1 TIMOTHE 4 - Pathien Lekhabu Inthieng (BSI)

Ṭhuoi hmangna thlarau hung tlung ding hrillâwkna

¹ Nisienlakhawm, Thlarau chun chiengtakin a hril: nakie pha chun mi ṭhenkhathai chun ṭhuoi hmangna thlarauhai le khawhrihai inchûktirna thu ngaisakin ringna chu la bânsan an tih, mi khêlhliphai vervêkna leiin ti hi.

² Chuong mi khêlhliphai chu anni sie le ṭha hrietna ngeia thîr linga bel ang an na,

³ innei an khap hlak a, iengkhat fâk dinghai (thutak hrea ringtuhai lâwmthu hrila pawm dinga Pathienin a isiemhai chu) fâk naw ding an ti hlak.

⁴ Pathien thilsiem tinrêng hi a ṭha si a, lâwmthu hrila pawm a ni taphawt chun iengkhawm dit naw ding a ni nawh,

⁵ Pathien thu le ṭawngṭainain sukthieng a ni ta si a.

Krista rawngbâwltu ṭha

⁶ Chuonghai chu unauhai în hriettir chun, Krista Isu rawngbâwltu ṭhatak nîng i tih, ringna le inchûktirna ṭha tu chena i la zâwm thuah châwm i ni ang khan.

⁷ Amiruokchu, Pathien inza nâwna le pitarhai tienami thu mei mei chu dit naw rawh. Chun, Pathien ngaisak dingin insawizawi rawh.

⁸ Taksa insawizawina hi ṭhahnem chu a ṭhahnem ve bawk a, Pathien ngaisakna ruok hin chu, hringna tuta umsa le la hung um ding pêk tiemna a nei leiin kawng tinrêngah a ṭhahnem a nih.

⁹ Hi thu hi ring a umin pawm tlâk bêk bêk a nih.

¹⁰ Chuongchun, Pathien hring chu ei awi leiin sin ei inrim a; ei thaw hrâm hrâm a nih, ama chu mi po po sandamtu a na, ama ringtuhai sandamtu a ni bîk tak a nih.

¹¹ Chuong thu chu pe la, inchûktir rawh.

¹² I naupangna tûkhawmin ngainêp naw raw hai seh, thu hril kawnga dâm, chângzie kawnga dâm, hmangaina kawnga dâm, ringna kawnga dâm, inthiengna kawnga dâm, ringtuhai sukhmutu ni lem raw khai.

¹³ Ka hung hmakhat chu tiem dâm, thu hril dâm, inchûktir dâm thaw rawh.

¹⁴ Nangmaa um, thilpêk hril lâwk ta anga, upahai kut innghata, Pathienin ân neitir che kha thlathlam naw.

¹⁵ Mi po po kuomah i ṭhathnemna ân lang theina dingin chuongahai chun taima la, chuonga chun inhmang zo rawh.

¹⁶ Nangma le i inchûktirnaa chun fimkhur la, chuong thilhai chu thawin um zing rawh; chuong anga thawin nangma le i thu ngaituhai chu i sandam ding a nih.