2 THESSALONIKA 1 - Pathien Lekhabu Inthieng (BSI)

Chibai bûkna

¹ Paula le Silvan le Timothe chun: Pathien ei Pa le Lalpa Isu Kristaa, Thessalonikaa kohranhai kuomah:

² Pa Pathien le Lalpa Isu Krista kuoma inthawka lunginsietna le inremna in kuomah um raw se.

Krista hung phaa rorêlna

³ Unauhai, nangni chungthua hin Pathien kuomah lâwmthu hril rawp ding hi kan ni hrim a; chu chu a âwm hrim a nih, in ringna chu nasataka inṭhang lienin, in rênga in inhmangai tuo sengna chu a pung nâwk zuol si a.

⁴ Chuongchun, suknawmnatna le rimsikna in tuornahai po poa in selna le in ringna hai lei khan, keini ngeiin Pathien kohranhai lai kan suong hlak cheu a nih.

⁵ Chuong chu Pathien rama mi ni tlâka ruot in ni thei ding a nih ti Pathien rorêl feltak inchikna fietak a nih, chu ram leia chu tuor in ni hi.

⁶ Chuongchun, hi hi Pathien ta dingin thil feltak a nih: a sukrinumtuhai cheu chu rinumnaa thung le;

⁷ nangni rinum tuortuhai chu, Lalpa Isu a vântirko hrâttakhai leh meichawk laia a hung inlang pha, keini le hin min châwltir le;

⁸ Pathien hre naw mi le ei Lalpa Isu Chanchin Ṭha awi lo mihai chunga phuba lâk chu.

⁹ Chuong mihai chun hrem tuor an tih: Lalpa kuoma inthawk le a hrâtna ropuinaa inthawka chatuona bohmangna chu;

¹⁰ chu ni, a mi inthienghaia chun chawimawia um ding le, ringtuhai po poa chun (kan thu inhriettir cheu kha in awi si a) makti dinga a hung nia chun.

¹¹ Chuong anga chawimawi le makti a ni theina dingin, ei Pathienin a kona cheua chun ko tlâk nia a ruot theina ding cheu le, ṭhat nuomna tinrênga le ringna sinthaw tinrênga thilthawtheinaa ân hlawtlingtir theina ding cheuin kan ṭawngṭaipêk rawp cheu a ni hi.

¹² Chuongchun, ei Pathien le, ei Lalpa Isu Krista lunginsietna ang peiin ei Lalpa Isu hming chu nangnia chun chawimawiin um thei a ta, nangni khawm amaa chun chawimawiin um thei in tih.