2 SAMUEL 2 - Pathien Lekhabu Inthieng (BSI)

Juda ram chunga David lala inṭhungtira a um thu

¹ Chun, chu hnunga chun David chun, “Juda ram khâwlai amaniah ka hang fe ding?” tiin Lalpa a râwn a. Chun, Lalpa chun a kuomah, “Hang fe raw khai,” a ta. David chun, “Khâwlai am ka hang fe ding?” a ta. Chun, ama chun, “Hebronah,” a ta.

² Chuongchun, David chu chutaka chun a hang fe ta a, a nuhmeihai pahni Jezreel mi Ahinoam le Karmela Nabal nuhmei Abigail le khan.

³ Chun, David chun a kuoma mi um po pohai chu a ṭhuoi a, mi tin an sûngkuohai seng leh, Hebron khuoa chun an um a.

⁴ Chun, Juda rama mihai an va fe a, Juda mihai chunga lal dingin David chu hriek an nâl ta a. Chun, “Saula phûmtuhai chu Jabes-gilead mihai an nih,” tiin David chu an hril a.

⁵ Chuongchun, Jabes-gilead mihai kuoma chun David chun mi a tir a, an kuomah, “In lalpa Saula chu hi lunginsietna hi suklangin ama chu in lo phûm ta leiin Lalpa chun malsâwm raw se cheu.

⁶ Chuongchun, Lalpa chun in chungah zainêmna le thutak inlangtir sienla, hieng thil in thaw lei hin kei khawma in lunginsietna man chu thung ka ti cheu.

⁷ Chuongchun, in kuthai chu hung hrât sienla, huoitakin um ro, in lalpa Saula chu a thi ta si a; chun, Juda chihai chun an chunga lal dingin hriek an mi nâl ta bawk a,” a ta.

Saula sûnghai Davidin a do

⁸ Chun, Nera naupa Abner, Saula sipai hotu chun Saula naupa Isboseth chu Mahanaimah a ṭhuoi a,

⁹ Gilead chunga dâm, Asur mihai chunga dâm, Jezreel chunga dâm, Ephraim chunga dâm, Israel chung po poah lalah a siem ta a.

¹⁰ (Saula naupa Isboseth chu Israel chunga ro a rêl ṭan lai chun kum sâwmli mi a na, kum hni ro a rêl a). Nisienlakhawm, Juda mihai chun David chu an pawm lem a.

¹¹ Davidin Hebrona Juda chihai chunga ro a rêlna chu kum sari le thla ruk a ni ta a.

¹² Chun, Nera naupa Abner le Saula naupa Isboseth siehlawhai chu Mahanaima inthawk an suok a, Gibeonah an fe a.

¹³ Chun, Zeruia naupa Joab le David siehlawhai chu an fe suok a, Gibeon dîla chun an intuok a; chuongchun, pâwl khat chu dîl râl khingtieng chun an ṭhung a, pâwl khat dang chu dîl râl khingtieng chun.

¹⁴ Chun, Abner chun Joab kuomah, “Tlangvâlhai chu hung inthawkhai sienla, ei hmaa hin hang inthaw ta hai sienla,” a ta. Chun, Joab chun, “Hung inthawk e â,” a ta.

¹⁵ Chuongchun, an inthawk a, an ni zât chin ruot chie chu an kai a, Benjamin chi Saula naupa Isboseth tienga ṭhang chu sâwm le pahni; chun, David siehlawhai chu sâwm le pahni bawk.

¹⁶ An khingpuihai chu an lu sengah an inman a, mâni bitumhai chu an nâkah kâwlhnâmin an insun seng a; chuongchun, an tlu ta vawng el a; chuleiin, chu hmun chu Helkath-Hazurim an ti ta a; chu chu Gibeona um a nih.

¹⁷ Chuongchun, chu nia an inbei chu a nasa ta hle a, chun, Abner le Israel mihai chu David siehlawhai hmaa chun an tlâwm ta a.

¹⁸ Chun, chutaka chun Zeruia naupasalhai pathum Joab le Abisai le Asahel hai chu an um a, Asahel chu sazukpui ang ela ngal hrât a nih.

¹⁹ Chuongchun, Asahel chun Abner chu a hnawt a, Abner a hnawt chu changtieng le vawitieng khawm pêt hlek lovin a hnawt a.

²⁰ Chuongchun, Abner chu a hang nghale a, “Nang i ni maw Asahel?” a hei ti a. Chun, ama chun a dawn a, “Kei ka nih ie,” a ta.

²¹ Chun, Abner chun, a kuomah, “I changtieng amanih, i vawitieng amani khan pêt la, tlangvâl pakhat kha man la, a râlthuom kha lâkpêk rawh,” a ta. Nisienlakhawm, Asahel chun ama a hnawt chu a pêtsan nuom chuong naw a.

²² Chun, Abner chun Asahel kuomah, “Mi pêtsan rawh, iengdingin am sunthlûng ka ti che a? I unaupa Joab hmêl ka hmu ngam ding am a nih?” a ti nâwk a.

²³ Nisienlakhawm, a pêt nuom chuong naw a, chuleiin, Abner chun a feiṭhut tiengin a phîngah a sun a, a fei chu a hnungtieng a tlang a, chutaka chun a tlu ta tawp a, chu hmuna chun a thi ta a; chun, Asahel a tlûka a thina hmun hung tlung taphawthai chu chutaka chun an ngîr chawt pei a.

²⁴ Nisienlakhawm, Joab le Abisai chun Abner chu an hnawt pei a, chun, Gibeon thlalêr lampuia Gia dep Amma tlâng an tlung chun nisa a tla ta a.

²⁵ Chun, Benjamin mihai chu Abner kuoma chun an pungkhâwm a, pâwl khatah an insiem a, tlâng sîpa chun an va ngîr ta a.

²⁶ Chuongchun, Abner chun Joab chu a ko a, “Kumkhuoin kâwlhnâm hi ei inlet zing el ding am a ni? A tâwpna chu lunginzîngna ding chau a nih ti i hriet naw am a ni? Mipuihai chu ieng chen am an unauhai hnawt kîrsan dinga hril lovin i um ding a na?” a ta.

²⁷ Chun, Joab chun, “Pathien hringna sâlin ka hril a nih, iengkhawm lo hril naw la chu mipuihai chu zîngkâr khan an fe hmang ta ding a na, an unauhai chu an hnawt naw ding bah,” a ta.

²⁸ Chuongchun, Joab chun tawtawrâwt chu a hei mût a, mipuihai chu an ngîr ta ṭhuop a, Israel mihai chu an hnawt ta naw a, an do nâwk ta naw a.

²⁹ Chuongchun, Abner le a mihai chu chu zân chun zânkhawvârin an fe a, chun, Jordan an kai a, Bithron an fe thleng rak a, Mahanaim an tlung ta a.

³⁰ Chun, Joab chu Abner a hnawt chu a kîr ta a; chun, mipuihai po po a hei ko khâwm chun David rawihai sâwmpakuo le Asahel an lo kim ta naw a.

³¹ David rawihai ruok chun Benjamin mihai le Abner mihai chu za thum le sâwmruk an sukhlum a.

³² Chuongchun, Asahel ruong chu an lâk a, Bethlehema a pa thlânah an phûm a. Chun, Joab le a mihai chu zânkhawvârin an fe a, Hebron an tlung chun khuo a var a.