2 SAMUEL 18 - Pathien Lekhabu Inthieng (BSI)

Absalom thi thu

¹ Chun, David chun a kuoma mi umhai chu a tiem a, sipai sâng chunga hotu dâm, za chunga hotu dâm a siem a.

² Chun, David chun mihai chu a tirsuok a, hmun thuma ṭhea hmun khat chu Joab chun ân rawi a, hmun thuma ṭhea hmun khat chu Joab unaupa Zeruia naupa, Abisaiin ân rawi a, hmun thuma ṭhea hmun khat chu Git mi Ittai chun ân rawi a. Chun, lal chun mipuihai kuomah, “Keima ngei khawm in kuomah fe ve ngei ngei ka tih,” a ta.

³ Nisienlakhawm, mipuihai chun, “Fe ve lo e, keini rawi hi chu tlân hmang ta ang ni inla khawm, pawi ti naw ni hai a; chun, a chenve lai rau khawm hi va thi inla khawm an ûksak bar âwm naw a, nang chu keinirawi sîng tlukin i hlu si a, chuleiin, khawpuia inthawka mi ṭhangpui dinga inzosa zinga i lo um chu a ṭha lem a nih,” an ta.

⁴ Chun, lal chun an kuomah, “Ṭha in ti ang pei chun thâwng ka tih,” a ta. Chuongchun, lal chu kul kawtkhâr bula chun a ngîr a; chun, mipui po po chu za têl têl le sâng têl têl chun an suok ta zut zut el a.

⁵ Chun, lal chun Joab le Abisai le Ittai chu, “Keima leiin tlangvâl Absalom chu indawitakin va thaw ro khai,” tiin thu a pêk a. Mipui po poin Absalom chungchâng thuah lalin sipai hotuhai po po thu a pêk lai chu an hriet a.

⁶ Chuongchun, mipuihai chu Israel mihai chu do dingin indona hmun tieng chun an fe ta a; chun, an indona chu Ephraim rampui hnuoiah a nih.

⁷ Chun, chutaka chun David mihai hmaa chun Israel mihai chu an tlâwm ta a; chun, chutaka chun chu ni chun mi sîng hni zet an that a.

⁸ An indona chun chuong lai ram po po chu a huop vawng el si a, chu ni chun kâwlhnâm nêk hmanin rampui chun a lem tam lem a nih.

⁹ Chun, Absalom chun David mihai chu a vân tuokpui ta thut a. Chun, Absalom chu a sabengtung lien chi chungah a chuong a; chun, sabengtung chu thingsaisuo kau inbuktak hnuoiah a lût a, a lu chu thingsaisuoa chun ân tâng ta a, hnuoi tâwk lo, vân tâwk lo chun ân khai ta zing el a; chun, sabengtung hlak chu a fe pei ta a.

¹⁰ Chun, mi tuin amani a hmu a, Joab a hril a, “Ngai ta, thingsaisuoah Absalom inkhai zingin ka hmu,” a ta.

¹¹ Chun, Joab chun a hriltu kuoma chun, “Ngai ta, chu chu i hmu si a, iengdinga i sukhluma hnuoia i sukthlâk nghâl naw? chuong chun thaw la chu tangka sâwm le kâwngkhi ka pêk ding che bah,” a ta.

¹² Chun, mi chun Joab kuomah, “Tangka sâng khawm hmu ding ni lang lal naupa chungah ka kut thlâk naw hrim hrim ka tih; kan na hriet ngeiah lalin nang le Abisai le Ittai kuomah, ‘Tlangvâl Absalom chu tukhawma tâwk naw raw se,’ tiin thu a pêk si cheu a.

¹³ Ringumlotakin lo that ta ringawt inla, (lal kuoma chun iengkhawm thup thei a ni âwm si naw a) nang chu în sukfihlîm nâwk el âwm si a,” a ta.

¹⁴ Chuongchun, Joab chun, “Hieng hin chu i kuomah ka um zing thei naw tawp el a,” a ta, fei pathum a chawi a, thingsaisuo laia Absalom dama lo la umzing lungkhura chun a sun a.

¹⁵ Chun, Joab râlthuom chawitu tlangvâl sâwm chun an hung inhuol a, Absalom chu an sun a, an that ta a.

¹⁶ Chun, Joab chun tawtawrâwt a hei mût a, Israel hnawttu mipuihai chu an hung kîr ta a, Joab chun mipuihai chu a lo dang tlat el ta a.

¹⁷ Chun, Absalom ruong chu an lâk a, rampui hnuoia khursûng inthûktaka chun an peilût a, a chunga chun nasatakin lung an dêng khâwm a, chun, Israel mihai po po chu mâni puon in sengah an tlân ta a.

¹⁸ Absalom chun a dam laiin lal ruoma chun lung intieng a lo intieng diem ta a, “Ka hming a dei nawna dingin, naupasal khawm ka nei si naw a,” a ta. Chu lung intieng hminga chun ama hming ân puttir a, tu chen hin Absalom hriet zingna ti a nih.

Davidin Absalom thi thu a lo hriet

¹⁹ Chuongchun, Zadok naupa Ahimaaz chun, “Va tlân ka ta, Lalpain a hmêlma phuba a lâkpêk dân chanchin hi lal chu va hril ka tih,” a ta.

²⁰ Chun, Joab chun a kuomah, “Vawisûn chu chanchin chu va hril naw rawh, ni dangah chanchin chu la hril lem rawh, lal naupa chu a thi ta leiin, vawisûn chu chanchin iengkhawm va hril naw rawh,” a ta.

²¹ Chuongchun, Joab chun Kus mi kuoma chun, “Fe la, i thil hmu chu lal va hril raw le,” a ta. Chun, Kus mi chun kûnin Joab chu chibai a bûk a, a tlân ta a.

²² Chuongchun, Zadok naupa Ahimaaz chun Joab kuomah, “Iengkhawm ni sienla, Kus mi kha va hnawtzui ka tih,” a ti nâwk a. Chun, Joab chun, “Ka naupa, chanchin hril man chu i hmu âwm si naw a, iengdingin am tlân i ta?” a ta.

²³ Nisienlakhawm, ama chun, “Iengkhawm ni sien tlân ka tih,” a ta. Chun, ama chun a kuomah, “Tlân el raw le,” a ta. Chuongchun, Ahimaaz chu phaizâwl tieng lampuiah a tlân a, Kus mi chu a lekhêl a.

²⁴ Chuongchun, David chu daikawtkhâr pahni inkâra chun a lo ṭhung a; chun râl vêngtu chu kul kawtkhâr tuolpuo lem chung tieng chun a hang lâwn a, a hang ngha vêl a, mi pakhat a khât baka hung tlân a hmu a.

²⁵ Chun, râl vêngtu chu a khêk a, lal chu a hril a. Chun, lal chun “Mi pakhat bak a ni chun chanchin hung hril ding ni ngei a tih,” a ta.

²⁶ Chun, a hung vat vat a, a hung hnai ta deu deu a. Chun, râl vêngtu chun mi dang hung tlân a hmu nâwk a; chun, râl vêngtu chun kawtkhâr vêngtu chu a ko a, “En ta, mi dang ama khât bakin a hung tlân nâwk,” a ta. Chun, lal chun, “Ama khawm chun chanchin a hung intlun ve ding a ni chu,” a ta.

²⁷ Chun, râl vêngtu chun, “A hmasa lem tlân dân chu Zadok naupa Ahimaaz tlân dân ni âwmtakin ka hriet,” a ta. Chun, lal chun, “Ama chu mi ṭhatak a na, chanchin ṭhatak a hung intlun ding nîng a tih,” a ta.

²⁸ Chun, Ahimaaz chun a ko a, lal kuomah, “A ṭha vawng ie,” a ta. Chun, a hmaia hnuoi sikin lal hmaa chun chibai bûkin a kûn a, “Lalpa, ka lalpa thaw tuma kut thlâk tumtuhai lo dangtu Lalpa i Pathien chu inpâkin um raw se,” a ta.

²⁹ Chun, lal chun, “Tlangvâl Absalom kha a la dam de maw?” a ta. Chun, Ahimaaz chun a dawn a, “Joabin lal siehlaw, kei i siehlaw ngei hi a mi tirsuok laiin an buoi mur mur ka hmu a; nisienlakhawm, ieng ang char a ni chu ka hriet nawh,” a ta.

³⁰ Chun, lal chun, “Ka sîra hin la hung ngîr hri ta,” a ta. Chun, a sîra chun a hung ngîr a.

³¹ Chun, ngai ta, Kus mi chu a hung tlung a; chun, Kus mi chun, “Lalpa, ka lalpa ta dingin chanchin ka hung intlun a nih, i chunga helhai po po phuba chu Lalpain vawisûn hin a lâkpêk ta che a nih,” a ta.

³² Chun, lal chun Kus mi kuoma chun, “Tlangvâl Absalom chu a la dam de maw?” a ta. Chun, Kus mi chun a dawn a, “Lalpa ka lalpa hmêlmahai le i sietna zawngtuhai po po chu chu tlangvâl ang chun um vawng raw hai se,” a ta.

Davidin Absalom a sûn

³³ Chuongchun, lal chu a lunginzîng ta hle el a, kul kawtkhâr chunga pindana chun a hang fe a, a ṭap a; chun, a hang fe malam chun, “Aw, ka naupa Absalom, ka naupa, ka naupa Absalom, i aia chun kei hi hang thi lem lang aw, Aw Absalom, ka naupa, ka naupa!” a ta.