2 SAMUEL 5 - Pathien Lekhabu Inthieng (BSI)

Israel ram chunga David lala inṭhungtira a um thu

¹ Chuongchun, Israel chihai po po chu Hebrona David kuomah an hung a, “Ngai ta, i ru le i taksahai kan na.

² Kha hmaa Saula kan chunga ân lal laia Israelhai ṭhuoi suok le ṭhuoi lûttu i ni hlak a; chun, Lalpa chun i kuomah, ‘Ka mi Israelhai chu châwm i ta, Israelhai chungah hotuin um i tih,’ a ti kha,” an ta.

³ Chuongchun, Israel upahai po po chu Hebrona chun lal kuomah an va fe a; chun, lal David chun Hebrona chun Lalpa hmaah an kuomah thu a thlung a, chun, David chu Israelhai chunga lal dingin hriek an nâl a.

⁴ David chu ân lal tîr lai chun kum sâwmthum mi a na, kum sâwmli sûng ân lal a.

⁵ Hebrona chun Judahai chungah kum sari le thla ruk ân lal a; chun, Jerusalemah Israelhai le Judahai po po chungah kum sâwmthum le kum thum ân lal bawk a.

Davidin Zion a lâk

⁶ Chun, lal le a mihai chu chu rama chêng Jebus mihai chu rûn dingin Jerusalemah an fe a; chuonghai chun David a hung lût thei naw ringin David kuomah, “Hitaka hin hung lût naw tawp i tih, mitdel le kebaihaiin lo dang an ti che,” an ta.

⁷ Nisienlakhawm, David chun Zion kul chu a lâk a, chu chu David khuo chu a nih.

⁸ Chun, David chun chu ni chun, “Jebus mihai that tumtu taphawt chu tuikawr zuiin hang fe hai sienla, David theidatu mitdel le kebai chu that raw hai se,” a ta. Chuongchun, “Mitdel le kebai chu ina chun lût naw nihai,” an ti hlak a.

⁹ Chun, David chu kula chun a um a, David khuo tiin ân bûk ta a. Chun, David chun Milloa inthawkin a vêlin kul a siem a, a sûngtieng leh.

¹⁰ Chuongchun, David chu a hung ropui ta deu deu a, Lalpa, sipaihai Pathien chu a kuoma a um pei leiin.

Hiramin David a hmêlhrietna

¹¹ Chun, Tura lal Hiram chun David kuomah mi a tir a, sidar thinghai a thawn a, themthiemhai le lung suttuhai a tir bawk a, David ta ding chun in an bâwlpêk a.

¹² Chun, David chun Lalpain Israelhai chungah lalah ama chu a sukdet a, a mi Israelhai leiin a ram chu a chawimawi a nih ti a hriet ta a.

Jerusalemah David nauhai an pieng

¹³ Chun, David chun Hebron a suoksan hnungin Jerusalema chun thaikêm le nuhmei a nei belsa a; chuongchun, David chun naupasalhai le naunuhmeihai a la nei sa ta rawp a.

¹⁴ Chun, Jerusalema a neihai hming chu hieng hi an nih; Sammua, Sobab, Nathan, Solomon,

¹⁵ Ibhar, Elisua, Nepheg, Japhia,

¹⁶ Elisama, Eliada, le Eliphelet hai hi an nih.

Davidin Philistinhai a tukdei

¹⁷ Philistin mihai chun David chu Israelhaiin lala um dingin hriek an nâl ti an hrietin Philistin mihai po po chu David zawng ding chun an hang fe ta a; David chun chu chu a lo hrietin a kulbînga chun a fe a.

¹⁸ Chun, Philistin mihai chu an hung a, Rephaim ruoma chun an inzar a.

¹⁹ Chun, David chun, “Philistin mihai thaw dingin kan hang fe ding am a nih? ka kuta hin anni chu pêng i ti?” tiin Lalpa a râwn a. Lalpa chun David kuoma chun, “Hang fe rawh, Philistin mihai chu i kutah ka pêk ngei ngei ding a nih,” a ta.

²⁰ Chuongchun, David chu Baal-perazima chun a fe a, chutaka chun David chun anni chu a hne a, “Lalpain ka hmêlmahai chu tuiting inṭhe ang elin ka hmaah a mi sukdarpêk tah,” a ta. Chuleiin, chu hmun hming ding chun Baal-perazim ân bûk a.

²¹ Chutaka chun Philistin mihai chun an milimhai an mâksan a, David le a mihai chun an lâk a.

²² Chun, Philistin mihai chu an hang fe nâwk a, Rephaim ruoma chun an inzar nâwk a.

²³ Chun, Davidin Lalpa a hang rawn chun, ama chun, “Hang fe naw rawh, an hnungtieng fe huol la, thingtheihmi kûng zâwna khin hang thaw rawh.

²⁴ Chun, thingtheihmi kûng lêra fe ri ṭhup ṭhup ang i hriet pha chun châng rawh, Philistin sipaihai thaw dingin i hmaah Lalpa a suok tah tina nîng a tih,” a ta.

²⁵ Chuongchun, Lalpain thu a pêk angin David chun a thaw a, Philistin mihai chu Gebaa inthawka Gezer chenin a that a.