2 TIMOTHE 1 - Pathien Lekhabu Inthieng (BSI)

Chibai bûkna

¹ Paula, Krista Isua hringna um tiemna thu chu hril kawnga Pathien dit zâwnga Krista Isu tirko chun:

² Ka nau dittak Timothe kuomah, Pathien ei Pa le Krista Isu ei Lalpa kuoma inthawka lunginsietna dâm, zângaina dâm, inremna dâm um raw se.

Lâwmthu le infuina

³ A mi thlatuhai chena sie le ṭha hrietna inthiengtak neia a rawng ka ibâwl hlak Pathien kuoma chun lâwmthu ka hril a nih; a sûn a zâna ka ṭawngṭainahaia chun ka hrietpui zing hlak che a,

⁴ lâwma ka sip theina dingin, i mitthlihai chu hre zingin hmu che ka nuom bêk bêk a nih.

⁵ Ringna tak tak nangmaa um chu ka hriet zing si a, chu ringna chu a tîrin i pi Loisiah a um a, i nu Eunikiah a um bawk a, nangmaa khawm a um ti indiktakin ka hriet.

⁶ Chuleiin, ka kut innghat leia Pathien thilpêk nangmaa um kha mût chawk dingin ka hril nawn che a nih.

⁷ Pathienin ṭitna thlarau a mi pêk naw a, thilthawtheina le hmangaina le lungril feltak neina thlarau a mi pêk lem a ni si a.

⁸ Chuongchun, ei Lalpa thu inhriettirna chu inzâpui naw la, ama mi intâng kei khawm hi mîn zâpui bawk naw rawh. Chanchin Ṭha leia rinum hi Pathien thilthawtheina ang angin mi tuorpui lem rawh.

⁹ Ama chun ei thilthawhai ang ni lovin, ama ruot le a lunginsietna ang lemin a mi sandam a, kona inthiengin a mi ko bawk a, chu lunginsietna chu leilung insieng hmâin Krista Isua chun ei kuoma pêk a ni tah;

¹⁰ chu chu a mi sandamtu Isu Krista inlârna leiin, tuhin suklangin a um tah. Ama chun thina chu sukbohmangin, Chanchin Ṭhain hringna le bohmang thei nawna a suklang tah;

¹¹ chu Chanchin Ṭha thu chu inhriettir dingin tlâng insampuitu le tirko le inchûktirtua ruot ka nih.

¹² Chu lei chun a nih hieng thilhai khawm hi ka tuor chu, nisienlakhawm, kân zak nawh, ka iâwi chu ka hriet a, a kuoma ka înkawltir chu chû nia ding chun a vawng ṭha thei ti indiktakin ka hriet bawk a.

¹³ Krista Isua um, ringna le hmangaina neiin thu indik dân ka bâua i hriethai kha nei tlat rawh.

¹⁴ Thil ṭha i kuoma inkawltira um kha, ei sûnga Thlarau Inthieng um hin vawng ṭha rawh.

¹⁵ Asia rama um po pohaiin an mi nghatsan ti ka hriet a, anni lai chun, Phugel le Hermogen an ṭhang a nih.

¹⁶ Lalpa chun Onesiphora sûnghai kuomah zângaina pe raw se; ama chun a mi sukhar rawp a, ka khaidiet bun khawm a mîn zâpui si naw a.

¹⁷ Roma a um lai khan nguntakin a mi zawng suok ta lem a nih.

¹⁸ (Chu nia chun Lalpa kuomah zângaina hmu dingin Lalpa chun ruot raw se) Ephesia rawng a bâwl nasat zie kha i hriet ta bawk a nih.