1 TIMOTHE 3 - Pathien Lekhabu Inthieng (BSI)

Kohran hotu mizie ding

¹ “Tûkhawm Kohran hotua ṭhang a nuom chun, sinthaw ṭha a nuom a nih,” ti hi ân dik a nih.

² Chuongchun, kohran hotu chu sawisêlbo, nuhmei pakhat nei, insûm thei, lungril indiktak, mi fel, mi lâwm dân thiem, inchûktir dân thiem,

³ uoin inrui hmang naw, mi vuo hmang naw, mi nunnêmtak ni lem ding, mi kâwmaw ni lo, tangka sum ngaina naw mi,

⁴ inzaumtaka mâni nauhai thununa, mâni insûng khawsak rêl fel thiem mi a ni ding a nih;

⁵ (miin mâni insûng khawsak hman a rêl fel thiem naw chun, Pathien kohran iengtin am enkawl a ta?)

⁶ Ringthar a ni ding a ni naw a, chuong naw chun, chapoin um a ta, Diebol thiemnaw changna chu chang ve rawi a tih.

⁷ Chuong naw khawm chu, puotienga mihai inpâkin a um bawk ding a nih; chuong naw chun, hrilsieta umin diebol chângah âwk rawi a tih.

Kohran rawngbâwltu mizie ding

⁸ Chuong ang bawkin, kohran rawngbâwltuhai chu mi inzaum an ni ding a nih; bâutam dâm, uoin he dâm, hlêpna inthieng nawa duâm mi an ni ding a ni nawh;

⁹ sie le ṭha hrietna inthienga ringna thurûk chu pawm mi an ni lem ding a nih.

¹⁰ Chun, chuonghai khawm chu infiein um hmasa raw hai se, chu hnunga sawisêlbo an lo ni chun, kohran rawngbâwl tieng sin thaw raw hai se.

¹¹ Chuong ang bawkin nuhmeihai khawm mi inzâum an ni ding a nih; hêktuhai ni lovin, insûm thei le iengkima ringum an ni ding a nih.

¹² Kohran rawngbâwltuhai chu an nauhai le anni insûng khawsak rêl felin nuhmei pakhat nei mi ni raw hai se.

¹³ Kohran rawngbâwl tieng sin thaw ṭha tahai chun, ngîrna ṭha tak le, Krista Isu ringna kawnga chun huoina nasatak an insiem hlak si a.

Ei sakhuo thurûk

¹⁴ Sâwt nawtê hnunga i kuoma hung beiseiin hieng thu hi i kuomah ka ziek a nih.

¹⁵ Nisienlakhawm, ka la um sâwt tâk duoiin Pathien sûnghai laia mi iengtin am an um ding ti i hriet theina dingin ka ziek a nih; Pathien sûnghai chu Pathien hring kohran, thutak ban le innghatna chu an nih.

¹⁶ Chun, Pathien ngaisakna thurûk chu sêl ruol lovin a ropui a nih: “Ama, taksaa hung inlang, Thlaraua thiem chang, Vântirkohai ihmu, Hnamhai laia tlânginsampui, Khawvêla mihai iawi, Ropuinaa zuk ṭhuoi ta chu,”