ hmangaina insiengpui nei naw dâm, mi nunrawng dâm, hêktu dâm, insûm thei naw dâm, mi ṭium dâm, ṭhat nuom dêr lo dâm,

⁴ vervêk dâm, thuhnung dâwn naw dâm, inngaihlu dâm, Pathien hmangai nêka mâni lâwmna chau hmangai lemtu dâm an ni ding a ni si a.

⁵ Pathien ngaisak hawina nei an ta, nisienlakhawm, a thilthawtheina chu awi naw ni hai; chuong ang chu nghatsan rawh.

⁶ Chuong ang laia mihai chu inahai lûta, suol rikphur nuhmei invêt deuhai sala man hlaktuhai kha an ni si a;

⁷ chuong ang nuhmeihai chu châkna tinrênga ṭhuoi hmang, inchûk rawp sia thutak hre phâk ngai naw an nih.

⁸ Chun, Janni le Jambriin Mosie an kal ang khan, chuong mihai khawm chun thutak hi an kal hlak, lungril se tah, ringna kawnga chun Pathien dit naw zawng mi an nih.

⁹ Nisienlakhawm, chu chau chu thaw naw ni hai, an invêtzie mi po po kuomah a hung inlang ding a ni si a, Janni le Jambri invêtzie ân lang ang khan.

Paulain Timothe kuomah um dân ding a hril

¹⁰ Nang ruok chun ka închûktirna dâm, ka um dân dâm, ka thiltum dâm, ka ringna dâm, ka dawtheina dâm, ka hmangaina dâm, ka selna dâm i hriet hle kha;

¹¹ mi mi suknawmnatna dâm, ka tuorna dâm leh; Antiokeia dâm, Ikonioma dâm, Lustraa dâm ka chunga thil hung tlunghai le suknawmnat ka tuorna kha, chuong po poa chun Lalpa chun a mi sandam ta si a.

¹² Anih, tûkhawm Krista Isua Pathien ngaisaka um tum taphawt chun suknawmnatnahai tuor bawk an tih.

¹³ Mi suol le hlêmtuhai ruok chu mihai hlêmin le hlêma umin suol zuol deu deu an tih.

¹⁴ Nisienlakhawm, nang chu, tû kuoma inchûk am i ni ti hrein, i thil inchûkhai le i hriet chienghaia chun um zing rawh:

¹⁵ Krista Isua ringna um lei chun sandamna hmu khawpa sukvar thei che Lekha Inthienghai chu i naupang laia inthawka hre tah i ni kha.

¹⁶ Pathien Lekha Thu tinrêng hi Pathien inthuok khuma pêk a ni a; inchûktir kawnga dâm, thiemnaw inchangtir kawnga dâm, kâwk kawnga dâm, felna inchûktir kawnga dâm a ṭhahnem bawk a nih;

¹⁷ Pathien mi chu, sin ṭha tinrêng thaw dinga kimtaka inthuomin, a famkim theina dingin.