2 KORINTH 5 - Pathien Lekhabu Inthieng (BSI)

¹ Ei umna hnuoia in hi ṭiek sien khawm, vânah, in kuta bawl lo, kumkhuoa um zing ding, Pathien kuoma in nghet chu ei nei ti ei hriet si a.

² Vâna ei umna ding sil thuo inhâwk bêk bêkin hi ina hin ei inrûm tak meu hlak si a; chuong anga silin um inla, saruokin um nâwng ei tih.

³ Eini hi umnaa umhai hi rik phurin ei inrûm takzet si a;

⁴ sil lova um ei nuom lei a ni naw a, sil thuoa um ei nuom lei a nih, thithei hi hringna ilem zoa a um theina dingin.

⁵ Chun, chu thil ngei dinga a mibuotsaitu chu Pathien a nih, zakhamna Thlarau mi petu kha.

⁶ Chuongchun, taksaa ei um sûngin, Lalpa kuomah ei um nawh ti hrein kumkhuoin muongtakin ei um hlak;

⁷ (hmutheia fe lovin, ringnain ei fe lem si a);

⁸ muongtakin ei um ka ti a nih, taksaa um lova Lalpa kuoma um ei nuom lem.

⁹ Chuleiin, um inla um naw inla khawm, ama lâwm zâwng ni ei tum tlat hlak a nih.

¹⁰ Mi tinin taksaa ei thilthawhai a sie a ṭhaa ei thaw ang peia ei hmu seng theina dingin, Krista rorêlna ṭhungpha hmaa chun suklangin ei um vawng ding a ni si a.

Inremna rawngbâwl sin

¹¹ Chuongchun, Lalpa ṭina châng hrein, mihriemhai chu kan thlêm hlak a, Pathien kuoma ruok chun inlangtirin kan um a; nangni sie le ṭha hrietnaa khawm inlangtira kan um ka beisei.

¹² In kuomah kan inhrilmawi nâwk a ni naw a, lungril tieng ni lova, ân lang el zawngtuhai chu ieng amanih dawnna in nei theina dingin keini tienga suongna san siempêk cheuin kan hril lem a nih.

¹³ Kan invêt leh Pathien ta ding a na, kan var leh nangni ta ding a ni si a.

¹⁴ Krista hmangaina chun keini a mi tirlui a nih, hieng ang hin kan ngaituo; mi po po thi aiin mi pakhat a thi a, chuleiin, mi po po chu an thi a nih.

¹⁵ Chun, a hringhai chu anni ta dinga hring ni ta lova, an thi aia thia thonâwk ta ding chun an hring ta lemna dingin a nih, mi po po aia a thi chu.

¹⁶ Chuleichun, tuta inthawk chu, mihriem en dânin tukhawm kan en ta nawh; inhma khan mihriem hriet dânin Krista lo hre ta inlang khawm, tuhin chu chuong ang chun kan hriet ta nawh.

¹⁷ Chuleichun, tûkhawm Kristaa a um chun thilsiem thar a hung ni ta a; thil hluihai chu a bo ta a, ngai ta u, a hung thar tah.

¹⁸ Nisienlakhawm, iengkim Pathiena inthawka suok a nih; ama chun Krista leiin ama le inremin a mi siem a, inremna rawngbâwl sin a mi pêk a;

¹⁹ khânga, Pathienin Kristaa chun khawvêl hi ama le inremin a siem a, an bawsietnahai chu bawsietnaa ruot pêk lovin, inremna thu a mîn kawltir kha.

²⁰ Chuongchun, Krista aia palai kan na, Pathienin keini hmangin a ngên cheu ti thei a nih. “Pathien leh hung inrem ro,” tiin Krista aiin kan ngên cheu a nih.

²¹ Amaa chun Pathien felna ei hung ni theina dingin suol hrim hrim hre lo chu Pathienin eini leiin suolah a siem a.