2 SAMUEL 16 - Pathien Lekhabu Inthieng (BSI)

¹ David chun tlâng sîp lâwn suokna a khêl dep chun, ngai ta, Mephiboseth siehlaw Ziba chun a lo tuok a, sabengtung pahni a hmang a, bei tlang zahni le grêp emṭâwl bâwr za le nipui thei za le uoin peng khat ân phurtir a.

² Chun, lal chun Ziba kuoma chun, “Hieng hi iengtizie am a ni a?” a ta. Ziba chun, “Sabengtunghai hi lal sûnghai chuongna ding nîng a ta, bei le nipui theihai hi tlangvâlhai fâk ding nîng a ta; uoin hi chu thlalêra châu taphawthai dâwn ding nîng a tih,” a ta.

³ Chun, lal chun “Anleh, i pu naupa chu khâwlai am?” a ta. Ziba chun lal kuomah, “Ngai ta, Jerusalemah a um, ‘Vawisûn hin Israelhai chun ka pa ram an mi pêk nâwk ding a nih,’ a ti nghe nghe annâw,” a ta.

⁴ Chun, lal chun Ziba kuoma chun, “Ngai ta, Mephiboseth thil nei po po chu i ta vawng a ni tah,” a ta. Chun, Ziba chun, “Chibai ka bûk takzet che a nih, aw lalpa ka pu, i mit tlunga um pei tum ka tih,” a ta.

⁵ Chun, lal Davidin Bahurim a tlung chun, ngai ta, Saula sûnghai laia mi Gera naupa a hming Simei a hung suok a, ṭawngsie inphur pum peiin a hung suok a.

⁶ David chu lungin a dêng a, lal David siehlawhai po po khawm chu; chun, mipui po po le sipai huoisenhai po po chu a changtieng le a vawitieng an um a.

⁷ Chun, Simei chun ṭawngsie ân phur sûng chun hieng hin a hril a, “Fe hmang dai rawh, fe hmang dai rawh, nang thisen insuo hmang le Belial mihriempa,

⁸ a rorêl âi i rêl tah Saula sûnghai thisen chu Lalpain i chungah a hung inlettir ta a; chun, Lalpain ram chu i naupa Absalom chu a pêk ta a; chun, ngai ta, thisen insuohmang i ni leiin nangma pawi chu nang bawkin i tâwk a nih,” a ta.

⁹ Chuongchun, Zeruia naupa Abisai chun lal kuomah, “Iengdinga hi ui thitlaw hin ka lalpa lal chu ṭawngsie ân phur mei mei am a ni a? a lu va tan el ka ti aw?” a ta.

¹⁰ Nisienlakhawm, lal chun, “Nangni Zeruia naupasalhai, nangni mi lo hrietpêk ding ieng am a um a? Lalpain a kuomah, ‘David chu ṭawngsie inphur rawh,’ a ti si chun inphur el raw se, ‘Iengdinga chuong anga i thaw am a ni leh?’ tuin am ti hlak an ta?” a ta.

¹¹ Chun, David chun Abisai le a siehlawhai po po kuoma chun, “Ngai ta u, ka naupa ka rîla ra ngei chun mi that a tum a na, hi Benjamin mi hin a va tum nasa nâwk zuol âwm de! Iengkhawm law naw unla, ṭawngsie chu inphur el raw se; Lalpa inthawtir a ni si a.

¹² Lalpa chun ka rimsikzie hi hung hmûng a ta. Lalpa chun vawisûna hienga ṭawngsie a mîn phur hi a ṭha tiengin a mi hung thung el khawm a ni thei a nih,” a ta.

¹³ Chuongchun, David le a mihai chu lampuia chun an fe pei ta a; chun, Simei chu an râla tlâng panga chun a fe ve pei a, a fe malam chun ṭawngsie chu ân phur pei a, lunghai dâmin a dêng a, pilvut dâmin a the a.

¹⁴ Chun, lal le a kuoma mi um po pohai chun Aiphim an tlung a, chutaka chun an châwldam ta a.

¹⁵ Chun, Absalom le mipui po po, Israel mihai chu Jerusalemah an fe a, chun, a kuomah Ahithophel khawm a ṭhang a.

¹⁶ Ark mi Husai, David ruolpa chun Absalom kuom a tlung chun, Husai chun Absalom kuomah, “Pathienin laltak humhim raw se, Pathienin laltak humhim raw se,” a ta.

¹⁷ Chun, Absalom chun Husai kuomah, “Hieng ang hi a ni maw i ruol i lunginsiet dân chu? Iengdinga i ruolpa kuoma i fe naw am?” a ta.

¹⁸ Chun, Husai chun Absalom kuomah, “Fe naw ning ah, Lalpa le hieng mipui le Israelhaiin an ithlang thu thuin um ka ta, a kuomah um lem ka tih.

¹⁹ Chun, tu rawng am ka bâwl ding a na? Naupa hmaah rawng ka bâwl ding a ni naw am a nih? I pa hmaa rawng ka bâwl ang khan i hmaah bâwl ka tih,” a ta.

²⁰ Chuongchun, Absalom chun Ahithophel kuoma chun, “Iengtin am ka thaw ding a na, i ngaidân hril ta?” a ta.

²¹ Chun, Ahithophel chun Absalom kuomah, “I pa thaikêm in nghâka siea umhai kuoma chun va lût rawh; chun, Israel mi po poin i pain a thîm che ti hrieng an ta, chuongchun, nanga tienga ṭhang po pohai kut chu a hung hrât ding a nih,” a ta.

²² Chuongchun, Absalom ta ding chun in chungah puon in an zar a; chuongchun, Israel mi po pohai mithmuah a pa thâikêmhai kuoma chun a lût a.

²³ Chuong laia rem a ruot, Ahithophel remruothai chu, Pathien thu ngai anga ngai a ni hlak a, chuong ang bawk chun, Ahithophelin David le Absalom rem a ruotpuihai po po chu ngai a ni hlak.