2 LALHAI 9 - Pathien Lekhabu Inthieng (BSI)

Israel lal dinga Jehu hriek nâla a um thu

¹ Chun, zâwlnei Elisa chun zâwlneihai naupasalhai laia pakhat chu a ko a, a kuomah, “I dier kei la, hi hriek bâwm hi chawi la, Ramothgilead khuoah va fe rawh;

² i va tlung chun Nimsi naupa Jehosaphat naupa Jehu chu va zawng suok la, pindan sûngrilah lûtpui la.

³ Chuongchun, hriek bâwm hi la la, a lua chun buok la, ‘Lalpain hieng ang hin a tih; Israelhai chunga lal dingin hriek ka nâl che, tiin,’ ti rawh. Chuongchun, kawt hawng la, tlân suok el rawh, um sâwt lovin,” a ta.

⁴ Chuongchun, tlangvâl, zâwlnei tlangvâl chu Ramoth-gileada chun a fe ta a.

⁵ Chun, a va tlung chun, ngai ta, sipai hotuhai an lo ṭhung khâwm a; chun, ama chun, “Sipai hotu, i kuomah thu incha hril ding ka nei,” a ta. Chun, Jehu chun, “ tu tak kuoma hin am a ni a?” a ta. Chun, ama chun, “Nanga kuoma hin a nih, sipai hotu,” a ta.

⁶ Chun, a tho a, ina chun a lût a; chun, a lua chun hriek chu a buok a, a kuomah, “Lalpa, Israelhai Pathien chun hieng ang hin a tih, ‘Lalpa mipuihai, Israelhai chunga lal dingin hriek ka nâl che.

⁷ Ka siehlaw zâwlneihai thisen le Lalpa siehlaw po pohai thisen phuba chu Jezebela inthawka ka lâk theina dingin i pu Ahab sûnghai chu sukbohmang vawng i tih.

⁸ Ahab sûnghai po po chu bohmang vawng an ta; Ahaba inthawk hin naupasal taphawt chu Israel rama mi khuokhir amanih, khuokhir naw amanih khawm ka sukbohmang ding a nih.

⁹ Chun, Ahab sûnghai chu Nebat naupa Jeroboam sûnghai le Ahija naupa Baasa sûnghai angin siem ka tih.

¹⁰ Chun, uiin Jezebel chu Jezreel khaw kul bula chun fâng an ta, a phûmtu ding hrim hrim um naw ni hai,’ tiin,” a ta.

¹¹ Chuongchun, kawt a hawng a, a tlân suok ta a. Chun, Jehu chu a pu upahai lai chun a hung suok a; pakhat chun a kuomah, “Ṭha tieng thu am a nih? Kha invêtpa kha i kuoma iengtiziea hung am a ni leh?” a ta. Chun, ama chun an kuomah, “In hriet mi a na, a thu hril khawm kha in hriet annâwm,” a ta.

¹² Anni chun, “Hre lo ve a, mi hang hril ta khai” an ta. Ama chun, “Hieng ang tak hin a mi ti a ni kha tie! ‘Lalpain hieng ang hin a tih, Israelhai chunga lal dingin hriek ka nâl che, tiin,’ ” a ta.

¹³ Chuongchun, mi tinin an puon chu an hlîp hmawk hmawk a, kailâwn chunga chun an phapêk ta seng a, “Jehu chu lal a ni tah,” tiin tawtawrâwt an mût ta a.

Jehuin Joram a that

¹⁴ Chuongchun, Nimsi nau Jehosaphat naupa Jehu chun Joram chu a phier rûk ta a. (Suria lal Hazael leiin Joram le Israelhai po po chun Ramoth-gilead khuo chu an vêng a;

¹⁵ lal Joram ruok chu Suria lal Hazael le an inthawnaa Suria mihaiin an inhliem kha Jezreel khuoah insukdam dingin a kîr nâwk kha.) Chun, Jehu chun, “Keia tienga ṭhang in ni chun Jezreel khuoah hieng thu hi hril dingin tukhawm khuoa inthawk hi insuoktir naw ro,” a ta.

¹⁶ Chuongchun, Jehu chu tawlailîrah a chuong a, Jezreel khuoah a fe a, Joram chu chutaka chun a zâl a na; chun, Juda lal Ahazia khawm Joram chu kan dingin a zu fe a.

¹⁷ Chun, Jezreel kula chun râlvêng a ngîr a, ama chun Jehu rawi hung chu a hang hmu a, “Mi tamtak el ka hmu ie,” a ta. Chun, Joram chun, “Sakawr chung chuong mi anni chu tuok dingin va tir la, ‘Ṭha tieng thu am a nih?’ va ti raw hai seh,” a ta.

¹⁸ Chuongchun, mi pakhat sakawr chunga chuong hi a tuok dingin a va fe a, “Lalin hieng ang hin a tih, ‘Ṭha tieng thu am a nih?’ tiin” a ti a. Chun, Jehu chun, “Ṭha tieng thu chu nanga lo hriet ding ieng am a um a? Ka hnunga hin va fe ve el rawh,” a ti a. Chun, râlvêngtu chun, “Ei mi tir chun an kuom chu a va tlung ngei a, nisienlakhawm, a hung kîr nâwk ta dêr nawh,” tiin a hril a.

¹⁹ Chuongchun, mi pakhat sakawr chunga chuong hi a tir nâwk a, ama khawm chun an kuom a va tlung a, “Lalin hieng ang hin a tih: ‘Ṭha tieng thu am a nih?’ tiin,” a ti a. Chun, Jehuin a dawn a, “Ṭha tieng thu chu nanga lo hriet ding ieng am a um leh? Ka hnunga hin va fe ve el rawh,” a ta.

²⁰ Chun, râlvêngtu chun, “Ama khawma an kuom chu a va tlung ngei a, ama khawm chu a hung kîr nâwk ta dêr nawh; chun, a khal dân khawm saw Nimsi naupa Jehu khal dân chie a nih, mi invêt ang elin a khal hlak a nih,” a ta.

²¹ Chun, Joram chun, “Buotsai ta u,” a ta. Chun, a tawlailîr chu an buotsai a. Chun, Israel lal Joram le Juda lal Ahazia chu mâni tawlailîr ve vein an va suok a, Jehu chu tuok dingin an va fe a; Jezreel mi Naboth huonah an va hmu a.

²² Chun, Joramin Jehu a hei hmu chun, “Ṭha tieng thu am a nih, Jehu?” a hei ti a. Chun, ama chun a lo dawn a, “I nu Jezebel hin uiret le dâwi a chîng sûng chu ṭha tieng thu ieng am um thei a ta?” a ta.

²³ Chun, Joram chun a kei her a, a tlân a, Ahazia kuomah, “Inhlêmna a um a ni hi, Ahazia,” a ta.

²⁴ Chun, Jehu chun a thalngul chu a theitâwpin a kuoi a, Joram dâr le dâr inkâra chun a kâp a, thal chu a lungah a lût thleng a, a tawlailîra chun a awp ta rawk a.

²⁵ Chuongchun, Jehu chun a sipai hotu Bidkar kuomah, “Pawm la Jezreel mi Naboth huon hmunah pei thla rawh, kha hmaa a pa Ahab hnunga ei pahnia ei chuong hmunkhat laia Lalpain hi phur hi ama chunga ân nghat hrim a ni kha;

²⁶ Lalpain⁠, ‘Zâni khan Naboth thisen le a naupasalhai thisen ka hmu ngei annâwm,’ a ti kha; chun, Lalpain, ‘Hi hmun ngeia hin ka thung ding che a nih,’ a ti nâwk kha. Chuongchun, Lalpa thu ang chun pawm la, hi hmuna ngei hin pei thla rawh,” a ta.

Jehuin Ahazia a that

²⁷ Nisienlakhawm, Juda lal Ahazia chun chu chu a hmu chun Beth-haggan tieng a tlân ta a. Chun, Jehu chun a hnawt a, “Ama khawm tawlailîra khan that nghâl ro,” a ta. Chuongchun, Ibleam khaw kâwl, Gur hang fenaa chun an kâp hliem a. Chun, Megiddo khuoah a tlân lût a, chutaka chun a thi ta a.

²⁸ Chun, a mihai chun Jerusalem khuoah tawlailîrin an fepui a, ama thlânah a pi le puhai lai David khawpuiah an phûm ta a.

²⁹ Ahab naupa Joram kum sâwm le kum khat ân lal kumin Ahazia chu Judahai chungah ân lal ṭan a nih.

Jezebel thi thu

³⁰ Chun, Jehu chu Jezreel khuo a va lût chun Jezebel chun a lo hriet a; chuongchun, a mithai a lo nâl a, a sam dâm a lo chei a, tukvera hin a lo dâk a.

³¹ Chun, Jehu chu kul kawtkhâra a hung lût lai takin, “Ṭha tieng thu am a ni, nang, mâni puhai thattu, Zimri?” a lo ti a.

³² Chun, ama chu tukver tieng ngha chun a hung dâk a, “Tu am ka tienga ṭhanghai chu? Tuhai am?” a ta. Mi tillâk pahni amanih, pathum amani hi ama tieng ngha chun an hung dâk a.

³³ Chun, ama chun, “Hung the thla ro,” a ta. Chuongchun, an the thlâk a, a thi chun bang le sakawrhai chu a khieng nuol el a; chun, ama chun a lo chîl a.

³⁴ Chun, a lût a, a fâkin a dâwn a; “Ṭawngsephurnu kha va ngaiven unla, va phûm ro, lal naunu a ni si a,” a ta.

³⁵ Chun, phûm dingin an va fe a; nisienlakhawm, a luru dâm, a ke bâwr dâm, a kutpha bâwr dâm ngawt naw chu an va hmu ta naw a.

³⁶ Chuongchun, an hung nâwk a, an hung hril a. Chun, ama chun, “Hi hi Lalpain a siehlaw Tisbe mi Elija hmanga, ‘Jezreel kul bula chun uiin Jezebel sa hi la fâng a ta,

³⁷ Jezebel ruong chu Jezreel khaw kul bulah huona êk ang el la nîng a tih; chuongchun, hi hi Jezebel a ni hi aw, an ti nawna dingin,’ ti thu a hril kha a ni hi,” a ta.