2 KORINTH 6 - Pathien Lekhabu Inthieng (BSI)

¹ Chun, Pathien lunginsietna chu ṭhathnempui lova in hmu nawna dingin, ama thawpuiin ka ngên cheu a nih.

² “Hun lâwmumah ka ngaithlâk che a, Sandamna niah ka ṭhangpui che,” a ti si a. Ngai ta u, tu hi hun lâwmum chu a na; ngai ta u, tu hi sandamna ni chu a nih.

³ Kan rawngbâwlna sin chu an dem nawna dingin ieng kawnga khawm tlûkphâna ding hrim hrim kan siem naw a;

⁴ Pathien rawngbâwltuhai angin iengkimah mi mit tlungin kan um lem hlak, nasataka selnaa dâm; hnawchêpnaa dâm,

⁵ vuoknaa dâm, lungin intângnaa dâm, buoinaa dâm, sininrimnaa dâm, intheinawnaa dâm, bu ngheinaa dâm,

⁶ inthiengnaa dâm, hrietnaa dâm, dawtheinaa dâm, ngilneinaa dâm, Thlarau Inthienga dâm, hmangaina taktaka dâm;

⁷ Thutak thua dâm, Pathien thilthawtheinaa dâm, changtieng le vawitienga felna hriemhreihaiin,

⁸ sukropuina le sukmuolphonain, hming hril siet le hming hril ṭhatin, hlêmtu angin, mi indiktak ni siin,

⁹ mi hriet khawp naw angin, hming inthangtak siin, thi vâng vâng angin, ngai ta u, kan hring si a; thunun angin sukhluma um si lovin;

¹⁰ lungngai angin, nisienlakhawm, lâwm rawp siin; pasie angin, nisienlakhawm, mi tamtak sukhausa siin; iengkhawm neilo angin, iengkim hau siin.

¹¹ Aw, Korintha mihai, in kuomah kan bau kan ka a, kan lungril kan hawng lien pêk cheu,

¹² keinîn kan lungril kan khârpêk cheu a ni naw a, nangnîn in mi khârpêk lem a nih.

¹³ Chuongchun, nauhai kuoma hril ang elin ka hril cheu; nangni tienga lungril kan put ang hi, mîn hmutir ve unla, in lungril hawng lien ve ro.

Pathien hring biekin

¹⁴ Awinawhai leh inruolnawtaka rîngkawl bât hmunkhatin um naw ro; rîtlona le felnain ieng am inṭawmna an nei a? Annawleh, inthim le varin ieng am inpâwlna an nei a?

¹⁵ Belier le Krista khawmin ieng am inngeina an nei a? Annawleh, awinaw le awitu chun ieng am chan hmunkhat an nei a?

¹⁶ Milimhai le Pathien biekin khawmin ieng am inremna an nei a? Eini chu Pathien hring biekin ei ni si a; Pathienin, “Anniah um ka ta, Anniah lêng bawk ka ta; Chun, an Pathien nîng ka ta, Anni khawm ka mihai nîng an tih”, a ti ang khan.

¹⁷ Chuleiin, “Anni laia inthawkin hung suok unla, A tumin um ro, thil inthiengnaw hrim khawm them naw ro, Lalpain a tih,” Chuongchun, “Lâwm ka ti cheu a,

¹⁸ In ta dingin Pa nîng ka ta, Nangni khawm keia ta dingin naunu naupa ning in tih,” Lalpa iengkimthawthei chun a tih.