1 SAMUEL 8 - Pathien Lekhabu Inthieng (BSI)

Israelin lal a ngên

¹ Samuel chu a hung upa ta a, a naupasalhai chu Israel mihai chunga rorêltuhaiah a siem a.

² A naulutir hming chu Joel a na, chun, a dawttu hming chu Abija a nih; anni chu Beer-sebaa rorêltu an na.

³ Nisienlakhawm, a nauhai chun a umdân chu an lâk ve naw a, sum le pai tieng an hnawt a, thamnahai an lâk a, indik nawtakin ro an rêl a.

⁴ Chuongchun, Israel mi upahai po po chu an inkhâwm a, Rama khuoa Samuel kuomah an fe a,

⁵ a kuomah, “Ngai ta, i hung upa ta hle el a, i naupasalhai hlak chun i umdân hi an lâk ve dêr si naw a; hnam danghai po po ang bawka kan chunga ro mi rêlpêk dingin lal mi siempêk raw khai,” an ta.

⁶ Nisienlakhawm, a kuoma, “Ro mi rêlpêktu ding lal mi pe rawh,” an ti chun Samuel chu a suklâwm naw hle a. Chuongchun, Samuel chu Lalpa kuomah a ṭawngṭai a.

⁷ Lalpa chun Samuel kuoma chun, “Mipuihaiin i kuoma an hril po po chu ngai rawh, nang dit naw che an ni naw a; an chunga lal dinga kei mi dit lo an ni lem.

⁸ Aigupta rama inthawka ka ṭhuoi suok nia tuta chena an thil thaw dân po po, an mi nghatsan a, pathien danghai rawng dâm an mi bâwlsan hlak ang bawk hin i chungah an thaw a ni hi.

⁹ Chuleiin, an thu ngai rawh, amiruokchu, ursûntaka tiemkamin an chunga rorêltu lal châng dân ding chu khîkhmu chie rawh,” a ta.

¹⁰ Chun, Samuel chun Lalpa thuhai po po chu lal hnitu mipuihai chu a hril vawng a.

¹¹ “In chunga rorêltu lal châng dân ding chu hieng ang hi nîng a tih: in naupasalhai chu a sakawr le a tawlailîr chuongpuia hai ruot a ta, a tawlailîr hmaa tlânhai dâm um an ta;

¹² chun, a sipai sâng hotua dâm, sâwmnga hotua dâm ruot a tih; ṭhenkhat chu a hnuoi inlettua dâm, a busîktua dâm, a indo thuomhnaw siemtua dâm, tawlailîr hmangruo siemtua dâm hmang a ta.

¹³ In naunuhmeihai chu riminhnik siemtua dâm, bu suongtua dâm, bei siemtua dâm hmang a tih.

¹⁴ In lohai, in grêp huonhai, oliv huonhai, a ṭha ṭhahai chu lâkpêk a ti cheu a, a siehlawhai pêng a tih.

¹⁵ In thlai chi le in grêp huonhaia mi chu sâwma pakhat lâkpêk a ti cheu a, a siehlawhai le a hotuhai pêng a tih.

¹⁶ In siehlawpahai, in siehlawnuhai, in tlangvâl ṭha ṭhahai le in sabengtunghai lâkpêk a ti cheu a, a sinthaw dingin ruoi a tih.

¹⁷ In berâm ruol laia mi chu sâwma pakhat lâkpêk a ti cheu a; chun, ama siehlawhai nîng in tih.

¹⁸ Chun, chu nia chun in la thlang ding in lal lei chun la khêk suok in ta, nisienlakhawm, chu nia chun Lalpain dawn naw ni cheu,” a ta.

¹⁹ Nisienlakhawm, mipuihai chun Samuel rawl chu an ngai nuom naw a, “Ni lo e, lal kan nei ding a nih,

²⁰ chuongchun, hnam dang po pohai ang hung nîng kan ta, chun, kan lal chun ro mi rêlpêk a ta, kan hmahai chu ṭhuoiin râlhai mi dopui a tih,” an ta.

²¹ Chun, Samuel chun mipui thuhrilhai po po chu a hriet a, Lalpa naa chun a thun nâwk sâwng a.

²² Chun, Lalpa chun Samuel kuomah, “An rawl chu ngai la, lal siempêk rawh,” a ta. Chun, Samuel chun Israel mihai kuomah, “Mi tin mâni khuo sengah fe ta ro,” a ta.