2 JOHAN 1 - Pathien Lekhabu Inthieng (BSI)

Chibai bûkna

¹ Upa chun: Nuhmei ṭha thlang le a nauhai kuomah: Titakzetin ka hmangai cheu a nih, kei chau ni lovin, thutak chu hre taphawt khawmin an hmangai cheu a nih:

² Thutak einia um zing, kumkhuo khawma ei kuoma um ding lei hin.

³ Pa Pathien le Pa Naupa Isu Krista kuoma inthawkin, lunginsietna dâm, zângaina dâm, inremna dâm chu, thutak le hmangainain ei kuomah um a tih.

Thutak le hmangaina

⁴ Pa kuoma inthawka thupêk ei hmu ang khan i nau tuhai amanih thutaka umin ka hmu leiin ka lâwm hle a nih.

⁵ Nuhmei ṭha, i kuoma thupêk thar ziek ang ni lovin, a tîra inthawka ei nei ang kha ziek lemin, ei inhmangai tuona dingin ka ngên che a nih.

⁶ Chun, hi hi hmangaina a nih, ama thupêk ang peia ei um hi. Thupêk a tîra inthawka in ihriet ang chu hi hi a nih, hmangainaa chun um ro, ti hi.

⁷ Hlêmtu tamtak Isu Krista chu tisain a hung ti ṭan nawtuhai kha khawvêla hin an hung suok ta si a. Chuong ang mi chu an nih, hlêmtu le Krista kaltu chu.

⁸ Ei thaw suok sahai kha in inhmang naw a, a man chu a kima in hmu thei lemna dingin invêng ṭha ro.

⁹ Tûkhawm Krista inchûktirna thua um zing lova, fe khêl chun Pathien a nei nawh. Chu inchûktirna thua um zing ruok chun, ama ngei chun Pa le Naupa a nei kawp a nih.

¹⁰ Tûkhawm, chu inchûktirna thu chu hung chawi lova, in kuomah hung chun, in inah intlungtir naw unla, ṭawngbau ṭha khawmin inthla naw ro;

¹¹ ṭawngbau ṭhaa inthlatu chu a thil suksuola chun a ṭhang ve si a.

Inthlâna

¹² In kuomah thu tamtak hril ding ka nei leiin lekha le lekhatuiin ziek ka nuom nawh; in lâwm a kim theina dingin, in kuoma hunga, inhmatuoa inbiek ka beisei lem a nih.

¹³ I zuorpuinu thlang nauhaiin chibai an bûk che.