2 SAMUEL 23 - Pathien Lekhabu Inthieng (BSI)

David thuhril nuhnungtak hai

¹ Hieng hi David thuhril nuhnung tak a nih, Jesai naupa David chun a hril a; “Insângtaka dawm sânga, Jakob Pathien hrieknâl, Israelhai hla mawitak phuoktu chun a hril a;

² Lalpa thlarau chun keima mi hmangin a hril a, A thu chu ka leiah a um a.

³ Israelhai Pathien chun a hril a, Israelhai lungpui chun: ‘Mi chunga feltaka rorêl hlaka, Pathien ṭi puma rorêl hlak chu,

⁴ Nisa a hung suok a, sûm um dêr lo, Zîng khawvar ang hi nîng a ta; Raw sûr zoa khuo hung inthienga, Hnuoia hlohna inder no hlap ang hi nîng a tih.

⁵ Ei sûngkuo chu Pathien kuoma inthawk a ni naw am a nih? Chatuon thuthlung ka kuomah a thlung a; Iengkim fel le suknghet tlatin; Ka sandamna kim le duthusâm kim, Ân der suoktir naw ding maw?

⁶ Mi rilohai chu an rênga a hnâwla hnâwlhmang mi, hling ang nîng an ta, Kuta lâk mi an ni si nawh.

⁷ A tâwktu ding chun thîr le fei ngul ruoi lem ding a na, Chuongchun, an hmuna rawhmang vawng nîng an tih,’ tiin a mi biek a,” tiin.

David a mihrânghai

⁸ Hieng hi David sipai huoisenhai hming chu a nih; Takemon mi Joseb-bassebeth chu sipai hotuhai laia hotu tak a na, ama chu ṭum khata mi za riet thattu Aznit mi Adino an ti bawk kha a nih.

⁹ Chun, a dawttu chu Aho mi naupa Dodai naupa Eleazar a na, ama chu Philistin mihai indo dinga an pungkhâwm a, an cho a, Israel mihai an fe hmang vawng laia David kuoma sipai huoisen pathumhai laia pakhat kha a nih.

¹⁰ Ama chu a tho a, Philistin mihai chu kut kham rak khawpin, a kâwlhnâm khawm inlet theilo rak khawpin a that a, chu ni chun Lalpain nasatakin a ngampêk a; chun, mipuihai chu a hnungah râllâk thil la ding ngawtin an hung kîr nâwk a.

¹¹ Chun, chu dawttu chu Hara mi, Agee naupa Samma a na. Dailuo umna hmunah Philistin mihai chu lâk tumin an inkhâwm a, chun, mipuihai chun Philistin mihai chu an tlânsiet san a.

¹² Nisienlakhawm, ama chu chu hmuna chun a ngîr a, a vêng tlat a, Philistin mihai chu a that a, chun, Lalpain nasatakin a ngampêk a.

¹³ Chun, sipai huoi sâwmthum laia pathumhai chu an zu fe a; bu sîk lai takin David kuomah Adullam pûkah an fe a; chun, Philistin sipaihai chun Rephaim kâwnah ṭhanghmun an khuor a.

¹⁴ Chuong lai chun David chu kulbîngah a um a, chuong lai bawk chun Philistin sipaihai chu Bethlehemah an um a.

¹⁵ Chun, David chun tui a châk êm êm el a, “Bethlehema tuisunsuo tui, kul kawtkhâr kâwla mi kha dâwn dinga mi pe um ta ve hai sienla aw,” a ta.

¹⁶ Chuongchun, sipai huoisen pathumhai chun, Philistin sipaihai chu an nêr thleng a, kul kawtkhâr kâwla mi, Bethlehema tuisunsuo chu an va thâl a; an chawi a, David kuomah an fepui a, nisienlakhawm, a lo dâwn nuom naw a, Lalpa ta dingin a bunthlâk ta lem a.

¹⁷ “Aw Lalpa, hi hi ka thaw naw dingzie chu, thi huoma fehai thisen chu ka dâwn ding am a nih?” a ta; chuongchun, a dâwn nuom ta naw a. Chuong thilhai chu sipai huoisen pathumhai chun an thaw a nih.

¹⁸ Zeruia naupa Joab unaupa Abisai chu sâwmthumhai laia hotu tak a na, ama chun za thumhai chunga chun a fei chu a phawi a, anni chu a that a, Pathumhai laia chun hming ṭhat a hlaw a.

¹⁹ Sâwmthumhai laia chun chawimawi tlâk tak a ni naw am a nih? Chuleiin, an hotuah an siem a, nisienlakhawm, a chunghnung tak pathum laia tiemsa a kai nawh.

²⁰ Chun, Kabzeel mi huoi naupa Jehoiada naupa Benaia thil nasatak thawtu chun Moab mi Ariel naupasal pahnihai chu a that a; chun, a zu fe a, vûr tlâk hun laiin khursûngah sakeibaknei a zu that bawk a.

²¹ Chun, Aigupta mi, mi lientak a that a; Aigupta mi chun a fei a chawi a, nisienlakhawm, ama chun hmawl chawiin a zuk pan a, Aigupta mi fei chawi chu a lâkpêk a, ama fei ma chun a sun hlum ta a.

²² Jehoiada naupa Benaia chun chuong ang thil chu a thaw leiin sipai huoisen pathumhai laia chun hmingṭhat a hlaw a.

²³ Mi sâwmthumhai nêk chun chawimawi tlâk a ni hrim a, nisienlakhawm, achunghnung tak pathumhai laia tiemsa a kai nawh. Chun, David chun ama vêngtu hotuah a sie a.

²⁴ Joab unaupa Asahel chu sâwmthumhai laia pakhat chu a na; Bethlehem khuoa mi Dodo naupa Elhanan,

²⁵ Harod mi Samma, Harod mi Elika,

²⁶ Palti mi Helez, Teko a mi Ikkes naupa Ira,

²⁷ Anathoth mi Abiezer, Husath mi Mebunnai,

²⁸ Aho mi Zalmon, Netophath mi Maharai,

²⁹ Netophath mi Baana naupa Heleb, Benjamin thla Gibea khuoa mi Ribai naupa Ittai,

³⁰ Pirathon mi Benaia, Gaas vadungtea mi Hiddai;

³¹ Arbath mi Abi-albon, Barhum mi Azmaveth;

³² Saalbon mi Eliaba, Jasen naupahai laia Jonathan;

³³ Harar mi Samma, Arar mi Sarar naupa Ahiam;

³⁴ Maakath mi Ahasbai naupa Eliphelet, Gilon mi Ahithophel naupa Eliam;

³⁵ Karmel mi Hezro, Arba mi Paarai;

³⁶ Zoba khuoa mi Nathan naupa Igal, Gad mi Bani;

³⁷ Zeruia naupa Joab râlthuom chawitu Ammon mi Zelek, Beeroth mi Naharai;

³⁸ Ithra mi Ira, Ithra mi Gareb;

³⁹ Hit mi Uria, an rêng chun sawmthum le pasari an nih.