2 SAMUEL 10 - Pathien Lekhabu Inthieng (BSI)

Ammon mihai le Suria mihai hneha an um thu

¹ Chun, chuong hnunga chun Ammon thlahai lal chu a thi a, a naupa Hanun chu a aiawin ân lal a.

² David chun, “A pa chun a mi lo lunginsiet angin kei khawma Nahas naupa Hanun chu lunginsiet vêng ka tih,” a ta. Chuongchun, David chun a pa chungchâng thua thlamuon dingin ama mihai a tir a. Chun, David mihai chun Ammon mihai ram chu an va tlung a.

³ Nisienlakhawm, Ammon mi lusahairawi chun an lal Hanun kuoma chun, “David hin i pa ân za leiin i kuoma hin thlamuontu a hung tir niin i ring am a ni? David hin khawpui a hne theina dingin a siehlawhai khawpuia hin enthlatu le enfietu dingin a hung tir a ni lem naw am a nih?” an ta.

⁴ Chuongchun, Hanun chun David mihai chu a man a, an khâkhmul chenve a vâwpêk a; chun, an silfênhai chu a laitakah an mawng tlung chauin a tanpêk bawk a, ân fetir ta a.

⁵ Chun, David chu an hang hril chun, a tuok dingin mi a tir a, anni chu an inzak hle el si a. Chun, lal chun, “In khâkhmulhai a mâwng sei hma po chu Jerikoah um hri unla, chu hnunga chun hung de ti niu,” a ta.

⁶ Chun, Ammon mihai chun David theida zâwng an lo ni tah ti an hung inhriet chun Beth-rehoba mi Suria mihai le Zobaa mi Suria mihai, sipai sîng hni le, lal Maaka mi sîng khat leh, Topa mihai sîng khat le sâng hni leh an incha a, an ruoi a.

⁷ Chun, David chun chu chu a hrietin Joab le sipai huoisenhai po po a tir a.

⁸ Chun, Ammon mihai chu an hung suok a, khaw lûtna kawtkhâr tienga chun ṭhanghmun an siem a; chun, Zoba mihai le Rehoba mihai Suria mihai le Toba le Maaka mihai ruok chu a tumin phûlah an um a.

⁹ Chuongchun, an hma tieng le an hnungtieng an hung thaw ding a ni ti Joabin a hriet chun Israel mihai laia a ṭha ṭha a thlangsuok a, Suria mihai chu do dingin ṭhanghmun a lo khaw a.

¹⁰ Chun, mi dang po po chu a unaupa Abisai kutah a sie vawng a, Ammon mihai chu thaw dingin ṭhanghmun a khaw bawk a.

¹¹ “Suria mihai hi ka hne naw ding chun nangin mi ṭhangpui i ta, chun, nangin Ammon mihai hi i hne naw ding chun hung ṭhangpui ka ti che.

¹² Huoitakin um unla, ei mihai le ei Pathien khuohai sanin insuk pasal ei tiu; chun, Lalpa chun ṭha a ti ang peiin thaw raw se,” a ta.

¹³ Chuongchun, Joab le a kuoma mihai chun Suria mihai chu do dingin indona hmun tieng chu an va hnai a; chun, a hmaa chun an tlânsie a.

¹⁴ Chun, Ammon mihai chun Suria mihai an tlânsie ti an hriet chun anni khawm chu Abisai hmaa chun an tlânse ve ta a; khuoa chun an lût a. Chun, Joab chun Ammon mihai chu a kîrsan a, Jerusalemah a fe ta a.

¹⁵ Chun, Suria mihaiin Israelhai hmaa chun an chan a hung chau tah ti an hriet chun an inpun khâwm a.

¹⁶ Chun, Hadadezer chun mi a tir a, Vadung khêla Suria mihai chu a ṭhuoi suok a, Hadadezer sipai hotu Sobak chun hma a ṭhuoi a; Helamah an hung a.

¹⁷ Chun, chu chu David an hril a; chun, ama chun Israel mi po po a ko khâwm a, Jordan vadung an kai a, Helama chun an fe a. Chun, Suria mihai chun David chu do dingin ṭhanghmun an lo siem a, an lo do ta ngei a.

¹⁸ Chun, Suria mihai chu Israelhai hmaa chun an tlânse ta a; chun, David chun Suria mi tawlailîr za sari chunga chuong le sakawr chung chuong mi sîng li a that a; chun, an sipai hotu Sobak khawm a that a, chutaka chun a thi ta a.

¹⁹ Chuongchun, Hadadezer hnuoia lal siehlawa umhai po po chun Israelhai hmaah an chan a chau tah ti an lo hriet chun, Israelhai leh inremna an siem a, an siehlawhaiah an um ta a. Chuongchun, Suria mihai chun Ammon mihai chu an ṭhangpui ngam nâwk ta naw a.