2 SAMUEL 17 - Pathien Lekhabu Inthieng (BSI)

Ahithophel a rophuok Husaiin a suksietpêk

¹ Chu naw khawm chu Absalom kuomah Ahithophel chun, “Tuhin mi sîng khat le sâng hni thlang suok ka ta, chun, vawizân hin David chu hnawt dingin inthawk ka tih;

² a châu lai le a hrâtnaw laitak va nangchîng ka ta, va sukṭîng ka tih, chuongchun, a kuoma mi um po pohai chu tlân hmang an ta; chuongchun, lal chau chu va that el ka tih;

³ chun, mipuihai chu i kuomah hung ṭhuoi kîr vawng ka ta, i mi zawng chu mi po po hung kîr tluk a nih; chuongchun, mi po po inremin um tâng an tih,” a ta.

⁴ Chuongchun, chu thu chun Absalom le Israel upahai po po chu a suklâwm ta hle a.

⁵ Chun, Absalom chun, “Tu hin Ark mi Husai chu ko ve phawt unla, a hril ve dân lo ngai phawt ei tih,” a ta.

⁶ chun, Husaiin Absalom kuom a hung tlung chun, Absalom chun, “Ahithophel chun hieng ang hin a hril a, a hril ang hin kan thaw ding am a nih? Thaw naw ding ni ta ang inla, nangin hang hril ve ta khai,” a ta.

⁷ Chun, Husai chun Absalom kuomah, “Tuta ṭuma Ahithophel remruot hi a ṭha naw a nih,” a ta.

⁸ Chun, Husai chun, “I pa le a mihai chu i hriet a, sipai huoitak, mi kâwlhrâwngtak, phûla savawm a tê manpêk ang el an na; chun, i pa hi indo mi a na, mipui lai chun riek khawm riek kher naw ni.

⁹ Ngai ta, tu khawm hin khaw lai khursûnga manih, khawlai hmuna manih ân bi zing a ni ding a na; chun, an inthaw tîra mi ṭhenkhat an tlu nuol chun a hre taphawtin, ‘Absalom zuituhai chu an that ṭeu el ie,’ ti el an ta.

¹⁰ Chuongchun, mi huoisentak, sakeibaknei lungril ang put mi meu khawm lo ṭîng a ta, Israel mi po po hlak chun i pa chu sipai huoitak a ni le a kuoma mi umhai chu mi huoisentak tak an ni ti an hriet vawng si a.

¹¹ Keia remruot ve dân chu, Israel mi po po chu Dana inthawkin Beer-seba tlung rakin an tamzie tuipui kama phaiphin zât zetin i kuomah ko khâwm la; chun, indonaa khawm chun nang meu khawm fe ve la.

¹² Chuongchun, khâwlai hmuna khawm ei tuok fûkna taphawtah hnuoia dâidâw tla ang elin bâwng ei ta, chun, ama le a kuoma mi umhai po po chu pakhat khawm hla nâwng ei tih.

¹³ Chu nawa khawm khuoa a lût chun, Israel mi po po, hruihruol chawiin chu khuoa chun va fêng ei ta, lung chiterek khawm um lo khawp rauin vadungah hnûkthla vawng ei tih,” a ti nghâl bawk a.

¹⁴ Chuongchun, Absalom le Israel mi po pohai chun, “Ark mi Husai remruot chu Ahithophel remruot nêk chun a ṭha lem,” an ti ta a. Lalpa chun Absalom chunga chun thil ṭha naw ân tlungtir theina dingin Lalpa chun Ahithophel remruot ṭhatak chu letthla dingin a lo ruot ta hrim a nih.

¹⁵ Chuongchun, Husai chun thiempu Zadok le Abiathar kuomah, “Chuong ang khâng ang chun Ahithophel chun Absalom le Israel upahai chu rem a ruotpêk a; chun, keiin chuong ang khâng ang chun rem ka ruot bawk a.

¹⁶ Chuleiin, ‘Vawizân chu thlalêra vadung kaiahai riek ta lovin kân ngei ngei rawh, chuong naw chun lal le a kuoma um po pohai chu sukbohmang vawng rawi an tih,’ tiin David chu inhriltir vak ro khai,” a ta.

¹⁷ Jonathan le Ahimaaz chu En-rogelah an um a, suoknu pakhat hin anni chu a va hril hlak a na, chun, anni chun lal David chu an va hril nâwk sâwng hlak a; khawpuia an lût chu tukhawma hmu lo ding a nih.

¹⁸ Nisienlakhawm, naupangin a lo hmu a, Absalom chu a hril a; chuongchun, an pahni chun an tlân hmang ta vat a, Bahurima mi pakhat, a tuola tuisunsuo nei mi pakhat kâwlah an va fe a, tuisunsuoa chun an lût ta a.

¹⁹ Chun, nuhmeiin tuisunsuo sînnain a sîn a, a chunga chun bu a em a, tu hriet thei khawm a ni nawh.

²⁰ Chun, Absalom siehlawhai chu chu ina nuhmei kuoma chun an va fe a, “Ahimaaz le Jonathan kha khaw lai am?” an ta. Chun, nuhmei chun an kuomah, “Vadung kai tâng an tih,” a lo ti a. Chun, an va zawng a, an hmu naw a, Jerusalemah an kîr nâwk ta a.

²¹ Chun, an fe liem hnung chun tuisunsuoa inthawk chun an hung suok a, lal David chu an va hril a, David kuoma chun, “Suok unla, vadung chu kai vak ro, hieng ang hin Ahithophel chun a phier cheu a nih,” an ta.

²² Chuongchun, David le a kuoma mi um po pohai chu an suok a, Jordan vadung an kai a, khuo a hung var chun pakhat khawm Jordan vadung kai lo an um nawh.

²³ Chun, Ahithophel chun a remruot ang chu an pawm nawh ti a hrietin a sabengtung chu a siem a, a suok a, a khuo tieng a fe ta a, a sûnghai khawsak dân ding a ruotpêk diem a, ân âwkhlum ta a; chuongchun, a thi a, a pa thlânah an phûm ta a.

²⁴ Chun, David chun Mahanaim a va tlung a. Chun, Absalom chun a kuoma Israel mi po pohai leh Jordan vadung an kai a.

²⁵ Chun, Absalom chun, Joab aiah Amasa chu sipaihai hotuah a sie a. Amasa chu mi pakhat a hming Ithra, Ismael mi, Joab nu Zeruia zuorpuinu Nahas naunu Abigail pâwltu naupa a nih.

²⁶ Chun, Absalom le Israel mihai chun Gilead rama chun ṭhanghmun an va khuor a.

²⁷ Chun, Davidin Mahanaim a tlung chun Ammon mi Rabba khuoa mi Nahas naupa Sobi hai, Lodebar khuoa mi Ammiel naupa Makir hai, Rogelim khuoa Gilead mi Barzillai hai chun,

²⁸ khumhai dâm, maihûnhai dâm, pil bêlhai dâm, bu dâm, buṭei dâm, beiphit dâm, bu zêu dâm, dailuo dâm, bê dâm,

²⁹ khuoizu dâm, bâwng nêne kîng dâm, berâm le bâwng nêne kîng thûm dâm, David le a kuoma mi umhai fâk dingin an hung chawi a, “Mipuihai chu thlalêra chun an phîngṭamin an chauin an dang châr êm êm ta a nih,” ti a ni si a.