2 PETER 1 - Pathien Lekhabu Inthieng (BSI)

Chibai bûkna

¹ Simon Peter, Isu Krista suok le tirko chun: Isu Krista kan Pathien le Sandamtu felna leia ringna hlutak kan chang ang chang vehai kuomah:

² Pathien le ei Lalpa Isu hrietnaa chun in chungah lunginsietna le inremna sukpungin um raw se.

Kristienhai kona le an hamṭhatna

³ Ama ropuina le ṭhatna zâra a mi kotu, a chanchin hriet leiin a Pathien thilthawtheinain hringna le Pathien ngaisakna kawnga chun thil po po a mi pêk si a.

⁴ Chuong zâra chun a thutiem hlutak le ropui nasatakhai chu a mi pêk a nih, chuongchun, châkna leia khawvêla sietna hung um hi tlân suok sanin, chuong thutiem hlutak le ropui nasatakhai lei chun Pathien nungchang inṭâwmpui ve thei in tih.

⁵ Anih, chu chu lei tak chun taimâk hrim hrim insuoin, in ringnaa chun ṭhatna inṭhangtir unla, in ṭhatnaa chun hrietna,

⁶ in hrietnaa chun inthununna, in inthununna chun selna, in selnaa chun Pathien ngaisakna,

⁷ in Pathien ngaisaknaa chun unau laka ngilneina, in unau laka ngilneina chun hmangaina inṭhangtir ro.

⁸ Chuong chu in ta a na, a pung pei si chun, ei Lalpa Isu Krista hrietna kawnga hin zawmthaw lo le ra nuom takin a siem cheu a nih.

⁹ Tûkhawm chuong thil nei naw chu mitdel a na, hnaitaka mi chau a hmu thei a, hi hmaa a suolhai sâwpfai pêkna chu a theinghil ta si a.

¹⁰ Chuleiin, unauhai, a kona le a thlangna cheu chu sukdet dingin taimâk insuo nâwkzuol ro; chuong chu in thaw chun ieng tik khawm tlu naw ti niu;

¹¹ chuongchun, Isu Krista ei Lalpa le Sandamtu chatuon rama lûtna chu nasataka inhmutir nîng in tih.

¹² Chuleiin, chuong thil chu hrein, thutak in kuoma uma chun in det dea chu chuong thil chu inhrietthartir cheu ka tum zing hlak a.

¹³ Chun, hi bâwktêa ka um sûng po hin nangni hrietpuiin chawkhar rawp cheu ṭhain ka hriet a nih,

¹⁴ ei Lalpa Isu Kristain a min hriettir ang khan ka bâwktê sie hmang hun chu tlung vak a tih ti ka hriet a.

¹⁵ Anih, ka fe suok hnunga chuong thil chu in hriet zing rawp theina dingin thâwng ka tih.

Krista ropuina le thuhrillâwk

¹⁶ Ei Lalpa Isu Krista thilthawthei zie le a hung nâwkna thu chu kan inhriettir lai cheu khan, tienami vartaka ngaituo suok elhai zâwm kan ni naw a, a ropuina hmutuhai kan ni lem in sâwnnaw.

¹⁷ Ama chun Pa Pathien kuoma inthawkin chawimawina le ropuina a hmu a, chu lai chun ropuina nasataka inthawk chun hieng ang râwl hi a kuomah a hung tlung a, “Hi hi ka Naupa dittak, ka ilâwm bêk bêk a nih,” tiin.

¹⁸ Chun, tlâng inthienga kan um laiin chu râwl chu vâna inthawka hung suok keini ngeiin kan hriet a nih.

¹⁹ Chun, hrillâwkna thu det nâwkzuol chu kan nei a nih, khuo a hung var a, sikhawvar chu in lungrila a hung suok hmakhat, hmun inthima khâwnvar var ngaisak anga in ngaisak chun thaw ṭhang in tih.

²⁰ Pathien Lekha Thu hrillâwk hrim hrim hi mâniin hrilfie ding a ni nawh ti hre hmasa phawt unla.

²¹ Thu hrillâwk hrim hrim hi mihriem thua suok a ni ngai si naw a, mihaiin Thlarau Inthieng tirin, Pathien kuoma inthawkin an hril lem hlak a nih.