2 SAMUEL 14 - Pathien Lekhabu Inthieng (BSI)

Absalom a kirnâwkna dinga Joab remruot

¹ Zeruia naupa Joab chun lal lungril chu Absalom chungah ân nghat ti a hriet a.

² Chuongchun, Joab chun Tekoa khuoah mi a tir a, chutaka nuhmei var pakhat chu a vân ṭhuoitir a, a kuomah, “Lusûn angin insiem la, lusûnna puon sil la, sahriek khawm innâl lovin, nuhmei sâwttak mithi sûn ta angin um rawh;

³ chun, lal kuomah fe la, a kuomah hieng ang hin thu va hril raw aw,” a ta. Chuongchun, Joab chun thu chu a hril ta a.

⁴ Chun, Tekoa khuoa nuhmei chun lal kuoma thu hril ding chun hmaia hnuoi sikin chibai a bûk a, a bawkkhup a, “Aw lalpa, mi ṭhangpui rawh,” a ta.

⁵ Chun, lal chun a kuomah, “Ieng am a ni leh?” a ta. Chun, ama chun a dawn a, “Hmeithai ka ni a, ka pasal chu a thi ta a.

⁶ Chun, i suoknu hin naupasal pahni ka nei a, an pahni chun loah an insuol a, tukhawm a ṭheltu ding an um si naw a, a pakhat chun pakhat dang chu a vuok a, a sukhlum ta a.

⁷ Chun, ngai ta, an sûngkuo po po chun i suoknu hi an do hrawn a, ‘A unaupa thattu chu, a unaupa a that leia kan that ve theina dingin mi pe raw khai, chuongchun, rohluotu ding khawm sukbohmang nghâl kan tih,’ an ta; chuongchun, ka meiling la um sun chu sukhlum an ta, ka pasal chu hnuoi chunga hming le thla hrim hrim nei lovin a um el ding a nih,” a ta.

⁸ Chun, lal chun nuhmei kuoma chun, “I inah fe ta la, i chungchâng thua chun thu pe el ka ti che,” a ta.

⁹ Chun, Tekoa khuoa nuhmei chun lal kuoma chun, “Aw lalpa, ka pu, bawsietna maw chu keia chunga le ka pa sûnghai chungah tla el raw se; chun, lal le lalṭhungpha chun maw chu phur naw raw se,” a ta.

¹⁰ Chun, lal chun, “Tukhawm i chunga ieng amanih hril taphawt chu ka kuomah hung ṭhuoi la, tâwk nâwk ta naw tawp an ti che,” a ta.

¹¹ Ama chun, “Thisen insuotuhai chunga phuba latuhaiin sukbohmang ta lo dingin lal chun Lalpa i Pathien chu hre zing raw se aw; chuong naw chun chu ka naupa hi sukbohmang rawi an tih,” a ta. Chun, ama chun, “Lalpa hringna sâlin ka hril a nih, i naupa samzai pakhat khawm hnuoia hin tla naw nih,” a ta.

¹² Chuongchun, nuhmei chun, “Ka hni che hi, i suoknu hin lalpa ka pu kuoma hin thu bau khat chau hang hril nâwk raw se,” a ta.

¹³ Ama chun, “Hril ta la,” a ta. Chun, nuhmei chun, “Annawleh, ieng leia Pathien mihai dodâla hienga thaw i tum am a ni a? Hieng thua inthawk hin lal chu thiemnaw chang angin ân lang a nih, lal chun a mi tlân hmang chu a ṭhuoikîr nâwk si naw lei hin.

¹⁴ Ei thi ngei ngei ding a na; chun, tuisik hnuoia inbaw tahnung rût nâwk thei ta lo ang hi ei na. Pathienin hringna hi a lâk hmang a ni naw a, a tlân hmang chu amaa inthawka mi hran a ni nawna dingin rem a ruot a ni lem a nih.

¹⁵ Chuongchun, lalpa, ka pu kuoma hi thu hril dinga ka hung khawm hi mi ka ṭi lei a na, chun, i suoknu chun lal kuoma hin hril phawt ka ta, lal chun a suoknu hnina chu ân hlawtlingtir rawi mawh.

¹⁶ Lal chun kei le ka naupa hi Pathien ro hluo lo dinga mi sukbohmang tumtu kuta inthawkin i suoknu hi sansuok dingin lo ngaisak i tih ka ti a.

¹⁷ Chuongchun, i suoknu ta ding hin, lalpa, ka pu thu chu lungmuongumtak ni sienla, ka hni che a nih, a sie a ṭha lo thlier dingin lalpa ka pu chu Pathien vântirko ang el a ni si a; chun, Lalpa Pathien chu i kuomah um raw se, ka ti a nih,” a ta.

¹⁸ Chun, lal chun a dawn a, nuhmei kuoma chun, “Ka îndawn taphawt che chu ka kuomah iengkhawm ip naw raw aw,” a ta. Chun, nuhmei chun, “Lalpa ka pu chun hril raw se chu,” a ta.

¹⁹ Chun, lal chun, “Hieng thua hrim hin Joab hin ṭhangna a nei am?” a ta. Chun, nuhmei chun a dawn a, “Lalpa ka pu, i thlarau hringna sâlin ka hril a nih, lalpa ka pu hin a hril taphawt chu tukhawma vawitienga manih, changtienga manih an fe khêl thei âwm naw a, i siehlaw Joab chun a mi tir a, hieng thuhai po po hi i suoknu hi a hril vawng a nih;

²⁰ thil umdân sukdanglam dingin i siehlaw Joab chun hieng thil hi a thaw a nih; chun, ka pu chu khawvêla thil um po pohai hre theiin Pathien vântirko ang elin a var a nih,” a ta.

²¹ Chun, lal chun Joab kuomah, “Ngai ta, tuhin hi thil hi ka thaw ve ta a, chuleiin, tuhin fe la, tlangvâl Absalom chu va ṭhuoi nâwk raw le,” a ta.

²² Chun, Joab chu hmaia hnuoi sikin a bawkkhup a, chibai a bûk a, lal chun mal a sâwm a; chun, Joab chun, “Aw lalpa, ka pu chun a siehlaw hnina chu ân hlawtlingtir leiin vawisûn hin i siehlaw hin i mit ka tlung a nih ti ka lo hriet ta a,” a ta.

²³ Chuongchun, Joab chu a tho a, Gesura chun a fe a, Absalom chu Jerusalema chun a hung ṭhuoi ta a.

²⁴ Chun, lal chun, “Ama in tieng fe sienla, ka hmêl chu hung hmu naw raw se,” a ta. Chuongchun, Absalom chu ama in tieng chun a fe a, lal hmêl chu a hmu ta naw a.

²⁵ Tuhin Israelhai po po lai Absalom ang hrima hmêl ṭhata inpâk hlaw tukhawm an um naw a, a ke lêra inthawka a lusîp chenin sawisêlna hrim hrim a um naw a.

²⁶ A lu a vâw chun (kum khat peiah a vâw hlak a, a sam chu a rik êm leiin a vâw hlak a nih) a sam chu a bûk hlak a, lal bûk dâna shekel za hni a tling hlak a nih.

²⁷ Chun, Absalom chun naupasal pathum le naunuhmei pakhat a nei a, a hming chu Tamar a na, hmêl ṭhatak a nih.

²⁸ Chuongchun, Absalom chu kum hni pumhlûm Jerusalemah a um a, nisienlakhawm, lal hmêl hrim hrim chu a hmu naw a.

²⁹ Chuongchun, Absalom chun lal kuoma tir dingin Joab chu ân cha a; nisienlakhawm, a fe nuom naw a; chun, ân châ nawn nâwk a, nisienlakhawm, a fe nuom chuong naw a.

³⁰ Chuongchun, a siehlawhai kuomah, “I aw, Joab lo chu ka lo kâwl a na, buṭei a nei a, va rawpêk vawng ro,” a ta. Chuongchun, Absalom siehlawhai chun lo chu an va raw ta a.

³¹ Chuongchun, Joab chu a tho a, Absalom kuomah a ina chun a fe a, a kuomah, “Iengdinga i siehlawhaiin ka lo an raw am?” a ta.

³² Absalom chun Joab chu a dawn a, “Ngai ta, ‘Iengdinga Gesura inthawka hung am ka ni a? Chutaka chun um zing lang ka ta dingin a ṭha lem ding bah,’ tia lal kuoma tir dingin kân cha che a, chuleiin, lal hmêl chu mîn hmutir raw khai, chun, bawsietna nei ka lo ni chun mi sukhlum el raw se,” a ta.

³³ Chuongchun, Joab chu lal kuoma chun a fe a, a hril a; chun, Absalom chu a ko a, lal kuomah a fe a; chun, lal hmaa chun hmaia hnuoi sikin a bawkkhup a; chun, lalin Absalom chu a fâwp ta a.