2 SAMUEL 9 - Pathien Lekhabu Inthieng (BSI)

Mephiboseth chunga David ngilneina

¹ Chun, David chun, “Jonathan leia lunginsietna kân langtir theina dingin Saula sûnghai laia mi um an la um am aw?” a ta.

² Chun, Saula sûnghai siehlaw pakhat a hming Ziba a um a, David kuoma fe dingin an ko a; chun, lal chun a kuomah, “Ziba i ni maw?” a ta. Chun, ama chun, “Ni e, kei i siehlawpa hi,” a ta.

³ Chun, lal chun, “Pathien lunginsietna ka suklang theina dingin Saula sûnghai laia mi an la um naw am a nih?” a ta. Chun, Ziba chun, “Jonathan chun naupasal pakhat a la nei a, a kehai khawm ân bai nghe nghe a,” a ta.

⁴ Chun, lal chun a kuomah, “Ama chu khaw lai am a um a?” a ta. Chun, Ziba chun lal kuomah, “Lo-debarah, Ammiel naupa Makir inah a um,” a ta.

⁵ Chuongchun, lal David chun mi a tir a, Lo-debara inthawk, Ammiel naupa Makir ina mi chu an va ṭhuoi a.

⁶ Chun, Saula nau Jonathan naupa Mephiboseth chu David kuoma chun a hung a, a hmaia hnuoi sikin chibai a bûk a. Chun, David chun, “Mephiboseth,” a ta. Ama chun, “En ta, i siehlaw hi,” a ti a, a dawn a.

⁷ Chun, David chun a kuomah, “Ṭi naw rawh, i pa Jonathan zârah lunginsiet ngei ngei ka ti che a, i pu Saula ram po po inneitir nâwk ka ti che a; chun, ka dawkânah buthlêng awt ve rawp ta hlak i tih,” a ta.

⁸ Chun, chibai a bûk a, “Kei, ui thitlaw ang el, i siehlaw hi ieng am a nia i ngaisak a ni leh?” a ta.

⁹ Chuongchun, lal chun Saula siehlaw Ziba chu a ko a, a kuomah, “Saula thil po po le, a sûnghai thilhai po po chu i pu naupa hi ka pêk vawng a nih.

¹⁰ Chun, a ta dingin hnuoi inletpêk i ta, nang le i naupasalhai le i siehlawhai leh; chun, i pu naupa chun fâk dinghai a nei theina dingin i thawsuokhai chu hung lâng i ta, i pu naupa Mephiboseth ruok hin chu ka dawkânah buthlêng awt rawp a tih,” a ta. Ziba chun naupasal sâwmpanga le siehlaw sâwmhni a nei a.

¹¹ Chuongchun, Ziba chun lal kuomah, “Lal ka puin a siehlaw kuoma thu a pêk ang po po hin i siehlaw hin thâwng a tih,” a ta. Lal chun, “Mephiboseth chun chu ka dawkânah lal naupa ang bawkin buthlêng awt vêng a tih,” a ta.

¹² Mephiboseth chun naupasal naupang hi a nei a, a hming chu Mika a nih. Chun, Ziba ina um po pohai chu Mephiboseth siehlawhai an na.

¹³ Chuongchun, Mephiboseth chu Jerusalema chun a um ta a, lal dawkâna chun buthlêng a awt ve rawp ta si a; a ke chu khinghnia inbai a nih.